ខេត្តមណ្ឌលគិរី ៖ សមត្ថកិច្ចចាប់ខ្លួនពិរុទ្ធជនម្នាក់ក្នុងចំណោម៩នាក់កាលពីថ្ងៃទី១៨ តុលា ២០២៣ ក្នុងសំណុំរឿងដីព្រៃ«ដំណាក់ឥន្ទ្រី» ដែលបានរត់គេចខ្លួនអស់ជាច្រើនឆ្នាំ ក្រោយត្រូវសាលាដំបូងខេត្តក្រចេះសម្រេចផ្តន្ទាទោសដាក់ពន្ធនាគារ ចាប់ពី៥ឆ្នាំ ទៅ៨ឆ្នាំ…
ខេត្តមណ្ឌលគិរី ៖ សមត្ថកិច្ចចាប់ខ្លួនពិរុទ្ធជនម្នាក់ក្នុងចំណោម៩នាក់កាលពីថ្ងៃទី១៨ តុលា ២០២៣ ក្នុងសំណុំរឿងដីព្រៃ«ដំណាក់ឥន្ទ្រី» ដែលបានរត់គេចខ្លួនអស់ជាច្រើនឆ្នាំ ក្រោយត្រូវសាលាដំបូងខេត្តក្រចេះសម្រេចផ្តន្ទាទោសដាក់ពន្ធនាគារ ចាប់ពី៥ឆ្នាំ ទៅ៨ឆ្នាំ ។ កាលនោះ ក៏មានមន្ត្រីជំនាញចំនួន៤នាក់ផ្សេងទៀតត្រូវផ្តន្ទាទោសដាក់ពន្ធនាគារម្នាក់ៗមួយឆ្នាំ តែត្រូវព្យួរទោសក្នុងបទចោទ «កាប់គាស់រុករានដីព្រៃ ឆ្ការព្រៃ និងឈូសឆាយដីព្រៃ ដើម្បីយកដីជាកម្មសិទ្ធិ» បទល្មើសរំលោភយកដីព្រៃនេះ បានប្រព្រឹត្តនៅចំណុចភ្នំរហាំ ឬភ្នំក្បាលខ្មោច ដែលគេដាក់ឈ្មោះ «ដំណាក់ឥន្ទ្រី» ក្នុងភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី កាលពីថ្ងៃទី៩ ខែកញ្ញា ឆ្នាំ២០២០ ។
យោងតាមរបាយការណ៍របស់សមត្ថកិច្ចបានឲ្យដឹងថា ការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តមណ្ឌលគិរីចូលរួមដោយកម្លាំងអធិការដ្ឋាននគរបាលស្រុកពេជ្រាដាបានចុះអនុវត្តដីកាបង្គាប់ឲ្យចាប់ខ្លួនចុះថ្ងៃទី១៤ កក្កដា ២០២១ របស់លោកលឹម មករន្ទ ប្រធានក្រុមប្រឹក្សាជំនុំជម្រះ នៃសាលាដំបូងខេត្តក្រចេះលើឈ្មោះ សារឿន ម៉ាប់ ហៅ ម៉ាប់ប៊ូស្រា ភេទប្រុស អាយុ៤២ឆ្នាំ ជនជាតិខ្មែរ ទីកន្លែងកំណើតនៅភូមិពូរាំង ឃុំប៊ូស្រា ស្រុកពេជ្រាដា ខេត្តមណ្ឌលគិរី ពីបទ កាប់គាស់រុករានដីព្រៃ ឆ្ការព្រៃនិងឈូសឆាយដីព្រៃ ដើម្បីយកដីធ្វើកម្មសិទ្ធិ ។
របាយការណ៍បន្តថា កម្លាំងជំនាញបានធ្វើកំណត់ហេតុអនុវត្តដីកា និងធ្វើកំណត់ហេតុប្រគល់ទទួលជនសង្ស័យទៅឱ្យខាងប៉ុស្តិ៍នគរបាលរដ្ឋបាលក្រញ៉ូងសែនជ័យនៃស្នងការដ្ឋាននគរបាលខេត្តក្រចេះ ដើម្បីចាត់ការបន្ត ។
សូមរំលឹកថា សាលក្រមព្រហ្មទណ្ឌលេខ២៥១-ខ-ចុះថ្ងៃទី១៤ ខែកក្កដា ឆ្នាំ២០២១ ដែលកោះសន្តិភាពទទួលបាននាព្រឹកថ្ងៃទី៧ កញ្ញា ឆ្នាំ២០២១ មានខ្លឹមសារទាំងស្រុងដូច្នេះថា ៖ ក្រុមប្រឹក្សាជំនុំជម្រះនៃសាលាដំបូងខេត្តក្រចេះ បានបើកសវនាការ ជំនុំជម្រះជាសាធារណៈ នៅថ្ងៃទី ២២ ខែមិថុនា ឆ្នាំ២០២១ និងប្រកាសសាលក្រម ជាសាធារណៈ នៅថ្ងៃទី១៤ ខែកក្កដា ឆ្នាំ២០២១ ដោយសម្រេច ០១.កែប្រែបទចោទលើឈ្មោះ អ៊ូ សុភក្តី (មន្ត្រីរដ្ឋបាលព្រៃឈើ) ភេទប្រុស អាយុ ៤៥ឆ្នាំ ឈ្មោះ ជ័យ សុខា (មន្ត្រីរដ្ឋបាលព្រៃឈើ) ភេទប្រុស អាយុ ៤៨ឆ្នាំ ឈ្មោះ ហ៊ុន វណ្ណារ័ត្ន (មន្ត្រីសុរិយោដី) ភេទប្រុស អាយុ ៣៣ឆ្នាំ និង ឈ្មោះ លន់ សុខខេង (មន្ត្រីសុរិយោដី) ភេទប្រុស អាយុ ៤៤ឆ្នាំ ពីបទ «កាប់គាស់រុករានដីព្រៃឆ្ការព្រៃ និងឈូសឆាយដីព្រៃ ដើម្បីយកដី ធ្វើជាកម្មសិទ្ធិ» បទល្មើសព្រហ្មទណ្ឌ ដែលត្រូវផ្ដន្ទាទោសតាមមាត្រា ៦២ ចំណុច០១ និងមាត្រា ៥៦ ចំណុច ០៤ នៃច្បាប់ ស្ដីអំពី តំបន់ការពារធម្មជាតិ មកជាបទ «មិនប្ដឹងបរិហារបទឧក្រិដ្ឋ ឬបទមជ្ឈិមដោយអ្នករាជការសាធារណៈ» ជាបទល្មើសព្រហ្មទណ្ឌ ដែលត្រូវផ្ដន្ទាទោសតាមមាត្រា ៦២៨ ក្រមព្រហ្មទណ្ឌនៃព្រះរាជាណាចក្រកម្ពុជា។ អ្នកទាំងបួននេះ ត្រូវផ្តន្ទាទោសដាក់ ពន្ធនាគារកំណត់មួយឆ្នាំ តែទោសនេះ ត្រូវព្យួរ ទាំងអស់។
២-ឲ្យរួចខ្លួនលើឈ្មោះ ពៅ សុធារ៉ា ភេទប្រុស អាយុ ៤៣ ឆ្នាំ និង ឈ្មោះ ស្រាត សាន ភេទប្រុស ពីបទកាប់គាស់រុករាន ដីព្រៃឆ្ការព្រៃនិងឈូសឆាយដីព្រៃ ដើម្បីយកដីធ្វើជាកម្មសិទ្ធិ ប្រព្រឹត្តនៅចំណុចភ្នំរហាំ ភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី កាលពីថ្ងៃទី ៩ ខែកញ្ញា ឆ្នាំ២០២០ ។ បទល្មើសព្រហ្មទណ្ឌ ដែលត្រូវផ្ដន្ទាទោសតាមមាត្រា ៦២ ចំណុច ០១ និងមាត្រា ៥៦ ចំណុច ០៤ នៃច្បាប់ស្តីពីតំបន់ការពារធម្មជាតិ។ ក្នុងសាលក្រមដដែលនេះ បានផ្តន្ទាទោសលើមនុស្សចំនួន ៩នាក់ ដែលជាមេខ្លោងរុករានដីព្រៃ ០១.ឈ្មោះ ចាន់ ធី ហៅ ចិត្រ ភេទប្រុស អាយុ៥៥ឆ្នាំ ដាក់ពន្ធនាគារ ៨ឆ្នាំ និងពិន័យជាប្រាក់ចំនួន ១០០លានរៀល ។ ០២.ឈ្មោះ សាន ឈិន ភេទប្រុស អាយុ៣៦ឆ្នាំ ដាក់ពន្ធនាគារ ៥ឆ្នាំ និងពិន័យជាប្រាក់ចំនួន ៦០លានរៀល ។ ០៣.ឈ្មោះ លី បញ្ញាភា ភេទប្រុស អាយុ ៣៤ឆ្នាំ ដាក់ពន្ធនាគារ ៥ឆ្នាំ និងពិន័យជាប្រាក់ចំនួន ៦០លានរៀល ។ ០៤.ឈ្មោះ សាង ធូន ភេទប្រុស អាយុ៣០ឆ្នាំ ដាក់ពន្ធនាគារ ៥ឆ្នាំ និងពិន័យជាប្រាក់ចំនួន ៦០លានរៀល ។ ០៥.ឈ្មោះ ម៉ា ម៉េងធី ភេទប្រុស អាយុ៤៧ឆ្នាំ ដាក់ពន្ធនាគារ ៥ឆ្នាំ និងពិន័យ ជាប្រាក់ចំនួន ៦០លានរៀល ។ ០៦.ឈ្មោះ ហង់ ជុង ភេទប្រុស អាយុ ៥១ឆ្នាំ ដាក់ពន្ធនាគារ ៥ឆ្នាំ និងពិន័យជាប្រាក់ចំនួន ៦០លានរៀល ។ ០៧.ឈ្មោះ សារឿន ម៉ាប់ ហៅម៉ាប់ប៊ូស្រា អាយុ ៤២ឆ្នាំ ដាក់ពន្ធនាគារ ៥ឆ្នាំ និងពិន័យជាប្រាក់ចំនួន ៦០លានរៀល ។ ០៨.ឈ្មោះ ស៊ឹម សំណាង ហៅណាងទាហាន ភេទប្រុស អាយុ ៤៧ឆ្នាំ ដាក់ពន្ធនាគារ ៥ឆ្នាំ និងពិន័យជា ប្រាក់ចំនួន ៦០លានរៀល ។ ០៩.ឈ្មោះ ជុំ វន ហៅ សុវណ្ណឌី ភេទប្រុស អាយុ ៦០ឆ្នាំ ដាក់ពន្ធនាគារ ៥ឆ្នាំ និងពិន័យជា ប្រាក់ចំនួន ៦០លានរៀល ។ អ្នកទាំង ៩នាក់នោះ ត្រូវ បានចោទប្រកាន់ ពី បទកាប់ គាស់រុករានដីព្រៃឆ្ការព្រៃ និងឈូសឆាយដីព្រៃ ដើម្បីយកដីធ្វើជាកម្មសិទ្ធិ ប្រព្រឹត្តនៅចំណុចភ្នំរហាំ ភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី កាលពីថ្ងៃទី៩ ខែកញ្ញា ឆ្នាំ២០២០ ។ បទល្មើសព្រហ្មទណ្ឌ ដែលត្រូវផ្ដន្ទាទោសតាមមាត្រា ៦២ ចំណុច ០១ និងមាត្រា ៥៦ ចំណុច ០៤នៃច្បាប់ស្តីពីតំបន់ការពារធម្មជាតិ។
ក្នុងសេចក្តីសម្រេចនេះ បង្គាប់ឲ្យចាប់ខ្លួន ឃុំខ្លួនលើ ០១.ឈ្មោះ សារឿន ម៉ាប់ ហៅ ម៉ាប់ប៊ូស្រា ០២.ឈ្មោះ ស៊ឹម សំណាង ហៅណាងទាហាន ០៣.ឈ្មោះ ជុំ វន ហៅ សុវណ្ណឌី យកទៅឃុំខ្លួននៅពន្ធនាគារ ខេត្តក្រចេះ ដើម្បីឲ្យមកទទួលទណ្ឌកម្ម តាមអំណាចសាលក្រមនេះ តាមមាត្រា៣៥៣ ក្រមនិតិវិធីព្រហ្មទណ្ឌ នៃព្រះរាជាណាចក្រកម្ពុជា ៕
ចែករំលែកព័តមាននេះ