រាជធានីភ្នំពេញ ៖ ខណៈក្រុមហ៊ុនបន្តពន្យារមិនយកថ្លៃសម្រាប់ការចុះឈ្មោះយកកាត សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងលើកទឹកចិត្តឲ្យបងប្អូនប្រជាពលរដ្ឋ ទៅបំពាក់ឧបករណ៍ ETC-OBU…
រាជធានីភ្នំពេញ ៖ ខណៈក្រុមហ៊ុនបន្តពន្យារមិនយកថ្លៃសម្រាប់ការចុះឈ្មោះយកកាត សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងលើកទឹកចិត្តឲ្យបងប្អូនប្រជាពលរដ្ឋ ទៅបំពាក់ឧបករណ៍ ETC-OBU ដើម្បីប្រើប្រាស់គន្លង ETC សម្រាប់ចេញចូលផ្លូវល្បឿនលឿន ភ្នំពេញ-ក្រុងព្រះសីហនុ ។
សម្ដេចធិបតី ហ៊ុន ម៉ាណែត បានថ្លែងក្នុងពិធីជួបសំណេះសំណាលជាមួយបងប្អូនកម្មករ និយោជិតជាង ១ម៉ឺន៥ពាន់នាក់ នៅខេត្តព្រះសីហនុ នាព្រឹកថ្ងៃទី៧ ខែវិច្ឆិកា ឆ្នាំ២០២៣ ៖ «ជាមួយខួប១ឆ្នាំ ខាងក្រុមហ៊ុន ក៏បានឯកភាពជាមួយរាជរដ្ឋាភិបាល ពេលដែលយើងបើក គឺក្រុមហ៊ុនគាត់គិត៨០% នៃ Fee ។ ប៉ុន្តែឥឡូវ រដ្ឋាភិបាលបានចរចា ក្រុមហ៊ុនក៏មានការយោគយល់ហើយសូមអរគុណដល់ក្រុមហ៊ុន ដែលគាត់ពន្យារការបង់ថ្លៃតាមប្រព័ន្ធ ERP តាមប្រព័ន្ធអេឡិចត្រូនិច គឺមិនដំឡើងទេ ១ឆ្នាំក្នុងពេលនេះ ហើយសម្រាប់បង់ជាលុយ ក្រុមហ៊ុនពន្យារ ៦ខែទៀត ហើយក្រៅពីហ្នឹង គាត់ឡើងបន្តិច» ។
សម្តេចធិបតី បានគូសបញ្ជាក់ថា ៖ «អ៊ីចឹងបងប្អូនទៅដាក់ពាក្យយក ERP តាមប្រព័ន្ធអេឡិចត្រូនិច ហ្នឹងស្រួលផង អេឡិចត្រូនិចហ្នឹង មិនបាច់ចាំ ខ្ញុំពេលខ្លះ ជិះមកមួយក្បួនហ្នឹង ពេលឡានមកដល់ហ្នឹង ទ្វារវាបើកស្រាប់ ព្រោះយើងបញ្ចូលកាតក្នុងហ្នឹង អត់ចាំបាច់ចាំយូរ បើអ្នកត្រូវបង់ត្រូវរង់ ចាំបន្តកន្ទុយគ្នា ខាតពេល ចឹងគឺ ១ឆ្នាំនេះ យើងមានកាដូថែមទៀត ឲ្យប្រជាពលរដ្ឋអ្នកប្រើប្រាស់» ។
សូមបញ្ជាក់ថា ETC ជាប្រព័ន្ធបង់ថ្លៃសេវាផ្លូវល្បឿនលឿនស្វ័យប្រវត្តិ ដែលប្រើប្រាស់ដោយបច្ចេកវិទ្យាទំនើបឥតខ្សែ តាមរយៈការបំពាក់ឧបករណ៍ OBU នៅលើកញ្ជក់ខាងមុខ នៃរថយន្ត។ រាល់រថយន្ត ដែលឆ្លងកាត់ច្រកបង់ប្រាក់ផ្លូវល្បឿនលឿនភ្នំពេញ-ក្រុងព្រះសីហនុ គឺពុំចាំបាច់ឈប់ ដើម្បីរង់ចាំទទួលកាតធ្វើដំណើរទៀតនោះឡើយ ។
សូមរំលឹកដែរថា នារសៀលថ្ងៃទី៧ វិច្ឆិកា ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា នឹងអញ្ជើញជាធិបតីក្នុងពិធី រៀបចំពិធីអបអរសាទរខួប ១ឆ្នាំ នៃការដាក់ឲ្យដំណើរការផ្លូវល្បឿនលឿន ភ្នំពេញ-ព្រះសីហនុ នៅទីតាំងស្ថានីយបង់ ប្រាក់ទី១ “ភ្នំពេញ” ៕
ចែករំលែកព័តមាននេះ