ព្រះអគ្គីលេបត្របាក់ផ្ទះលក់គ្រឿងបន្លាស់រថយន្តយ៉ាងសន្ធោសន្ធៅ
- ភ្នំពេញ
ឆេះផ្ទះលក់គ្រឿងបន្លាស់រថយន្ដមួយកន្លែង ត្រូវអណ្ដាតភ្លើងឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើលកាលពីវេលា
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ឆេះផ្ទះលក់គ្រឿងបន្លាស់រថយន្ដមួយកន្លែង ត្រូវអណ្ដាតភ្លើងឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើលកាលពីវេលាម៉ោង៨និង៤០នាទីយប់ ថ្ងៃទី២៦ខែកញ្ញាឆ្នាំ២០២៣ នៅត្រង់ចំណុចផ្ទះលក់គ្រឿងបន្លាស់រថយន្ដមួយកន្លែង ក្បែរមន្ទីរពេទ្យពហុព្យាបាលវនីដា តាមបណ្ដោយផ្លូវ២៣៧កែង និងផ្លូវ១៥៦ ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក មូលហេតុបណ្តាលមកពីឆ្លងចរន្តអគ្គិសនីពីអាគុយរថយន្ដទុកសម្រាប់លក់នៅក្នុងផ្ទះកើតហេតុ។
បើតាមប្រភពព័ត៌មានបានឲ្យដឹងថា «នៅមុនពេលកើតហេតុ ផ្ទះលក់គ្រឿងបន្លាស់រថយន្ដខាងលើនេះ បានបិទទ្វារចាក់សោ ដោយមិនមានមនុស្សនៅខាងក្នុងនោះទេ។ លុះដល់វេលាពេលកើតហេតុ ក៏ស្រាប់តែឃើញមានផ្សែងបានហុយចេញពីក្នុងនៃផ្នែកខាងមុខផ្ទះ ដែលជាកន្លែងស្តុកអាគុយរថយន្តទុកសម្រាប់លក់»។
ប្រភពដដែលបន្តថា «លុះបន្តិចក្រោយមក ក៏ស្រាប់តែលេចចេញជាអណ្ដាតភ្លើងឆាបឆេះនៅត្រង់ចំណុចនោះយ៉ាងសន្ធោសន្ធៅតែម្ដង ធ្វើឲ្យប្រជាពលរដ្ឋផ្អើលឆោឡោនាំគ្នាទាក់ទងហៅម្ចាស់ផ្ទះ និងយកបំពង់ពន្លត់អគ្គិភ័យជាច្រើនបំពង់មកធ្វើការបា.ញ់ពន្លត់អណ្ដាតភ្លើងដែលកំពុងតែឆាបឆេះនោះ រហូតដល់រលត់ជាស្ថាពរភ្លាមៗ។ ស្របពេលនោះដែរ ក៏មានសមត្ថកិច្ចមូលដ្ឋាន ក៏ដូចជារថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ចំនួន២គ្រឿង បានចុះមកធ្វើការអន្តរាគមន៍ភ្លាមៗផងដែរ»។
បើតាមសមត្ថកិច្ច ក៏បានឱ្យដឹងដែរថា «ក្នុងហេតុការណ៍ខាងលើនេះ មិនបង្កឲ្យមានការឆាបឆេះរាលដាលដល់ផ្ទះអ្នកជិតខាងនោះទេ គឺឆេះខូចខាតតែអាគុយរថយន្ត និងគ្រឿងបន្លាស់រថយន្ដដែលទុកសម្រាប់លក់មួយចំនួនតែប៉ុណ្ណោះ។ ហើយចំពោះមូលហេតុ សមត្ថកិច្ចបានដាក់ការសន្និដ្ឋានថា បណ្ដាលមកពីឆ្លងចរន្តអគ្គិសនីចេញពីអាគុយរថយន្តប្រភេទហាយប្រ៊ីត ដែលសម្រាប់លក់ ទើបបង្កឱ្យក្លាយទៅជាអណ្ដាតភ្លើងឆាបឆេះបែបនេះតែម្តង»៕
ចែករំលែកព័តមាននេះ