ក្រសួងធនធានទឹក និងឧតុនិយម បានចេញសេចក្ដីជូនដំណឹងស្ដីពីស្ថានភាពធាតុអាកាសនៅកម្ពុជា សម្រាប់ថ្ងៃទី៨ ខែវិច្ឆិកា ឆ្នាំ២០២៣ ក្នុងនោះបានឱ្យដឹងថា
រាជធានីភ្នំពេញ ៖ ក្រសួងធនធានទឹក និងឧតុនិយម បានចេញសេចក្ដីជូនដំណឹងស្ដីពីស្ថានភាពធាតុអាកាសនៅកម្ពុជា សម្រាប់ថ្ងៃទី៨ ខែវិច្ឆិកា ឆ្នាំ២០២៣ ក្នុងនោះបានឱ្យដឹងថា ប្រព័ន្ធសម្ពាធខ្ពស់ពីប្រទេសចិនលាតសន្ធឹងមកលើភាគខាងជើង និងភាគឦសាន កម្ពុជា រួមជាមួយខ្យល់មូសុងឦសានខ្សោយ។ ទន្ទឹមនឹងនេះ មានចរន្ដខ្យល់ក្ដៅ ហើយសើមពីសមុទ្រចិនខាងត្បូង នឹងបក់ពីទិសខាងកើត និងទិសអាគ្នេយ៍មកលើប្រទេសកម្ពុជា។
ក្រសួងបានបញ្ជាក់ថា ស្ថានភាពបែបនេះ នឹងធ្វើឱ្យធាតុអាកាស នៅថ្ងៃទី៨ ខែវិច្ឆិកា ឆ្នាំ២០២៣ នៅតំបន់វាលទំនាប មានសីតុណ្ហភាពអប្បបរមាពី២៤-២៦°C និងសីតុណ្ហភាពអតិបរមាពី៣០-៣៤°C ហើយខ្យល់បក់មកពីទិសឦសាន ទិសខាងកើត និងទិសអាគ្នេយ៍ក្នុងល្បឿនពី១-៣ម៉ែត្រ/វិនាទី។ ហើយនឹងមានភ្លៀងធ្លាក់លាយឡំជាមួយផ្គរ រន្ទះ និងខ្យល់កន្ត្រាក់ក្នុងកម្រិតចាប់ពីតិចទៅបង្គួរ តាមបណ្ដាខេត្ដមួយចំនួន និងរាជធានីភ្នំពេញ ដែលអាចគ្របដណ្តប់លើផ្ទៃដីចាប់ពីពី ៣០% ទៅ ៦០%។
ក្រសួងបានបញ្ជាក់បន្តថា ចំណែកនៅតំបន់ខ្ពង់រាប មានសីតុណ្ហភាពអប្បបរមាពី២២-២៤°C និងសីតុណ្ហភាពអតិបរមាពី៣០-៣៤°C ហើយខ្យល់បក់មកពីទិសឦសាន និងទិសខាងកើតក្នុងល្បឿនពី១-៣ម៉ែត្រ/វិនាទី។ ដែលជាហេតុអាចនឹងមានភ្លៀងធ្លាក់ក្នុងកម្រិតចាប់ពីតិចទៅបង្គួរ លាយឡំផ្គរ រន្ទះ និងខ្យល់កន្ត្រាក់។ រីឯលើខេត្តត្បូងឃ្មុំ ខេត្តកំពង់ចាម ខេត្តក្រចេះ ខេត្តមណ្ឌលគិរី និងខេត្តរតនគិរី វិញ នឹងមានភ្លៀងធ្លាក់ក្នុងកម្រិតចាប់ពីតិចទៅមធ្យម ដែលអាចគ្របដណ្ដប់លើផ្ទៃដីពី ២០-៤០% ។ ចំពោះខេត្តព្រះវិហារ និងខេត្ដស្ទឹងត្រែង ដែលអាចមានភ្លៀងគ្របដណ្ដប់លើផ្ទៃដីចាប់ពី ១០% ទៅ ២០%។
ក្រសួងធនធានទឹក និងឧតុនិយម បញ្ជាក់ទៀតថា ដោយឡែក នៅតំបន់មាត់សមុទ្រ មានសីតុណ្ហភាពអប្បបរមាចាប់ពី២៤-២៦°C និងសីតុណ្ហភាពអតិបរមាពី៣០-៣២°C ហើយខ្យល់បក់មកពីទិសឦសាន ទិសខាងលិច និងទិសនិរតីក្នុងល្បឿនពី១-៣ម៉ែត្រ/វិនាទី។ ជាហេតុអាចនឹងមានភ្លៀងធ្លាក់ក្នុងកម្រិតចាប់ពីមធ្យមទៅបង្គួរ លាយឡំជាមួយផ្គរ រន្ទះ ដែលអាចគ្របដណ្តប់លើផ្ទៃដីចាប់ពី ៥០% ទៅ ៦០%។ ចំណែកនៅលើផ្ទៃសមុទ្រ អាចមានភ្លៀងធ្លាក់ក្នុងកម្រិតចាប់ពីតិចទៅបង្គួរ លាយឡំជាមួយផ្គរ រន្ទះ និងខ្យល់កន្ត្រាក់ ហើយខ្យល់បក់មកពីទិសពាយ័ព្យ និងទិសឦសានក្នុងល្បឿនពី១-៣ម៉ែត្រ/វិនាទី និងរលកសមុទ្រមានកម្ពស់ពី០,៥-១ម៉ែត្រ៕
ចែករំលែកព័តមាននេះ