ក្រសួងធនធានទឹក និងឧតុនិយម បានបញ្ជាក់ប្រាប់ឱ្យដឹងថា នៅតំបន់មួយចំនួនរបស់កម្ពុជា នឹងបន្តមានភ្លៀងធ្លាក់លាយឡំផ្គរ រន្ទះ និងខ្យល់កន្ត្រាក់ ចាប់ពីថ្ងៃទី២៤ រហូតដល់ថ្ងៃទី
រាជធានីភ្នំពេញ ៖ ក្រសួងធនធានទឹក និងឧតុនិយម បានបញ្ជាក់ប្រាប់ឱ្យដឹងថា នៅតំបន់មួយចំនួនរបស់កម្ពុជា នឹងបន្តមានភ្លៀងធ្លាក់លាយឡំផ្គរ រន្ទះ និងខ្យល់កន្ត្រាក់ ចាប់ពីថ្ងៃទី២៤ រហូតដល់ថ្ងៃទី២៨ ខែតុលា ឆ្នាំ២០២៣ ដែលមានទឹកភ្លៀងធ្លាក់ចាប់ពី៥០% រហូតដល់៦០%។
យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយម នៅព្រឹកថ្ងៃទី២៤ ខែតុលា ឆ្នាំ២០២៣នេះ បានប្រាប់ឱ្យដឹងថា ព្រះរាជាណាចក្រកម្ពុជា ទទួលរងឥទ្ធិពលពីប្រព័ន្ធសម្ពាធទាប ដែលអូសបន្លាយពីភាគកណ្ដាលប្រទេសថៃ ទៅសមុទ្រចិនខាងត្បូង ឆ្លងកាត់មកពីលើប្រទេសកម្ពុជា។ ក្នុងអំឡុងពេលនេះ ខ្យល់មូសុងនិរតី បានបង្កើនកម្លាំងបក់មកលើសមុទ្រអាន់ដាមែន (Andaman Sea) និងឈូងសមុទ្រថៃ។
ក្រសួងធនធានទឹក និងឧតុនិយម បានលើកឡើងថា ខណៈពេលនេះ មានលំហូរខ្យល់បក់ពីទិសខាងត្បូង នាំមកជាមួយនូវសំណើមពីឈូងសមុទ្រថៃ មកលើតំបន់ឆ្នេរ ស្របពេលដែលលំហូរខ្យល់បក់មកពីទិសខាងកើត និងទិសអាគ្នេយ៍ នាំមកជាមួយសំណើមពីសមុទ្រចិនខាងត្បូង មកលើប្រទេសកម្ពុជា។
ជាមួយគ្នានោះដែរ ក្រសួងធនធានទឹក និងឧតុនិយម ក៏បានលើកឡើងបន្តថា ស្ថានភាពបែបនេះ នឹងធ្វើឱ្យចាប់ពីថ្ងៃទី២៤ រហូតដល់ថ្ងៃទី២៨ ខែតុលា តាមបណ្ដាខេត្តមួយចំនួន នៅតំបន់មាត់សមុទ្រ និងបណ្តាខេត្តមួយចំនួនទៀតក្នុងតំបន់ទំនាបកណ្តាល រួមទាំងរាជធានីភ្នំពេញផងដែរ នឹងមានភ្លៀងធ្លាក់ក្នុងកម្រិតបង្គួរ លាយឡំជាមួយផ្គរ រន្ទះ និងខ្យល់កន្ត្រាក់ ដែលគ្របដណ្ដប់មកលើផ្ទៃដី ចាប់ពីពី ៥០% ទៅ ៦០%។
ក្រសួងធនធានទឹក និងឧតុនិយម បានបន្ថែមទៀតថា ដោយឡែកនៅបណ្ដាខេត្តមួយចំនួនក្នុងតំបន់ខ្ពង់រាប នឹងមានភ្លៀងធ្លាក់ក្នុងកម្រិតចាប់ពីមធ្យមទៅបង្គួរ គ្របដណ្តប់លើផ្ទៃដី ចាប់ពី ៤០% ទៅ ៥០%។
ហើយក្នុងសេចក្តីជូនដំណឹងក្រសួងធនធានទឹក និងឧតុនិយម ក៏បានអំពាវនាវដល់ប្រជាពលរដ្ឋត្រូវមានការប្រុងប្រយ័ត្នខ្ពស់ចំពោះស្ថានភាពធាតុអាកាសនេះ ដែលអាចបង្កជាជំនន់ទឹកភ្លៀងដោយជាយថាហេតុ៕
ចែករំលែកព័តមាននេះ