រាជធានីភ្នំពេញ ៖ តារាស្រីវ័យក្មេងនាងជួប ស្រីពៅ ហៅណាណា បានអះអាងថា នាងនឹងមិនបោះបង់ចោលការងារសិល្បៈត្រឹមនេះឡើយ បើទោះបីជាមួយរយៈចុងក្រោយនេះ នាងបានបាត់មុខពីការងារសិល្បៈក៏ដោយ ខណៈពេលដែលការងារមួយនេះ គឺជាចំណង់ចំណូលចិត្តរបស់នាងតាំងពីតូច។
តារាស្រីសាច់.សខ្ចី ជួប ស្រីពៅ ហៅណាណា ត្រូវបានទស្សនិកជនស្គាល់ច្បាស់តាមរយៈការសម្តែងក្នុងបទចម្រៀងមានចំណងជើងថា «ឈឺឡើងលែងចង់ឈឺ» ដែលច្រៀងដោយតារាចម្រៀងលោក អាន គុណកូឡា និងបទ «អាម៉ៅនៅចាំអូន» ច្រៀងដោយនាយចឺម ។
ស្រីស្អាត ណា ណា បានលើកឡើងថា «នាងបានចូលប្រឡូកសិល្បៈដំបូងតាមរយៈការប្រឡងក្នុងកម្មវិធី Freshy girl ឆ្នាំ២០១១ ខណៈអំឡុងការប្រកួតនោះ នាងបានជាប់ត្រឹមគ្នា២០នាក់ប៉ុណ្ណោះ ពោលគឺមិនបានទទួលជ័យលាភីឡើយ »។
នាងបន្តថា «ក្រោយការចូលរួមប្រឡងនោះមក ក៏មានបណ្តាផលិតករនានាបានទាក់ទងមកនាង ដើម្បីថត MV ដោយរយៈពេលកន្លងមកនេះ នាងបានចូលរួមថតសម្តែងឲ្យបណ្តាផលិតធំៗមួយចំនួនដូចជា ៖ ផលិតកម្មហង្សមាស, ថោន, សាន់ដេ និងផលិតកម្ម M ជាដើម ។ល។ ជាមួយគ្នានេះផងដែរ នាងក៏បានថតស្ពតពាណិជកម្មនានាជាច្រើន ហើយសម្រាប់ការសម្តែងភាពយន្តវិញ នាងក៏ចូលរួមថតបានចំនួន២រឿងផងដែរ»។
ស្រីស្អាត ណា ណា បន្តទៀតថា «មួយរយៈនេះ នាងមិនសូវបានថតជាប់លាប់ដូចមុនឡើយ ដោយសារនាងកំពុងតែមានការមមាញឹកច្រើនលើការងារលក់អីវ៉ាន់តាមរយៈអនឡាញ ប៉ុន្តែយ៉ាងណា នាងក៏មិនបោះបង់អាជីពសិល្បៈនេះដែរ ព្រោះដោយសារនាងពិតជាស្រឡាញ់លើការងារនេះណាស់»។
ទោះបីជាយ៉ាងណា បើតាមស្រីស្អាត ណា ណា បញ្ជាក់ថា «ចាប់ពីពេលនេះទៅ នាងនឹងឆ្លៀតពេលឲ្យបានច្រើន ក្នុងការទទួលយកការថតឡើងវិញ ដើម្បីបន្ដបម្រើអារម្មណ៍ទស្សនិកជន ហើយនាងក៏អរគុណដល់ហ្វេនៗដែលនៅតែស្រឡាញ់ និងគាំទ្រដល់រូបនាង បើទោះបីជាមួយរយៈចុងក្រោយនេះ នាងមិនសូវបានចេញមុខក្នុងការសម្ដែងថ្មីៗក៏ដោយ»៕
ចែករំលែកព័តមាននេះ