ប្រធានគណៈកម្មាធិការសិទ្ធិមនុស្សកម្ពុជា លោកទេសរដ្ឋមន្ត្រី កែវ រ៉េមី បានបង្ហាញពីលទ្ធផលជាវិជ្ជមានក្នុងជំនួបដោះស្រាយដោយផ្ទាល់ជាមួយនាយ ក្រឹម ចំពោះការលើកឡើងរបស់តារាកំប្លែងរូបនេះ ក្នុងន័យរើសអើងអ្នកស្រឡាញ់ភេ.ទដូចគ្នា (ភេ.ទទី៣) នៅក្នុងកម្មវិធីមួយ ដែលករណីនេះ
រាជធានីភ្នំពេញ ៖ ប្រធានគណៈកម្មាធិការសិទ្ធិមនុស្សកម្ពុជា លោកទេសរដ្ឋមន្ត្រី កែវ រ៉េមី បានបង្ហាញពីលទ្ធផលជាវិជ្ជមានក្នុងជំនួបដោះស្រាយដោយផ្ទាល់ជាមួយនាយ ក្រឹម ចំពោះការលើកឡើងរបស់តារាកំប្លែងរូបនេះ ក្នុងន័យរើសអើងអ្នកស្រឡាញ់ភេ.ទដូចគ្នា (ភេ.ទទី៣) នៅក្នុងកម្មវិធីមួយ ដែលករណីនេះ បានធ្វើឲ្យមហាជនមួយចំនួន ព្រមទាំងអ្នកសិល្បៈផងដែរ បាននាំគ្នាផ្ទុះប្រតិកម្មពេញបណ្តាញសង្គមហ្វេសប៊ុក ។
លោកទេសរដ្ឋមន្ត្រី កែវ រ៉េមមី បានបង្ហោះសារខ្លីមួយ ក្រោយជំនួបជាមួយនាយ ក្រឹម និងភាគីពាក់ព័ន្ធ ដែលធ្វើឡើងកាលពីថ្ងៃទី៣១ ខែតុលា ឆ្នាំ២០២៣នេះថា «ក្រោយពីបានជួបជជែកគ្នាទាំងសងខាង គណៈកម្មាធិការសិទ្ធិមនុស្សកម្ពុជាទទួលបាននូវលទ្ធផលជាវិជ្ជាមាន។ ខ្លឹមសារនឹងមានការផ្សព្វផ្សាយតាមរយៈវីដេអូខ្លី។ សូមអរគុណ លោកជំទាវ ចន ចន្ទ័លក្ខិណា ប្រធានសមាគមសិល្បករខ្មែរ បានជួយអន្តរាគមន៍ និងអរគុណជាអនេកជូន លោក អ៊ូ ប៊ុណ្ណារ៉ាត់ និងក្មួយ ណុប ដាណេ ដែលបានចូលរួមដោះស្រាយ ដើម្បីសុខដុមក្នុងសង្គមជាតិយើង»។
ជាការកត់សម្គាល់ ជំនួបដោះស្រាយបញ្ហាខាងលើនេះ បានធ្វើឡើងបន្ទាប់ពីសហគមន៍ឥន្ទធនូកម្ពុជា (រ៉ក់) កាលពីថ្ងៃទី២៩ ខែតុលា ឆ្នាំ២០២៣ បានផ្ញើលិខិតទៅកាន់លោកទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា ជាមួយកម្មវត្ថុ គោរពស្នើសុំឲ្យជួយអន្តរាគមន៍អញ្ជើញតារាកំប្លែងជើងចាស់ នាយក្រឹម ទៅ «ជជែកពិភាក្សាពាក់ព័ន្ធករណី និងបំភ្លឺចំពោះមតិយោបល់របស់គាត់ ដែលធ្វើឱ្យប៉ះពាល់ដល់សិទ្ធិ និងសេចក្តីថ្លៃថ្នូររបស់អ្នកស្រលាញ់ភេ.ទដូចគ្នា»។
ប្រធានសម្របសម្រួលអង្គការ សហគមន៍ឥន្ទធនូកម្ពុជា បានបញ្ជាក់ក្នុងលិខិតជូនទៅលោកទេសរដ្ឋមន្ត្រី កែវ រ៉េមី ថា អង្គការសហគមន៍ឥន្ទធនូកម្ពុជា (រ៉ក់) បានទស្សនានូវវីដេអូនៃការប្រឡងរបស់បេក្ខជនមួយរូប នៅក្នុងកម្មវិធី «Cambodia’s Got Talent» រដូវកាលទី៣ កាលពីរាត្រីថ្ងៃសៅរ៍ ទី២៨ ខែតុលា ឆ្នាំ២០២៣ នៅលើទំព័រហ្វេសប៊ុក របស់ Cambodia’s Got Talent និងទូរទស្សន៍ហង្សមាស ។ ក្នុងនោះផងដែរ លោកពូក្រឹម ដែលជាគណៈកម្មករមួយរូបបានបញ្ចេញមតិដែលមានលក្ខណៈរើសអើង និងធ្វើឱ្យប៉ះពាល់សិទ្ធិ និងសេចក្តីថ្លៃថ្នូររបស់បេក្ខជនរូបនោះផ្ទាល់ ក៏ដូចជាដល់បុគ្គល និងសហគមន៍អ្នកស្រឡាញ់ភេ.ទដូចគ្នានៅក្នុងប្រទេសកម្ពុជាដទៃទៀតផងដែរ។
សហគមន៍យើងខ្ញុំពិតជាមានការភ្ញាក់ផ្អើលយ៉ាងខ្លាំង ក្រោយពីបានស្ដាប់ និងឃើញមតិយោបល់របស់លោកព្រូក្រឹម នៅក្នុងកម្មវិធីលំដាប់ពិភពលោកដែលចាក់ផ្សាយជាសាធារណៈនៅតាមប្រព័ន្ធផ្សព្វផ្សាយជាច្រើនដែលមានទស្សនិកជនគ្រប់វ័យទស្សនា ។ យោបល់យល់ឃើញរបស់លោកពូក្រឹម អាចបង្កើតឱ្យមានការភាន់ច្រឡំដល់សាធារណមតិជំរុញការរើសអើង ប៉ះពាល់សេចក្តីថ្លៃថ្នូរ ជាពិសេសសុខភាពផ្លូវចិត្តរបស់បុគ្គល និងសហគមន៍អ្នកស្រឡាញ់ភេ.ទដូចគ្នាយ៉ាងធ្ងន់ធ្ងរ។
ដោយមានក្ដីបារម្ភពីទំហំនៃផលប៉ះពាល់តាមរយៈពាក្យសម្ដីរបស់សិល្បករ និងជាបុគ្គលសាធារណៈដូចជា លោកពូក្រឹម ចំពោះសហគមន៍អ្នកស្រឡាញ់ភេ.ទដូចគ្នានៅក្នុងប្រទេសកម្ពុជា អង្គការសហគមន៍ឥន្ទធនូកម្ពុជា សូមគោរពស្នើសុំអន្តរាគមន៍ពី ឯកឧត្តមទេសរដ្ឋមន្ត្រី ក្នុងនាមប្រធានគណៈកម្មាធិការសិទ្ធិមនុស្សកម្ពុជា ដែលជាសេនាធិការរបស់រាជរដ្ឋាភិបាលកម្ពុជា ធ្វើការលើកកម្ពស់ការគោរពសិទ្ធិមនុស្ស អប់រំផ្សព្វផ្សាយ និងអំពាវនាវឱ្យលុបបំបាត់នូវរាល់ទម្រង់នៃការរើសអើងលើអ្នកស្រឡាញ់ភេ.ទដូចគ្នា ។
សូមបញ្ជាក់ផងដែរថា មហាជន និងអ្នកសិល្បៈមួយចំនួនបានសម្តែងការមិនសប្បាយចិត្ត និងផ្ទុះប្រតិកម្ម ក្រោយតារាកំប្លែងចាស់វស្សានាយ ក្រឹម ដែលជាគណៈកម្មការមួយរូបនៃកម្មវិធី «Cambodia’s Got Talent» រដូវកាលទី៣ កាលពីយប់ថ្ងៃសៅរ៍ ទី២៨ ខែតុលា ឆ្នាំ២០២៣ បានលើកឡើងទៅកាន់បេក្ខភាពប្រឡងអ្នកស្រឡាញ់ភេ.ទដូចគ្នា (ភេ.ទទី៣) ណុប ដាណេ ថា «ចិត្តខ្ញុំក៏មិនចង់ឲ្យមានក្រុមអ្នកស្រឡាញ់ភេ.ទដូចគ្នា (ក្រុមភេ.ទទី៣) ច្រើនដែរ មានប៉ុន្មាន ប៉ុណ្ណឹងចុះ កុំឲ្យលើស ព្រោះបាត់ធនធានមនុស្ស»។
គួររំលឹកថា ៖ ផ្ទុះប្រតិកម្មទៅលើនាយ ក្រឹម ចំពោះការបង្ហាញទស្សនៈរើសអើងអ្នកស្រឡាញ់ភេ.ទដូចគ្នា (វីដេអូ) ។ គួររំលឹកទៀតថា ៖ នុះ! រឿងនាយក្រឹមរើសអើងអ្នកស្រឡាញ់ភេ.ទដូចគ្នា ត្រូវសហគមន៍រ៉ក់ ធ្វើលិខិតទៅឯកឧត្តម កែវ រ៉េមី ហើយ (វីដេអូ) ៕
ចែករំលែកព័តមាននេះ