វៀតណាម នឹងចុះកិច្ចព្រមព្រៀងពាណិជ្ជកម្មអង្ករជាមួយឥណ្ឌូនេស៊ី និងហ្វីលីពីន
វៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានប្រកាសថា
វៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានប្រកាសថា ប្រទេសវៀតណាមនឹងចុះហត្ថលេខាលើកិច្ចព្រមព្រៀងនាំចេញអង្ករជាមួយនឹងប្រទេសឥណ្ឌូនេស៊ី និងហ្វីលីពីន។ នេះបើយោងតាមប្រភពពីសារព័ត៌មាន VnExpress ចេញផ្សាយកាលពីថ្ងៃទី២១ ខែតុលា ឆ្នាំ២០២៣។
នាយករដ្ឋមន្ត្រីវៀតណាម បានលើកឡើងនៅក្នុងកិច្ចប្រជុំដាច់ដោយឡែកពីគ្នាជាមួយនឹងលោក ចូកូ វីដូដូ (Joko Widodo) ប្រធានាធិបតីឥណ្ឌូនេស៊ី និងលោក ហ្វឺឌីណាន់ ម៉ាកូស ជូនៀ (Ferdinand Marcos Jr.) ប្រធានាធិបតីហ្វីលីពីន នៅក្រៅកិច្ចប្រជុំកំពូលក្រុមប្រឹក្សាសហប្រតិបត្តិការអាស៊ាន-ឈូងសមុទ្រនៅអារ៉ាប៊ីសាអូឌីត កាលពីថ្ងៃទី២០ ខែតុលា ឆ្នាំ២០២៣ យ៉ាងដច្នេះថា ក្រសួង និងវិស័យពាក់ព័ន្ធនឹងត្រូវបានជំរុញឱ្យពន្លឿនលើការចុះហត្ថលេខាដ៏សំខាន់មួយនេះ។
ប្រទេសហ្វីលីពីន ដែលជាទីផ្សារអង្ករដ៏ធំបំផុតរបស់វៀតណាម បានចាប់ផ្តើមការទិញសារជាថ្មីម្តងទៀត បន្ទាប់ពីការផ្អាកជិត១ខែ ដោយសារតែការដាក់កម្រិតតម្លៃនៅក្នុងស្រុករបស់ខ្លួន។ កាលពីថ្ងៃទី៤ ខែតុលា ប្រទេសហ្វីលីពីនបានដំឡើងតម្លៃពិដានសម្រាប់ប្រភេទអង្ករធម្មតា និងប្រភេទអង្ករល្អ។ នៅក្នុងរយៈពេល៩ខែដំបូងនៃឆ្នាំនេះ ប្រទេសវៀតណាមបាននាំចេញគ្រាប់ធញ្ញជាតិចំនួន ២.៤លានតោនដែលមានតម្លៃជិត ១.៥ពាន់លានដុល្លារអាមេរិកទៅកាន់ប្រទេសហ្វីលីពីន ដែលជាចំនួនចុងក្រោយតំណាងឱ្យការកើនឡើង ២០% ពីមួយឆ្នាំទៅមួយឆ្នាំ។
កាលពីដើមឆ្នាំនេះ ប្រទេសឥណ្ឌូនេស៊ី បានអញ្ជើញការដេញថ្លៃសម្រាប់ការផ្គត់ផ្គង់អង្ករ៥០ម៉ឺនតោន ដោយនៅក្នុងនោះរួមទាំងប្រទេសវៀតណាមផងដែរ។ ឥណ្ឌូនេស៊ីបាននាំចូលអង្គរចំនួន ៨៧១,០០០តោនពីវៀតណាមក្នុងរយៈពេល៩ខែដំបូងនៃឆ្នាំនេះ ពោលគឺច្រើនជាង១៦ដងនៃបរិមាណក្នុងរយៈពេលដូចគ្នា កាលពីឆ្នាំមុន។
យោងតាមទិន្នន័យពីក្រសួងកសិកម្ម និងអភិវឌ្ឍន៍ជនបទវៀតណាមបានបង្ហាញថា ប្រទេសវៀតណាមរកចំណូលបានជិត ៣.៧ពាន់លានដុល្លារពីការនាំចេញអង្ករ នៅក្នុងរយៈពេល៩ខែដំបូងនៃឆ្នាំនេះ ពោលគឺកើនឡើង ៤០.៤%។ តម្លៃអង្ករជាមធ្យមកើនឡើង ១៤% នៅតម្លៃ ៥៥៣ដុល្លារក្នុងមួយតោន ដែលម្តងម្កាលឡើងដល់ជិតដល់ ៦៥០ដុល្លារ ។
ជាមួយគ្នានោះផងដែរ ក្រៅពីការនាំចូលអង្ករ នាយករដ្ឋមន្ត្រីវៀតណាម និងប្រធានាធិបតីហ្វីលីពីន ក៏បានយល់ស្របថា ប្រទេសទាំងពីរ គួរតែបង្កើតលក្ខខណ្ឌអំណោយផលសម្រាប់ការបង្កើនពាណិជ្ជកម្មទ្វេភាគី ដើម្បីឈានដល់ ១០ពាន់លានដុល្លារក្នុងពេលឆាប់ៗនេះ។ បន្ថែមលើសពីនេះទៀត នាយករដ្ឋមន្ត្រីវៀតណាម និងប្រធានាធិបតីឥណ្ឌូនេស៊ីក៏បានសន្យាថា នឹងបង្កើនពាណិជ្ជកម្មកសិផល និងជំរុញការផ្តល់សច្ចាប័នមុនកាលកំណត់នៃកិច្ចព្រមព្រៀងរវាងរដ្ឋាភិបាលទាំងពីរ សម្រាប់ការកំណត់តំបន់សេដ្ឋកិច្ចផ្តាច់មុខរវាងគ្នា៕
ចែករំលែកព័តមាននេះ