អាមេរិកជំរុញកម្ពុជា ឱ្យពន្លឿនការទទួលយកអ្នកទោសកម្ពុជា នៅអាមេរិក
- ភ្នំពេញ
អាមេរិកបានស្នើដល់ប្រទេសកម្ពុជា ឱ្យពន្លឿននីតិវិធី នៃការទទួលយកអ្នកទោសកម្ពុជា ដែលកំពុងស្ថិតនៅប្រទេសអាមេរិក កាលពីថ្ងៃសុក្រ ទី២២ ខែកញ្ញា។
អាមេរិកបានស្នើដល់ប្រទេសកម្ពុជា ឱ្យពន្លឿននីតិវិធី នៃការទទួលយកអ្នកទោសកម្ពុជា ដែលកំពុងស្ថិតនៅប្រទេសអាមេរិក កាលពីថ្ងៃសុក្រ ទី២២ ខែកញ្ញា។
សំណើនេះ ធ្វើឡើងក្នុងជំនួបទ្វេភាគី និងពិភាក្សាការងារ រវាងសម្តេចមហាបវរធិបតី ហ៊ុន ម៉ាណែត និងលោកជំទាវ វ៉ិចតូរីយ៉ា នូលែន (Victoria Nuland) អនុរដ្ឋមន្ត្រីករបរទេសស្ដីទី សហរដ្ឋអាមេរិកនារសៀលថ្ងៃសុក្រ ថ្ងៃទី២២ ខែកញ្ញា ឆ្នាំ២០២៣ ក្នុងឱកាសសម្តេចធិបតី អញ្ជើញចូលរួមកិច្ចពិភាក្សាទូទៅ នៃមហាសន្និបាតអង្គការ សហប្រជាជាតិលើកទី៧៨ នៅទីក្រុងញូវយ៉ក នៃសហរដ្ឋអាមេរិក។
ភាគីទាំងពីរ បានពិភាក្សាគ្នាផង ពាក់ព័ន្ធនឹងការធ្វើមាតុភូមិនិវត្តន៍ពលរដ្ឋខ្មែរ ដោយលោកជំទាវ វ៉ិចតូរីយ៉ា នូលែន បានស្នើពន្លឿននីតិវិធីនៃការទទួលយកពលរដ្ឋទាំងនោះ។ ជាការឆ្លើយតប សម្តេចធិបតី បានបញ្ជាក់ថា ក្រសួង-ស្ថាប័នពាក់ព័ន្ធរបស់កម្ពុជា នឹងពិនិត្យកែសម្រួលនីតិវិធី ឱ្យដំណើរការដោយរលូន ឆាប់រហ័ស និងប្រកបដោយប្រសិទ្ធភាពខ្ពស់។ សម្ដេចធិបតី ក៏បានស្នើឱ្យសហរដ្ឋអាមេរិកយកចិត្តទុកដាក់ ជាពិសេសចំពោះពលរដ្ឋខ្មែរ ដែលត្រូវធ្វើមាតុភូមិនិវត្តន៍ និងដែលមានបញ្ហាសុខភាព។ លោកជំទាវ វ៉ិចតូរីយ៉ា នូលែន បានបញ្ជាក់ថា បញ្ហាសុខភាព គឺជាអ្វីដែលសហរដ្ឋអាមេរិកបានយកចិត្តទុកដាក់កន្លងមក និងបន្តយកចិត្តទុកដាក់ ជាពិសេសបន្ថែមទៀត តាមការស្នើរបស់សម្ដេចធិបតី។
ចាប់តាំងពីការចុះហត្ថលេខាកាលពីឆ្នាំ២០០២ រវាងអាមេរិក និងកម្ពុជា លើកិច្ចព្រមព្រៀង សម្រាប់ការធ្វើមាតុភូមិនិវត្តន៍ជនជាតិខ្មែរ នៅអាមេរិក ដែលធ្លាប់ជាប់ទោសនោះ គេដឹងថា អាមេរិកបានបញ្ជូនអ្នកទោសទាំងនោះជាង១០០០នាក់មកកាន់កម្ពុជា។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានទទួលជួបលោកជំទាវ វ៉ិចតូរីយ៉ា នូលែន (Victoria Nuland) អនុរដ្ឋមន្ត្រីការបរទេសស្ដីទី អាមេរិក ។ នៅក្នុងជំនួបនេះ លោកជំទាវ វ៉ិចតូរីយ៉ា នូលែន បានសម្តែងនូវការស្វាគមន៍យ៉ាងកក់ក្ដៅចំពោះ សម្ដេចធិបតី ដែលបានអញ្ជើញមកទីក្រុងញូវយ៉ក ដើម្បីចូលរួមកិច្ចពិភាក្សាទូទៅ នៃមហាសន្និបាតអង្គការសហប្រជាជាតិ លើកទី៧៨ និងបានអបអរសាទរចំពោះការជ្រើសតាំងសម្ដេចធិបតី ជានាយករដ្ឋមន្ត្រី នៃព្រះរាជាណាចក្រកម្ពុជា នីតិកាលទី៧ នៃរដ្ឋសភា។
លោកជំទាវវ៉ិចតូរីយ៉ា នូលែន បានគូសបញ្ជាក់បន្ថែមថា សហរដ្ឋអាមេរិក ស្វាគមន៍ឱកាស ដើម្បីពង្រីកកិច្ចសហប្រតិបត្តិការ រវាងប្រទេសទាំងពីរ តាមរយៈការធ្វើការជិតស្និទ្ធជាមួយ សម្ដេចធិបតី និងចង់ឃើញសម្ដេចធិបតី ក៏ដូចប្រទេសកម្ពុជាទាំងមូល ទទួលបានជោគជ័យ។
កិច្ចពិភាក្សាបានផ្តោតលើការរិះរកវិធី និងមធ្យោបាយ សម្រាប់ពង្រឹងទំនាក់ទំនង និងកិច្ចសហប្រតិបត្តិការទ្វេភាគី ឱ្យឈានឡើងមួយកម្រិតទៀត។ ឆ្លៀតក្នុងឱកាសនេះ លោក ជំទាវ វ៉ិចតូរីយ៉ា នូលែន បានគោរពជម្រាបជូនសម្ដេចធិបតី ថា សហរដ្ឋអាមេរិក បានសម្រេចផ្ដល់ជូនឡើងវិញ នូវជំនួយក្នុងទំហំទឹកប្រាក់ប្រមាណ ១៨លានដុល្លារអាមេរិក តាមរយៈទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) ដែលសហរដ្ឋអាមេរិកបានផ្អាក ក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣។
ការសម្រេចចិត្តអាមេរិកផ្តល់ជំនួយឡើងវិញដល់កម្ពុជា គឺជាសញ្ញាដ៏វិជ្ជមានមួយ នៃទំនាក់ទំនងទ្វេភាគីរវាងប្រទេសមហាអំណាចនិងកម្ពុជា។ ភាពល្អប្រសើរឡើងវិញ នៃទំនាក់ទំនងកម្ពុជា និងអាមេរិក នឹងផ្តល់ផលប្រយោជន៍គ្នាទៅវិញទៅមក៕
ចែករំលែកព័តមាននេះ