ខេត្តបន្ទាយមានជ័យ ៖ អាជ្ញាធរក្រុងដឹកនាំមន្ត្រីជំនាញចុះវាស់វែងអ័ក្ខផ្លូវ និងណែនាំប្រជាពលរដ្ឋ និងចាត់វិធានការដែលសាងសង់សំយ៉ាប និងតូប ផ្ទះ រំលោភចំណីផ្លូវនៅថ្ងៃទី១៤ ខែវិច្ឆិកា ឆ្នាំ២០២៤…
ខេត្តបន្ទាយមានជ័យ ៖ អាជ្ញាធរក្រុងដឹកនាំមន្ត្រីជំនាញចុះវាស់វែងអ័ក្ខផ្លូវ និងណែនាំប្រជាពលរដ្ឋ និងចាត់វិធានការដែលសាងសង់សំយ៉ាប និងតូប ផ្ទះ រំលោភចំណីផ្លូវនៅថ្ងៃទី១៤ ខែវិច្ឆិកា ឆ្នាំ២០២៤ នៅសង្កាត់កំពង់ស្វាយ ក្រុងសិរីសោភ័ណ ។
លោក ស្រេង សុផល អភិបាលក្រុងសិរីសោភ័ណបានប្រាប់ថា ជាការណែនាំពីឯកឧត្តម អ៊ុំ រាត្រី អភិបាលខេត្តបន្ទាយមានជ័យ ដើម្បីរៀបចំសណ្តាប់ធ្នាប់ និងការពារសុវត្ថិភាពនិងគ្រោះថ្នាក់ចរាចរណ៍កើតឡើង និងតាមដងផ្លូវឱ្យមានសោភ័ណភាព និងសណ្តាប់ធ្នាប់ល្អ លោកបានដឹកនាំមន្ត្រីជំនាញចុះវាស់វែងអក្ខផ្លូវ និងមានវិធានការចំពោះអ្នកដែលធ្វើសំយ៉ាប និងតូបសំណង់ផ្សេងៗរំលោភលើចំណីផ្លូវ ។
លោកបានបញ្ជាក់ថា អនុវត្តជំហ៊ានដំបូង ត្រូវបានធ្វើតាមផ្លូវជាតិលេខ៥៦ពីចំណុចភ្លើងស្តុបផ្លូវបំបែកជាបួនផ្លូវទៅផ្សារថ្មី ដល់ភូមិពង្រ សង្កាត់កំពង់ស្វាយ ក្រុងសិរីសោភ័ណ ដោយចុះវាស់វែងអ័ក្ខផ្លូវដោយមន្ត្រីជំនាញ និងមន្ត្រីសាលាក្រុងដោយយកចំណុចអ័ក្ខកណ្តាលផ្លូវទៅចិញ្ចើមខាងកើតយកប្រវែង១៥ម៉ែត្រ និងខាងលិចផ្លូវយក២៥ម៉ែត្រ តែជំហ៊ានដំបូងយកត្រឹមបង្គោលភ្លើងសិនហើយណែនាំដល់ប្រជាពលរដ្ឋដែលធ្វើសំយ៉ាបនិងតូបសំណង់ផ្សេងៗដែលធ្វើរំលោភទៅលើចំណីផ្លូវជាតិលេខ៥៦ ត្រូវរុះរើចេញដោយខ្លួនឯងចាប់ពីថ្ងៃជូនដំណឹងតទៅ ។
លោក ស្រេង សុផល បានបញ្ជាក់ថា ក្រោយពីការណែនាំអោយរុះរើចេញដោយខ្លួនឯងហើយមិនអនុវត្តតាមអាជ្ញាធរក្រុង និងមានវិធានការរុះចេញដោយមិនលើកលែងឡើយ ដើម្បីរៀបចំសណ្តាប់ធ្នាប់ និងសោភ័ណភាពក្រុងការពារគ្រោះចរាចរណ៍កើតឡើង ។
ចែករំលែកព័តមាននេះ