សម្តេចធិបតី ហ៊ុន ម៉ាណែត ៖ កម្ពុជាមិនជ្រើសរើសប្រទេសណា ជាសត្រូវនោះទេ
ខេត្តព្រះសីហនុ ៖ ថ្លែងចេញពីទឹកដីខេត្តព្រះសីហនុ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា ប្រទេសកម្ពុជា មិនបានជ្រើសរើសប្រទេសណា…
ខេត្តព្រះសីហនុ ៖ ថ្លែងចេញពីទឹកដីខេត្តព្រះសីហនុ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា ប្រទេសកម្ពុជា មិនបានជ្រើសរើសប្រទេសណា ជាសត្រូវនោះទេ ផ្ទុយទៅវិញ បើយកប្រទេសណាមួយជាសត្រូវនោះ នឹងវេទនាជាមិនខាន ។
ក្នុងជំនួបសំណេះសំណាលជាមួយកម្មករកម្មការរិនីជាង១ម៉ឺននាក់ នៅខេត្តព្រះសីហនុ សម្តេចធិបតី ហ៊ុន ម៉ាណែត បានគូសបញ្ជាក់យ៉ាងដូច្នេះថា ៖ “បើគ្មានសុខសន្តិភាពទេ បងប្អូនដឹងហើយប្រវត្តិសាស្ត្រ ដូចសម័យប៉ុលពត។ បើមានសង្គ្រាម គ្មានឱកាសកែប្រែធម្មជាតិ ទៅជាសក្តានុពលនោះឡើយ។ ដើម្បីមានឱកាសកែច្នៃគ្រាប់ពេជ្រឱ្យបានជាប្រយោជន៍ ត្រូវទាមទារចាំបាច់នូវសុខសន្តិភាព។ ដើម្បីច្នៃពេជ្រឱ្យមានតម្លៃ ក្រៅតែពីកត្តាសុខសន្តិភាពហើយនោះ ទាមទារឱ្យមានគោលនយោបាយច្បាស់លាស់” ។
សម្តេចធិបតី បានលើកឡើងថា ៖ នៅក្នុងអាណត្តិរាជរដ្ឋាភិបាល កន្លងមក ពិសេសអាណត្តិសម្តេចតេជោ បានដាក់ចេញទិសដៅនៅខេត្តព្រះសីហនុ ជាតំបន់ឧស្សាហកម្មទេសចរណ៍ ។
សម្តេចធិបតី នាយករដ្ឋមន្ត្រី បានលើកឡើងទៀតថា រាជរដ្ឋាភិបាល បានដាក់ចេញគោលនយោបាយ មានការបែងចែកច្រើន តែក្នុងមានចំនួនបី សំខាន់ គឺ ៖
ទី១. គោលនយោបាយបញ្ចប់សង្គ្រាមតាមរយះនយោបាយឈ្នះឈ្នះ
ទី២. គោលនយោបាយសេដ្ឋកិច្ចបើកចំហ ដោយវិនិយោគផលឲ្យប្រជាពលរដ្ឋ
និងទី៣. នយោបាយការទូត ។
សម្តេចធិបតី បានគូសបញ្ជាក់ថា ៖ “យើងមិនយកប្រទេសណា ជាសត្រូវនោះទេ យើងស្វាគមន៍ទាំងអស់ អ៊ីចឹងបានជាខេត្តព្រះសីហនុ មានទាំងអ្នកវិនិយោគ មកពីចិន ជប៉ុន, អឺរ៉ុប, អាមេរិក ជាដើម” ។
ជាមួយគ្នានោះដែរ សម្តេចធិបតី នាយករដ្ឋមន្ត្រី ក៏បានលើកឡើងថា មានអ្នកខ្លះ មិនទាន់បានកាន់អំណាចផង គឺថាជេរប្រទេសនោះ កាន់យកប្រទេសនេះ តែបើយើងប្រកាន់យកប្រទេសណាមួយនោះ យើងនឹងវេទនា ជាមិនខាន ។
សម្តេចធិបតី បានអះអាងថា នយោបាយការទូតពិតជាសំខាន់ណាស់ ព្រោះថា កម្ពុជាបាននាំផលិតទៅកាន់អឺរ៉ុប, អាហ្វ្រិក, ចិន,មជ្ឈិមបូព៌ា, អាស៊ានយើងអត់យកប្រទេសណាជាសត្រូវទេ។ ប្រជាពលរដ្ឋ ចេញទៅរៀន នៅក្រៅប្រទេស ហើយគាត់បានមកលេងកម្ពុជាផងដែរ ។
ក្នុងឱកាសនោះដែរ សម្ដេចធិបតី ហ៊ុន ម៉ាណែត នាយករដ្ឋមន្ដ្រី នៃកម្ពុជា បានថ្លែងប្រកាសថា នាពេលបច្ចុប្បន្ននេះ ប្រទេសកម្ពុជា មានលទ្ធភាពជាច្រើន ក្នុងការផលិតផ្គត់ផ្គង់ដោយផ្ទាល់ខ្លួនឯង និងនាំចេញទៅក្រៅប្រទេសផងដែរ ។
សម្ដេចធិបតី ហ៊ុន ម៉ាណែត បានរំលឹកថា ចាប់តាំងពី១៩៧៩មក កម្ពុជាបានពឹងផ្អែកជំនួយបរទេសជាច្រើន ហើយសុខភាពប្រជាពលរដ្ឋ ក៏ជួបការលំបាក ជាពិសេសទៀតនោះ គោលនយោបាយ ក៏ត្រូវបំផ្លាញនៅសល់តែគ្រាប់មីន ពេញផ្ទៃដី ។
សម្ដេចធិបតី មានប្រសាសន៍ថា ៖ «ឥឡូវ យើងមានលទ្ធភាពម្ចាស់ការខ្លួនឯងជាច្រើន ហើយយើងមានសមត្ថភាពផលិត ផ្គត់ផ្គង់ផ្ទៃក្នុងរបស់យើងមានច្រើន។ ឆ្នាំ១៩៧៩ ឬ១៩៨០ យើងនាំអង្ករ នាំសម្ភារៈ និងស្បៀងមួយចំនួនទៀត នាំចូលមកកម្ពុជា។ ឥឡូវយើងផលិតខ្លួនឯង ហើយផលិតនាំចេញទៅទៀត» ។
ទន្ទឹមនឹងនេះ សម្ដេចធិបតី ក៏បានរំលឹកទៀតថា កាលពីឆ្នាំ១៩៩៤ សូម្បី ទឹកក្រូច ក៏នាំចូលមកកម្ពុជាដែរ ប៉ុន្ដែនាពេលបច្ចុប្បន្ននេះ នៅកម្ពុជាមានរោងចក្រផលិតទឹកក្រូច នៅខេត្តព្រះសីហនុ ៕
ចែករំលែកព័តមាននេះ