នារី១រូបធ្លាប់ប្រឡង Cambodia Idol បង្កគ្រោះថ្នាក់ចរាចរណ៍នៅចំណុចស្តុបសម្តេចប៉ាន
- ភ្នំពេញ
រាជធានីភ្នំពេញ ៖ មានករណីគ្រោះថ្នាក់ចរាចរណ៍មួយបង្កឡើងដោយរថយន្តមួយគ្រឿងម៉ាកព្រូស
រាជធានីភ្នំពេញ ៖ មានករណីគ្រោះថ្នាក់ចរាចរណ៍មួយបង្កឡើងដោយរថយន្តមួយគ្រឿងម៉ាកព្រូស បើកបរដោយតារាចម្រៀងស្រីម្នាក់ ខណៈចេញពីកម្មវីធីផឹកស៊ីហើយបើករថយន្តឆ្លងស្តុបទៅបុ.ករថយន្ត១គ្រឿង និងបុ.ករះរបាំងថ្មពុះចែកទ្រូងផ្លូវ បណ្តាលឱ្យខូចខាតអស់៣កង់ថែមទៀតផង កាលពីវេលាម៉ោង៤និង១០នាទីទៀបភ្លឺថ្ងៃទី១៩ ខែកញ្ញា ឆ្នាំ២០២៣ ស្ថិតនៅចំណុចស្តុបសម្តេចប៉ាន ផ្លូវលេខ២១៤ កែងមហាវិថីព្រះមុនីវង្ស ស្ថិតក្នុងសង្កាត់បឹងព្រលិត ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីសន្តិសុខយាមធនាគារក្បែរកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តមួយគ្រឿងម៉ាកតូយូតារ៉ាស់ ពណ៌ស ពាក់ស្លាកលេខ ភ្នំពេញ 2BQ-5318 បើកបរដោយស្ត្រីម្នាក់ ធ្វើដំណើរតាមផ្លូវ២១៤ ទិសដៅពីកើតទៅលិច ឆ្លងស្តុប ពេលភ្លើងស្តុបពណ៌ខៀវ ។
តាមប្រភពដដែលបានបន្តថា ខណៈរថយន្តមួយគ្រឿងខាងលើនោះឆ្លងបានពាក់កណ្តាលផ្លូវ ស្រាប់តែមានរថយន្តមួយគ្រឿងទៀតម៉ាកព្រូស ពណ៌ប្រផេះ ពាក់ស្លាកលេខ ភ្នំពេញ 2BM-4776 បើកបរដោយនារីម្នាក់ជាតារាចម្រៀង ធ្លាប់ប្រឡងក្នុងកម្មវិធី Cambodia Idol ធ្វើដំណើរតាមបណ្តោយវិថីព្រះមុនីវង្ស ក្នុងទិសដៅពីជើងទៅត្បូង ក្នុងល្បឿនលឿន លុះមកដល់ផ្លូវបំបែក ស្រាប់តែរថយន្តព្រូសបានបុ.កផ្នែកខាងមុខនៃតូយូតារ៉ាស់យ៉ាងពេញទំហឹង បណ្តាលឲ្យរថយន្តបង្ករេចង្កូតទៅប៉ះរបាំងថ្មពុះចែកទ្រូងផ្លូវ ខូចខាតអស់៣កង់ និងបែកកង់មុខក្រោយនៃផ្នែកខាងឆ្វេង រេទៅស្តាំដៃផ្លូវ បន្តដំណើរទៅមុខទៀតលែងរួច។
ក្រោយកើតហេតុ សមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធី ៕
ចែករំលែកព័តមាននេះ