តារាសម្តែងលោក ប៊ុន លីម៉ា មួយរយៈចុងក្រោយនេះ ត្រូវបានគេមើលឃើញថា លោកកំពុងតែកាក់កបគួរសម ទាំងការងារសិល្បៈ និងមុខរបរផ្ទាល់ខ្លួន ក្នុងពេលដែលតារាប្រុសរូបនេះ បានព្យាយាមតស៊ូលើវិថីសិល្បៈរបស់ខ្លួនអស់ជាច្រើនឆ្នាំមកនេះ
រាជធានីភ្នំពេញ ៖ តារាសម្តែងលោក ប៊ុន លីម៉ា មួយរយៈចុងក្រោយនេះ ត្រូវបានគេមើលឃើញថា លោកកំពុងតែកាក់កបគួរសម ទាំងការងារសិល្បៈ និងមុខរបរផ្ទាល់ខ្លួន ក្នុងពេលដែលតារាប្រុសរូបនេះ បានព្យាយាមតស៊ូលើវិថីសិល្បៈរបស់ខ្លួនអស់ជាច្រើនឆ្នាំមកនេះ។
អតីត Freshy boy ឆ្នាំ២០០៨ លោក ប៊ុន លី បានលើកឡើងថា «បច្ចុប្បន្ន លោកពិតជាទទួលបានការងារសម្ដែងច្រើន ហើយក៏កំពុងរវល់ខ្លាំងជាមួយអាជីវកម្មផ្ទាល់ខ្លួនដែរ គឺភោជនីយដ្ឋានមួយនៅរាជធានីភ្នំពេញ»។
លោកបញ្ជាក់ថា «សម្រាប់ការងារទាំង២ខាងលើនេះ គឺអាចនិយាយបានថា កំពុងតែមានភាពរលូនទៅមុខ ហើយក៏ត្រូវតែឆ្លៀតពេលវេលាឲ្យបានគ្រប់គ្រាន់សម្រាប់ការងារទាំងអស់នោះ ព្រោះការងារទាំង២នេះ គឺជាការងារដែលលោកស្រឡាញ់ និងចូលចិត្ត»។
លោកថា «កន្លងមក ភាពយន្តដែលលោកធ្លាប់សម្តែងមានដូចជា ៖ រឿង «ត.ណ្ហា» រឿង «ព្រោះតែស្រី» និងរឿង «ប្រពន្ធដើមក្លាយជាប្រពន្ធចុង» បានអង្រួនបេះដូងអ្នកទស្សនារាប់លាននាក់ ឲ្យមើលស្លុង និងពេលខ្លះឈឺចាប់ជំនួសតួស្រី ដែលលោកធ្វើបាបនៅក្នុងសាច់រឿង»។
លោកបន្តថា «មួយផ្នែកដែលលោកអាចមានការចាប់អារម្មណ៍ពីមហាជនទទួលស្គាល់នោះ គឺតាមរយៈតួអង្គឡូយឆាយ ខិ.លខូ.ច ដែលតួអង្គមួយនេះ លោកតែងតែត្រូវបានផលិតករដាក់ឲ្យលោកសម្តែងជានិច្ច ព្រោះលោកអាចសម្តែងបានល្អ និងត្រូវរូបរាង មុខមាត់លោកផងដែរ»។
យ៉ាងណា បើតាមលោក ប៊ុន លីម៉ា ថា «បើទោះបីជា លោកតែងតែដើរតួរខិ.លខូ.ចក្នុងសាច់រឿងក៏ពិតមែន ប៉ុន្តែធាតុពិតខាងក្រៅ គឺរូបលោកមិនអញ្ចឹងឡើយ ពោលគឺលោកជាមនុស្សសាមញ្ញម្នាក់ និងមិនកោងកាចដាក់អ្នកណាឡើយ ក្នុងពេលដែលលោកក៏មានសមត្ថភាពនៅក្នុងការរកស៊ីម្នាក់ផងដែរ ក្រៅពីមានទេពកោសល្យខាងវិស័យសិល្បៈ»។
គួរបញ្ជាក់ផងដែរថា តារាសម្តែង ប៊ុន លីម៉ា បានឈានជើងចូលប្រឡូកក្នុងសិល្បៈ តាមរយៈការដាក់ពាក្យចូលប្រឡងប្រកួតប្រជែងក្នុងកម្មវិធី «Freshie Girls & Boys ឆ្នាំ២០០៨» ដែលមានបេក្ខជន ចូលរួមប្រកួតប្រជែងរាប់ពាន់នាក់ ។ នៅក្នុងការប្រឡងកម្មវិធីនោះ តារាសម្តែងវ័យក្មេងសាច់សស្រស់សង្ហា ប៊ុន លីម៉ា មិនបានទទួលជ័យលាភីនោះទេ គឺគ្រាន់តែបានបង្ហាញវត្តមានត្រឹមតែវគ្គពាក់កណ្តាល ផ្តាច់ព្រ័ត្តតែប៉ុណ្ណោះ ។
យ៉ាងណា បើទោះជាមិនទទួលបានជ័យលាភីក្នុងកម្មវិធី «Freshie Girls & Boys ឆ្នាំ២០០៨» ក្តី ប៉ុន្តែលោក ប៊ុន លីម៉ា ក៏មិនបានបោះបង់ឱកាសសិល្បៈចោលឡើយ ពោលគឺលោកកាន់តែចូលជិតអាជីពមួយនេះកាន់តែខ្លាំងឡើង រហូតដល់មានក្រុមហ៊ុន និងបណ្តាផលិតកម្មធំៗទាក់ទងលោកឲ្យសម្តែង រហូតមកទល់នាពេលនេះ៕
ចែករំលែកព័តមាននេះ