ខេត្តបន្ទាយមានជ័យ ៖ នៅក្នុងរដូវធ្លាក់ខ្យល់ទឹកស្រក មានប្រជាពលរដ្ឋនាំគ្នាមកនេសាទត្រី មានការបង់សំណាញ់ និងបោយត្រីតាមមុខសំណង់ទ្វារទឹក ដែលពួកគាត់កំពុងរកបានច្រើនដែរ គិតត្រឹមថ្ងៃទី៣១ តុលា ឆ្នាំ២០២៣ នៅស្រុកមង្គលបូរី ។
ប្រជាពលរដ្ឋបានប្រាប់ថា នៅសំណង់ពោធិ៍២ដើម ឃុំរហាត់ទឹក នៅពេលទឹកស្រកធ្លាក់ខ្យល់ប្រជាពលរដ្ឋជិតឆ្ងាយបាននាំគ្នាមករកនេសាទត្រី ភាគច្រើនបោយត្រីនៅមុខសំណង់ផ្នែកខាងក្រោយ នៅពេលត្រីសម្រុកឡើង ទឹករកបាន១ថ្ងៃបានជាមធ្យម៥ ទៅ១០គីឡូក្រាម ។
ប្រជាពលរដ្ឋបានបញ្ជាក់ថា នៅពេលធា្លក់ខ្យល់រយៈពេល១ទៅ២ថ្ងៃនេះ គាត់អាចបោយត្រីបានខ្លះ តែមិនទាន់រកបានច្រើននៅឡើយទេ ព្រោះទឹកនៅច្រើនអាចនៅដើមខែវិច្ឆិកា រយៈពេល១ខែពេញដែលអាចរកត្រីនៅមុខសំណង់ពោធិ៍២ដើម ឃុំរហាត់ទឹកបាន តែពេលនេះអាចរកបានខ្លះ បោយត្រីបង់សំណាញ់ប្រយ៉ុងមិនទាន់បាននៅឡើយទេ ។
ដោយឡែក នៅស្ពានប្រឡាយមេឃុំគោបល័ង្គ ស្រុកមង្គលបូរីវិញ ឃើញប្រជាពលរដ្ឋកំពុងរកត្រីបានជាបណ្តើៗហើយ ដូចជានេសាទបង់សំណាញ់ប្រយ៉ុង និងបោយត្រីមុខស្ពានទឹកហូរ១ថ្ងៃ អាចរកបាន១០ទៅ១៥គីឡូក្រាម ភាគច្រើនត្រីរៀល និងត្រី.ស លក់បាន១គីឡូក្រាមតំលៃ៥,០០០រៀល ទៅ៦,០០០រៀល ។
លោក ឡុញ វុទ្ធី នាយខណ្ឌរដ្ឋបាលជលផលបន្ទាយមានជ័យបានប្រាប់ថា នៅខេត្តបន្ទាយមានជ័យនៅពេលមានទឹកជំនន់ធំនៅពេលទឹកស្រក និងមានធ្លាក់ខ្យល់ប្រជានេសាទរកត្រីបាន សម្រាប់ជីវភាពគ្រួសារបាន ងាយស្រួលទំនេរពីធ្វើស្រែ និងចម្ការដែលរកត្រីបាននៅរដូវនេះមានបង់សំណាញ់ប្រយ៉ុង និងបោយត្រី នៅមុខស្ពាននិងសំណង់ដែលមានទឹកហូរត្រីច្រាលឡើងទឹក ទើបរកបាននៅរយៈពេល១ខែពេញ ។
ចែករំលែកព័តមាននេះ