ខេត្តកំពង់ឆ្នាំង ៖ បើទោះមានការបង្ក្រាបបទល្មើសនេសាទដូចភ្លៀងរលឹម រួមមានការអប់រំផ្សព្វផ្សាយច្បាប់ស្ដីពីជលផលយ៉ាងណាក្តី ក៏បទល្មើសដាក់របាំងសាច់អួន និងរបាំងស្បៃមុងមួយចំនួននៅតែកើតមានឡើង លើទឹកដីខេត្តកំពង់ឆ្នាំង ។ ប្រធានមន្ទីរកសិកម្ម រុក្ខាប្រមាញ់…
ខេត្តកំពង់ឆ្នាំង ៖ បើទោះមានការបង្ក្រាបបទល្មើសនេសាទដូចភ្លៀងរលឹម រួមមានការអប់រំផ្សព្វផ្សាយច្បាប់ស្ដីពីជលផលយ៉ាងណាក្តី ក៏បទល្មើសដាក់របាំងសាច់អួន និងរបាំងស្បៃមុងមួយចំនួននៅតែកើតមានឡើង លើទឹកដីខេត្តកំពង់ឆ្នាំង ។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង លោកងិន ហ៊ុន បានមានប្រសាសន៍បែបនេះ ក្នុងពេលដែលលោកដឹកនាំសមត្ថកិច្ចសម្រុះ ចុះបង្ក្រាបបទល្មើសនេសាទស្ថិតក្នុងភូមិសាស្ត្រស្រុកកំពង់លែង និងស្រុកជលគីរី រយៈពេលពេញ១ថ្ងៃគឺនៅថ្ងៃទី២៦ ខែកញ្ញា ឆ្នាំ២០២៣ ។
លោក ងិន ហ៊ុន បានបន្តថា ប្រជាពលរដ្ឋមួយចំនួនតូចនៅតែឆ្លៀតធ្វើបទល្មើសនេសាទដោយខុសច្បាប់ ក្នុងរដូវហាមឃាត់ ដោយដាក់របាំងសាច់អួនមានប្រវែងវែង និងចំណុចខ្លះទៀត មានរបាំងស្បៃមុងផងដែរ ។ លោកទទួលស្គាល់ថា ការបង្ក្រាបពិតមិនងាយអស់មែន ប៉ុន្តែយើងនៅតែបង្ក្រាបជារៀងរាល់ថ្ងៃ ហើយវាក៏បានថមថយចុះយ៉ាងច្រើនដែរ ។
ជាក់ស្ដែង ថ្ងៃនេះក៏ដូចជាថ្ងៃម្សិលមិញ និងប៉ុន្មានថ្ងៃមុន តាមការណែនាំរបស់ឯកឧត្តមអភិបាលខេត្ត កម្លាំងសមត្ថកិច្ចចម្រុះ មានកម្លាំងស្នងការនគរបាលខេត្ត មន្ត្រីជំនាញជលផល និងសហគមន៍នេសាទ បានចុះបង្ក្រាបបទល្មើសនេសាទ តាមភូមិសាស្ត្រស្រុកកំពង់លែង និងស្រុកជលគីរី ។
ក្នុងនាមលោកប្រធានមន្ទីរជំនាញ សូមអំពាវនាវដល់បងប្អូនបញ្ឈប់ការធ្វើបទល្មើសនេសាទ ដោយដាក់របាំងសាច់អួនវែងៗដាក់របាំងស្បៃមុង និងបទល្មើសឆក់ត្រី ដាក់សម្រាស់ជាដើម ហើយនៅសល់តែ៥-៦ថ្ងៃទៀត រដូវបើកនេសាទនឹងបើកឡើងវិញហើយ ប៉ុន្តែសូមបងប្អូននេសាទទៅតាមច្បាប់ស្តីពីជលផល មិនត្រូវដាក់របាំងសាច់អូនលើសពីប្រវែង៥០ម៉ែត្រនោះទេ ។
សូមបញ្ជាក់ថា ជាលទ្ធផលក្នុងការប្រតិបត្តិការបង្ក្រាបបទល្មើសនេសាទរយៈពេញ១ថ្ងៃនៅថ្ងៃទី២៦ កញ្ញា គឺបង្ក្រាបនៅចំណុចអង្អរទ្វីប ឃុំស្វាយរំពារ៍ ស្រុកកំពង់លែង, ចំណុចក្រោយភូមិក្បាលកន្លង់, ចំណុច សំពៅសំពាក់, ចំណុចវាលសំណាប, កប់ចេស និងចំណុចខ្វែងឆ្លុះ ភូមិក្បាលកន្លង់ ឃុំពាមឆ្កោក ស្រុកជលគិរី ដោយក្នុងនោះ បង្ក្រាបបានរបាំងសាច់អួនចំនួន១០កន្លែង ប្រវែង១៥០០ម៉ែត្រ, លបលូសាច់អួនចំនួន៣៤គ្រឿង បង្គោលចំនួន៧០០ដើម, ចាក់លែងកូនត្រីចម្រុះចូលទន្លេវិញ៥០គូឡូក្រាម ។
ក្នុងកិច្ចប្រតិបត្តិការបង្ក្រាបបទល្មើសនោះដែរ បានប្រើប្រាស់កាណូតបាឡាស្មាច់ចំនួន៨គ្រឿង និងកម្លាំងសមត្ថកិច្ចចម្រុះចំនួន៤៤នាក់ ។
ចែករំលែកព័តមាននេះ