ប្រទេស​ជប៉ុន​ស្ថិត​នៅ​តំបន់​អាស៊ី​បូព៌ា មាន​ប្រជា​ជន​ជាង​១២៥​លាន​នាក់​ មាន​ផ្ទៃ​ដី​សរុប​ជាង​៣​សែន​គីឡូម៉ែត្រ​ការ៉េ​ និង​មាន​ផលិត​សរុប​ក្នុង​ស្រុក​ ឬ​ជីឌីភី ជាង​៤,៩​ទ្រីលាន​ដុល្លារ​។ ត​ទៅ​នេះ​ជា​ច្បាប់​​​ប្លែក​ៗ​​១​ចំនួន​របស់​ប្រទេស​ជប៉ុន​ដែល​លោក​អ្នក​គួរ​ស្វែង​យល់​។

ទី​១- ​ហាម​ក្លូន​មនុស្ស​
​បន្ទាប់ពី​​អ្នក​វិទ្យាសាស្ត្រ​​នៅ​បស្ចិម​ប្រទេស​​ក្លូន​សត្វ​ចៀម​​ឈ្មោះ​ដូលី (Dolly) កាលពី​ឆ្នាំ​១៩៩៦​, រដ្ឋា​ភិ​បាល​​ជប៉ុន​ក៏​​ប្រញាប់​ប្រញាល់​ទប់​ស្កាត់​ករណី​នេះ​ និង​បាន​អនុម័ត​​​ច្បាប់​ថ្មី​​កាលពី​ឆ្នាំ​២០០០​ ដែល​ហាម​​​ក្លូន​មនុស្ស​។ អ្នក​​​ប្រព្រឹត្ត​ល្មើស​នឹង​បទ​បញ្ញត្តិ​នេះ​ត្រូវ​​ប្រឈម​នឹង​ការ​ជាប់​ពន្ធនាគារ​រហូត​ដល់​១០​ឆ្នាំ​។​

ទី២- ​ត្រូវ​រាយ​ការណ៍​អំពី​គ្រឿង​ផ្ទុះ​
ពេល​​ឃើញ​គ្រឿង​ផ្ទុះ​នៅកន្លែង​ណា​មួយ​ត្រូវ​​រាយការណ៍​ប្រាប់​​សមត្ថ​កិច្ច​​ជា​បន្ទាន់​។ បើ​​មិនដូច្នេះ​ទេ មាន​ន័យ​ថា​លោក​អ្នក​​​ប្រព្រឹត្ត​ល្មើស​ច្បាប់​ហើយ​។​​ អ្នក​ដែល​ប្រព្រឹត្ត​ល្មើស​នឹង​បទ​បញ្ញត្តិ​នេះ​ត្រូវ​បង់​ប្រាក់​​ពិន័យ​​​១​ម៉ឺន​យ៉េន​។​

ទី៣- ​ការ​កើត​កូន​នៅ​​អំឡុង​ពេល​ជា​ស្ត្រី​មេម៉ាយ​
នារី​ដែល​លែង​លះ​គ្នា​​ស្វាមី​រួច​ហើយ​ត្រូវ​តែ​រង់ចាំ​រយៈពេល​៦​ខែ​​ទើប​អាច​រៀប​ការ​ប្ដី​ថ្មី​បាន​។ បើ​នៅ​ក្នុង​អំឡុង​ពេល​៦​ខែ​នោះ​ស្រាប់​តែ​នារី​រូប​នោះ​កើត​កូន​​​ ​ច្បាប់​ចាត់​ទុក​កូន​នោះ​​​​ជា​កូន​រវាង​​ស្ត្រី​​​មេម៉ាយ និង​ស្វាមី​របស់​គាត់​ដែល​បាន​លែង​លះ​គ្នា​​​​​។

ទី​៤- ​​នារីត្រូវ​តែ​ពាក់​អាវ​ទ្រនាប់​នៅ​​កន្លែង​ធ្វើ​ការ​
ច្បាប់​តម្រូវ​​ឱ្យ​នារី​គ្រប់​រូប​ដែល​ធ្វើ​ការ​នៅ​ក្នុង​ការិយាល័យ​បន្ទប់​ម៉ាស៊ីនត្រជាក់​​ត្រូវ​តែ​ពាក់​អាវ​ទ្រនាប់​​​ជាប់​ជា​ប្រចាំ​ទើប​​​​ត្រឹម​ត្រូវ​ទៅ​តាម​ក្រឹត្យ​ក្រម​នៃ​ច្បាប់​​។​ ​ជា​ពិសេស នារី​​បម្រើ​ការ​​ផ្នែក​ទំនាក់​ទំនង​ជា​មួយ​​​អតិថិជន ឬ​​ទំនាក់​ទំនង​ជា​មួយ​ក្រុម​ហ៊ុន​ដទៃ​។ ឧទាហរណ៍​ ផ្នែក​លក់​ ឬ​ផ្នែក​ទំនាក់ទំនង​សាធារណៈ​ជាដើម​​។​ ​​​ច្បាប់​ជប៉ុន​ចែង​ត្រង់​ចំណុច​នេះ​​ច្បាស់​ៗ​តែ​ម្ដង​។​​

ទី​៥- ​​​​​ជន​ជាតិ​បរទេស​ត្រូវ​តែ​ទទួល​ស្គាល់​កូន​របស់​ខ្លួន​
ជន​ជាតិ​បរទេស​ដែល​រស់​នៅ​ជា​មួយ​គ្នា​ជា​ប្ដី​ប្រ​ពន្ធ​​​ដោយ​មិន​បាន​​​​រៀប​ការ​ ​បើ​​ភាគី​ស្ត្រី​​​​​​មាន​​​កូន ភាគី​ខាង​ប្រុស​​មិន​អាច​គេច​វេស​មិន​ទទួល​ខុស​ត្រូវ​ទេ​។ ភាគី​ខាង​ប្រុស​​ត្រូវ​តែ​ទទួល​ខុស​ត្រូវ​​ថា​ជា​កូន​របស់​ខ្លួន​ពេញ​លក្ខណៈ​ច្បាប់​​​ហើយ​ទទួល​ស្គាល់​តាំង​ពី​​​កូន​នោះ​នៅក្នុ​ងផ្ទៃ​ម្ដាយ​តែម្ដង​​​។ ​ធ្វើ​បែប​នេះ​ដើម្បី​​ឱ្យ​កូន​​កើត​មក​ទទួល​បាន​សញ្ជាតិ​ជប៉ុន​ដោយ​ស្វ័យ​ប្រវត្តិ​។ ​ភាគី​ខាង​ប្រុស​មាន​ជម្រើស​​១​ទៀត​​គឺ​ធ្វើ​យ៉ាង​ណា​​​ទទួល​ស្គាល់​កូន​នោះ​ជា​កូន​របស់​ខ្លួន​​មុន​​​អាយុ​ម្ភៃ​ឆ្នាំ​។​​

ទី៦​- ​មិន​ត្រូវ​បោះ​ ឬ​ហែក​ក្រដាស​ប្រាក់​ចោល​ទេ​​​
អ្នក​ដែល​​ហែក​លុយ​ចោល​ ឬ​បោះលុយ​ចោល បើ​សមត្ថកិច្ចចាប់​​បាន​​ត្រូវ​​ពិន័យ​ជា​ប្រាក់​២​សែន​យ៉េន​ ឬ​ជាប់​ពន្ធនាគារ​១​ឆ្នាំ​។

ទី៧- មុន​នឹង​ទិញ​​​ត្រី​ក្រពត​ត្រូវ​តែ​ស្នើ​សុំ​​​អាជ្ញាប័ណ្ណ​​ (license)
បើ​ចង់​​ទិញ​ត្រីក្រពត​យក​ទៅ​ចម្អិន​​​ជា​អាហារ​​ ឬ​រក្សា​ទុក​​​, ​លោក​អ្នក​ត្រូវ​តែ​មាន​អាជ្ញាប័ណ្ណ ឬ​លិខិត​អនុញ្ញាត​​​។ សូម្បី​តែ​ព្រះ​ចៅ​អធិរាជ​ជប៉ុន​ក៏​​ត្រូវ​​​ជាប់​បម្រាម​ដោយ​ច្បាប់​នេះ​ដែរ​។​​ច្បាប់​មិន​អនុញ្ញាត​ឱ្យ​ព្រះ​អង្គ​​​​សោយ​ត្រី​ក្រពត​ទេ​ ព្រោះ​គេ​ខ្លាច​​មាន​បញ្ហា​សុខ​ភាព​ដោយ​សារ​ត្រី​នេះ​ល្បី​ថា​មាន​សារ​ធាតុ​ពុល​​​​​។ ដោយ​ឡែក​ ព្រះ​ញាតិវង្សានុវង្ស​អាច​សោយ​ត្រី​ក្រពត​បាន​។​​​

ទី៨- ​​​អ្នក​ឃោសនា​បោះ​ឆ្នោត​អាច​ទទួល​បាន​ប្រាក់​អាហារ​កិច្ច​
អ្នក​ដែល​ចូលរួម​​​នៅ​ក្នុង​យុទ្ធនាការ​ឃោសនាបោះឆ្នោត​​​មាន​សិទ្ធិ​ទាមទារ​ប្រាក់​ប៉ូវ​ត្រឡប់​មក​វិញសម្រាប់​​ថ្លៃ​ចំណាយ​ផ្សេង​ៗ​ដូចជា​៖ ការ​ស្នាក់​នៅ​សណ្ឋាគារ​ ឬ​ផ្ទះ​សំណាក់​១,២​ម៉ឺន​យ៉េន, ថ្លៃ​អាហារកិច្ច​ ៣ពាន់​យ៉េន និង​ថ្លៃ​ចំណាយ​លើ​ចំណី​​ចំណុក​សម្រាប់​ញ៉ាំ​​ក្រៅ​ពេល​តម្លៃ​​​​៥រយ​យ៉េន​។​

ទី៩- ​រៀប​ការ​ជា​មួយ​មនុស្ស​ដែល​ខ្លួន​មិន​ស្រឡាញ់​
​​​​អាពាហ៍​ពិពាហ៍​​​​ដែល​ធ្វើ​ឡើង​ទាំង​បង្ខំ​​​​​ត្រូវ​ចាត់​ទុក​ជា​អសារ​បង់ ហើយ​​ត្រូវ​តែ​​​​រលាយ​ដោយ​ស្វ័យ​ប្រវត្តិ​​​​។ ច្បាប់​នេះ​ចង់​សំដៅ​លើ​ការ​រៀប​ការ​ទាំង​​បង្ខំចិត្ត។​ ​កូន​ប្រុស​ ​និង​កូន​ស្រី​មិន​ពេញ​ចិត្ត​គ្នា។​ ប៉ុន្តែ​ឪពុក​ម្ដាយ​ខាង​កូន​​ប្រុស​ និង​​កូន​​ស្រី​​ចេះ​តែ​​រៀប​ចំ​​ផ្ចុង​ផ្ដើម​​​ដើម្បី​បំពេញ​ចិត្ត​គ្រួសារ​ និង​បំពេញ​ចិត្ត​ខ្លួន​ឯង​​ជា​ជាង​គិត​ទៅ​ដល់​អនាគត​របស់​កូន​។

​ទី​១០​- ​​នារី​មិន​អាច​បដិសេធ​​ការ​​​​​ណាត់​ជួប​ស្នេហា​​
បើ​ភាគី​​បុរស​​បបួល​នារី​​ចេញ​ទៅ​ក្រៅ​ដើម្បី​ណាត់​គ្នា​ដើរ​លេង​ ឬ​ហូប​អី​ជុំ​គ្នា​តែ​ពីរ​នាក់​ដើម្បី​ទាក់​ទង​​​ស្នេហា​​​ ខាង​ភាគី​នារី​មិន​អាច​ប្រកែក​ទេ។ ​កាល​ណា​នារី​ប្រកែក​​មាន​ន័យ​ថា​​​ខុស​ច្បាប់​។​ តាម​ពិត គ្មាន​នរណា​ណា​គេ​ត្រៀម​ខ្លួន​ធ្វើ​បែប​នេះ​ទាំង​អស់​គ្នា​ទេ​។ គ្រាន់​តែ​ថា​ពេល​ខ្លះ​គេ​ខ្ជិល​ប្រកែក​។​

ទី១១- ​​ករណី​បង​ប្រុស​សូម​រៀប​ការ​ជា​មួយ​សង្សារ​ប្អូន​ប្រុស​ខ្លួន​ឯង​
ឧប​មា​ថា​មាន​បុរស​២​នាក់​ជា​បង​ប្អូន​បង្កើត​នឹង​គ្នា​។ បើ​បុរស​ជា​បង​ពេញ​ចិត្ត​នឹង​សង្សារ​ប្អូន​ប្រុស​របស់​ខ្លួន​ឯង ហើយ​គាត់​សូម​រៀប​ការ​ជា​មួយ​នារី​នោះ ​មាន​ន័យ​ថា​ប្អូន​ប្រុស និ​ងសង្សារ​​ត្រូវ​តែ​យល់​ព្រម​។ បើ​​ប្រកែក​​ត្រូវ​ចាត់​ទុក​​​​​ជា​អំពើ​ខុស​ច្បាប់​។​

ទី​១២- ​ហាម​ធ្វើ​សង្គ្រាម​ជា​មួយ​ប្រទេស​ដទៃ​
​ក្រោយ​ពេល​ជប៉ុន​ចាញ់​សង្គ្រាម​លោក​លើក​ទី​២ ប្រទេស​នេះ​​សរ​សេរ​រដ្ឋ​ធម្មនុញ្ញ​ដែល​ប្រកាន់​យក​គោល​ការណ៍​​សន្តិ​ភាព​និយម​​។ ដូច្នេះ​ ការ​ធ្វើ​សង្គ្រាម​ជាមួយ​ប្រទេស​ដទៃ​​ត្រូវ​ចាត់​ទុក​ជា​អំពើ​ខុស​ច្បាប់​។ យោង​តាម​រដ្ឋ​ធម្មនុញ្ញ​ជប៉ុន, បើ​ប្រទេស​ជប៉ុន​រង​ការ​វាយ​ប្រហារ​ពី​ប្រទេស​ដទៃ​ ​អ្នក​ដែល​រ៉ាប់​រង​ការ​ពារ​ប្រទេស​ជប៉ុន​គឺ​កងទ័ព​​​អាមេរិក​។ អាមេរិក​នឹង​ចេញ​មុខ​ធ្វើ​​សង្គ្រាម​ជំនួស​៕​​​​

ប្រភព៖ The Independent និង​ប្រភព​ដទៃ​ទៀត
​https://www.independent.co.uk/news/world/9-of-the-most-bizarre-laws-in-the-world-a6770126.html
https://thesmartlocal.jp/strange-japanese-laws/
https://www.timeout.com/tokyo/blog/top-10-strange-laws-in-japan-081815