ក្នុងរដូវវស្សាទឹកទន្លេមេគង្គបានហក់ឡើងជាហេតុធ្វើឲ្យច្រាំងទន្លេបានបាក់ស្រុតនៅចំណុចឃុំពាមប្រធ្នោះ ស្រុកកោះសូទិន និងឃុំកោះអណ្ដែត ឃុំមានជ័យ ស្ថិតក្នុងស្រុកស្រីសន្ធរ ហើយត្រូវបាន
ខេត្តកំពង់ចាម ៖ ក្នុងរដូវវស្សាទឹកទន្លេមេគង្គបានហក់ឡើងជាហេតុធ្វើឲ្យច្រាំងទន្លេបានបាក់ស្រុតនៅចំណុចឃុំពាមប្រធ្នោះ ស្រុកកោះសូទិន និងឃុំកោះអណ្ដែត ឃុំមានជ័យ ស្ថិតក្នុងស្រុកស្រីសន្ធរ ហើយត្រូវបានឯកឧត្តម អ៊ុន ចាន់ដា អភិបាលខេត្ត សហការីអញ្ជើញចុះពិនិត្យដោយផ្ទាល់នាព្រឹកថ្ងៃទី២៨ ខែកញ្ញា ឆ្នាំ២០២៣ ដោយឱ្យមន្ត្រីក្រសួងធនធានទឹក និងឧតុនិយម សហការជាមួយមន្ទីរធនធានទឹកខេត្ត សិក្សាពីផលប៉ះពាល់ និងរៀបចំបើកខ្សាច់យក្សដើម្បីទប់ច្រើនទន្លេមិនឲ្យបាក់ដល់លំនៅដ្ឋានរបស់ប្រជាពលរដ្ឋឡើយ។
លោកយី វណ្ណៈ អភិបាលស្រុកកោះសូទិន បានឱ្យដឹងថា ក្នុងមួយរយៈទឹកទន្លេមេគង្គបានហក់ឡើងមក បណ្ដាលឱ្យបាក់ច្រាំងនៅចំណុចភូមិផ្សារថ្មី ឃុំពាមប្រធ្នោះ ស្រុកកោះសុទិន ប្រវែង១៥០ម៉ែត្រ ក្នុងនោះផ្ទះប្រឈមនឹងការរុះរើមានចំនួន៣៦ខ្នងផ្ទះ។ ចំណែកនៅកំពង់ដរជីហែរ វិញ ដីបានបាក់ស្រុតប្រវែង១០០ម៉ែត្រ។
ជាមួយគ្នានោះ ឯកឧត្តមអភិបាលខេត្ត បានឲ្យជំនាញចុះសិក្សា ដើម្បីត្រៀមបើកខ្សាច់យក្សទប់កុំឲ្យបាក់ច្រាំងដល់លំនៅដ្ឋានរបស់ប្រជាពលរដ្ឋ។ ទោះជាយ៉ាងណា អាជ្ញាធរមូលដ្ឋានបានប្រើពិធីសាស្ត្ររៀបចំបើកខ្សាច់ និងបង្គោលបុ.កចូលក្នុងដីទប់ជាបឋមមិនឲ្យបាក់ផងដែរ។
លោក ស៊ីម គង់ អភិបាលស្រុកស្រីសន្ធរ បានឲ្យដឹងថា នៅភូមិគគីឃុំកោះអណ្ដែត ស្រុកស្រីសន្ធរ ច្រាំងទន្លេបានបាក់បណ្ដោយប្រវែងជាង១០០ម៉ែត្រ និងបាក់ចូលមកក្នុងប្រមាណ៥ ម៉ែត្រ ក្នុងនោះបង្កឲ្យមានផលប៉ះពាល់លំនៅឋានរបស់ប្រជាពលរដ្ឋមួយខ្នង ហើយត្រូវបានអាជ្ញាធរមូលដ្ឋានសហការជាមួយម្ចាស់ផ្ទះបានជួយរុះរើទៅកាន់កន្លែងសុវត្ថិភាព។
អភិបាលស្រុកស្រីសន្ធរ ប្រាប់បន្តឱ្យដឹងទៀតថា បន្ទាប់ពីការចុះត្រួតពិនិត្យរួចរាល់ ឯកឧត្តមអភិបាលខេត្ត បានអញ្ជើញទៅពិនិត្យមើលច្រាំងទន្លេដែលបាក់តាមបណ្ដោយផ្លូវជាតិនៅក្នុងឃុំមានជ័យ ស្រុកស្រីសន្ធរ ដែលមានបណ្ដោយប្រមាណ៥០ទៅ៦០ម៉ែត្រ។ ជាមួយនោះ មន្ត្រីក្រសួងធនធានទឹក កំពុងតែធ្វើការសិក្សាត្រៀមដាក់បើកខ្សាច់ទប់មិនឱ្យប៉ះពាល់លំនៅឋានរបស់ប្រជាពលរដ្ឋ និងផ្លូវសាធារណៈដែលគម្រោងជួសជុលនេះ នឹងធ្វើឡើងនៅពេលរដូវទឹកសម្រកខាងមុខនេះ។
សូមបញ្ជាក់ថា កាលពីប្រមាណ៣ឆ្នាំមុន នៅឃុំឬស្សី ស្រុកស្រុកស្រីសន្ធរ ច្រាំងទន្លេបានបាក់មកដល់លំនៅដ្ឋានរបស់ប្រជាពលរដ្ឋ ដោយមានអន្តរាគមន៍ជាបន្ទាន់ពីឯកឧត្តមអភិបាលខេត្ត បានឲ្យកម្លាំងជំនាញបច្ចេកទេសរបស់ក្រសួងធនធានទឹក ចូលមកសិក្សា និងរៀបចំបើកខ្សាច់យក្សទប់ដែលមានបណ្ដោយប្រមាណជាង១,០០០ម៉ែត្រ រហូតមកដល់សព្វថ្ងៃនេះ ប្រជាពលរដ្ឋរស់នៅតំបន់នោះបានសុខសាន្ត ហើយច្រើនទន្លេក៏បានចាប់ផ្ដើមដុសឡើងវិញជាបណ្ដើរៗ។
សមិទ្ធផលនេះ បានធ្វើឲ្យប្រជាពលរដ្ឋរស់នៅក្នុងមូលដ្ឋានមានភាពសប្បាយរីករាយ និងអរគុណដល់អាជ្ញាធរមូលដ្ឋាន ព្រមទាំងឯកឧត្តមអភិបាលខេត្ត ដែលបានយកចិត្តទុកដាក់ក្នុងការជួយអន្តរាគមន៍ទាន់ពេលវេលា ព្រោះថា អ្នកខ្លះបើសិនជាបានដល់ដីផ្ទះរបស់ពួកគាត់ គឺមិនមានដីសង់ផ្ទះសម្រាប់សាងសង់ផ្ទះរស់នៅនោះទេ។
ចែករំលែកព័តមាននេះ