តារាសម្តែង ស៊ឹម ស្រីនិច បានបង្ហាញតម្រុយជាថ្មីពីការបញ្ចប់អាជីពសិល្បៈរបស់ខ្លួន បន្ទាប់ពីនាងបានប្រឡូកក្នុងអាជីពសិល្បៈមួយនេះអស់រយៈពេលជិត១០ឆ្នាំកន្លងមកហើយ។ នេះជាការបង្ហាញតម្រុយជាថ្មីម្តងទៀត ក្រោយពេលកន្លងមក
រាជធានីភ្នំពេញ ៖ តារាសម្តែង ស៊ឹម ស្រីនិច បានបង្ហាញតម្រុយជាថ្មីពីការបញ្ចប់អាជីពសិល្បៈរបស់ខ្លួន បន្ទាប់ពីនាងបានប្រឡូកក្នុងអាជីពសិល្បៈមួយនេះអស់រយៈពេលជិត១០ឆ្នាំកន្លងមកហើយ។ នេះជាការបង្ហាញតម្រុយជាថ្មីម្តងទៀត ក្រោយពេលកន្លងមក តារាសម្តែងរូបស្រស់រូបនេះ ក៏ធ្លាប់បញ្ជាក់ពីការបញ្ចប់អាជីពសិល្បៈរបស់ខ្លួនដូចគ្នា ដោយសារតែនាងមានធុរៈផ្ទាល់ខ្លួន។
តារាសម្ដែងស្រីស្រស់ ស៊ឹម ស្រីនិច អាចនឹងមិនបង្ហាញវត្តមានសម្តែងថ្មីៗបន្ថែមទៀតឡើយ ក្រោយពេលដែលនាងថតបញ្ចប់រឿង «អប្សរាមហាអង្គរ» ដែលដឹកនាំដោយលោក ហ្វៃ សំអាង។
ស្រីស្រស់ ស៊ឹម ស្រីនិច បានបង្ហាញជំហរដូច្នេះតាមរយៈការបង្ហោះសារនៅលើបណ្តាញសង្គមថា «គ្រប់យ៉ាងដែលនាងខ្ញុំត្រូវមានទំនួលខុសត្រូវ ខ្ញុំក៏បានព្យាយាមសម្រាប់ពេលវេលាកន្លងមកហើយ នឹងមកដល់ និងពេលនេះដូចគ្នា។ ការខំប្រឹងរបស់ខ្ញុំ សុំត្រឹមអោយខ្ញុំចងចាំខ្លួនឯងនៅក្នុងរឿង «អប្សរាមហាអង្គរ»ថា ខ្ញុំបានផ្តល់ពេលវេលា និងគ្រប់យ៉ាងដែលខ្ញុំបានព្យាយាមជាតួអង្គ៣ នឹងអាកបុ្បកិរិយាត្រូវបែងចែកទាំងសម្លេង និងកាយវិការសម្រាប់៥អត្តចរិត ខ្ញុំក៏បានប្រឹងទាំងកម្លាំងកាយ និងចិត្ត ដោយក្តីស្រលាញ់យ៉ាងពិតប្រាកដ ពិន្ទុនឹងលទ្ធផលខ្ញុំទុកអោយបងប្អូនទស្សនិកជន ហើយក៏អរគុណពេលវេលាគ្រប់យ៉ាងដែលបានរួមចំណែកនៅក្នុងការផលិតរឿង «អប្សរាមហាអង្គរ»។
នាងបញ្ជាក់ថា «ខ្ញុំអាចនឹងមិនមានពេលវេលាច្រើនទៀតទេ ក្នុងការបង្ហាញសមត្ថភាពថតរឿងបន្ថែមទៀត ដូច្នេះហើយអ្វីដែលខ្ញុំអាចធ្វើទៅបាន ខ្ញុំនឹងធ្វើទៅដោយក្តីស្រលាញ់ រហូតដល់នាងខ្ញុំអស់ពេលវេលាក្នុងអាជីពសិល្បៈ អរគុណច្រើន»។
ជាការកត់សម្គាល់ កន្លងមក តារាសម្តែងនាង ស៊ឹម ស្រីនិច ក៏ធ្លាប់បានបង្ហោះសារតាមគណនីហ្វេសប៊ុករបស់ខ្លួនស្រដៀងគ្នានេះដែរថា «លាហើយជីវិតសិល្បៈ៦ឆ្នាំ នាងខ្ញុំទទួលបានការសើចសប្បាយ និងសំណើចជាច្រើន ហើយមេរៀនក៏រាប់មិនអស់ថែមទៀតផង។ អរគុណដល់បងៗអ្នកដឹកនាំ ក្រុមហ៊ុនផលិតកម្មទាំងអស់ ដែលធ្លាប់ផ្តល់ឱកាស និងស្នាមញញឹមដល់ក្មេងស្រីម្នាក់នេះអោយរៀនក្រោកឈរដើរដេកអង្គុយ បែតបត់គ្រប់ស្ថានការ និងកាលៈទេសៈទាំងអស់ ហើយជាចុងក្រោយក៏សុំទោសទៅដល់បងៗ directors ដែលប្អូនសុំអនុញ្ញាតមិនបានទទួលការងារថតវិញ ដោយប្អូនត្រូវបំពេញធុរៈកិច្ចដែលត្រូវបំពេញមើលថែខ្លួនឯង និងការងារ ដែលគប្បីនឹងផ្អាក ឬក៏បញ្ចប់ពីជីវិ.តសិល្បៈមួយនេះ»។
ការដើរចេញពីវិថីសិល្បៈត្រឹមពាក់កណ្តាលនាពេលនេះ ត្រូវបានស្រីស្រស់ ស៊ឹម ស្រីនិច បញ្ជាក់ពីមូលហេតុថា «នាងត្រូវមានស្វាមី ហើយនឹងចាប់ផ្តើមមុខរបរថ្មីផងដែរ»។
យ៉ាងណា ស្រីស្រស់ ស៊ឹម ស្រីនិច បានបញ្ជាក់ថា «ការសម្រេចឈប់ពីអាជីពសិល្បៈនាងមិនមានការសោកស្តាយអ្វីឡើយ ដោយសារតែនាងបានប្រឡូកក្នុងអាជីពនេះប្រហែលជាជាង៦ឆ្នាំមកហើយ»។ នាងបន្ថែមថា «ក្នុងពេលដែលនាងត្រូវមានគ្រួសារ ហើយនឹងការចាប់ផ្តើមមុខរបររកស៊ីថ្មីផងនោះ ជាហេតុធ្វើអោយនាងសម្រេចឈប់ពីសិល្បៈ ព្រោះនាងអាចនឹងមិនមានពេលគ្រប់គ្រាន់សម្រាប់អាជីពមួយនេះឡើយ»៕
ចែករំលែកព័តមាននេះ