ខេត្តបាត់ដំបង ៖ សកម្មភាពចុះបង្ក្រាបបទល្មើសនេសាទរបស់អាជ្ញាធរ និងមន្ត្រីជំនាញមួយរយៈពេលចុងក្រោយនេះ ត្រូវគេសង្កេតឃើញថា ហាក់មមារញឹកបំផុត តែសកម្មភាពប្រព្រឹត្តបទល្មើសរបស់ក្រុមជនល្មើស ក៏ហាក់កំពុងកើនឡើងយ៉ាងខ្លាំងក្លាដែរ ខណៈការបង្ក្រាបបទល្មើសនេះរាប់រយដងកន្លង គេពុំធ្លាប់ឃើញសមត្ថកិច្ចចាប់បញ្ជូនជនល្មើសណាម្នាក់ទៅកាន់តុលាការកាត់ទោសតាមច្បាប់។…
ខេត្តបាត់ដំបង ៖ សកម្មភាពចុះបង្ក្រាបបទល្មើសនេសាទរបស់អាជ្ញាធរ និងមន្ត្រីជំនាញមួយរយៈពេលចុងក្រោយនេះ ត្រូវគេសង្កេតឃើញថា ហាក់មមារញឹកបំផុត តែសកម្មភាពប្រព្រឹត្តបទល្មើសរបស់ក្រុមជនល្មើស ក៏ហាក់កំពុងកើនឡើងយ៉ាងខ្លាំងក្លាដែរ ខណៈការបង្ក្រាបបទល្មើសនេះរាប់រយដងកន្លង គេពុំធ្លាប់ឃើញសមត្ថកិច្ចចាប់បញ្ជូនជនល្មើសណាម្នាក់ទៅកាន់តុលាការកាត់ទោសតាមច្បាប់។
គេសង្កេតឃើញកម្លាំងសមត្ថកិច្ច ឬកម្លាំងជលផលចូលរួមដោយកម្លាំងសហគមន៍មូលដ្ឋានតែងចុះបង្ក្រាបបទល្មើសនេសាទនេះ ជាបន្តបន្ទាប់ក្នុងរយៈពេលប៉ុន្មានខែចុងក្រោយនេះ ថែមទាំងរឹបអូសបានឧបករណ៍ ឬវត្ថុតាងល្មើសច្បាប់យ៉ាងច្រើនសន្ធឹកសន្ធាប់ទៀតផង យកទៅដុតកម្ទេចចោល ។ ប៉ុន្តែគេមិនធ្លាប់ឃើញសមត្ថកិច្ចចាប់ខ្លួនជនប្រព្រឹត្តបទល្មើសនេសាទណាម្នាក់យកទៅកាត់ទោសនៅតុលាការម្ដងទេ ។
ដោយសារតែនិទណ្ឌភាពបែបនេះហើយ ទើបជាហេតុនាំឲ្យជនល្មើសបានដៃ បានចិត្ត រឹតតែបង្កើនបទល្មើសទ្វេរដងផ្គើននឹងច្បាប់ ផ្គើននឹងសមត្ថកិច្ចដែលចុះបង្ក្រាប ។ ជាក់ស្ដែង កាលពីថ្ងៃទី ១៦ កញ្ញា កម្លាំងកងរាជអាវុធហត្ថ មន្ត្រីជលផល បានសហការជាមួយកម្លាំងសហគមន៍នេសាទ នៅស្រុកឯកភ្នំ បានចុះបង្ក្រាបបទល្មើសនេសាទនេះនៅតំបន់ទន្លេសាប ស្ថិតក្នុងភូមិសាស្ត្រ ឃុំកោះជីវាំង រហូតរឹបអូសបានវត្ថុតាង ឬ ឧបករណ៏នេសាទខុសច្បាប់របស់ជនល្មើស បានយ៉ាងច្រើន។
ប៉ុន្តែកិច្ចប្រតិបត្តិការលើកនេះ ក៏មិនខុសពីកិច្ចប្រតិបត្តិការលើកមុនដែរ គឺសមត្ថកិច្ចរកមិនឃើញម្ចាស់បទល្មើសណាម្នាក់ទេ សូម្បីតែឈ្មោះជនល្មើសក៏ទទេរស្អាតដែរ។ យោងតាមរបាយការណ៍បឋមនៃកិច្ចប្រតិបត្តិការខាងលើនេះ ដែលកោះសន្តិភាពទទូលបាន មន្ត្រីកងរាជអាវុធហត្ថ មន្ត្រីជលផល និង សហគមន៏នេសាទជាង១០នាក់ បានចុះបង្ក្រាបបទល្មើសនេសាទនេះលើ០៣ទីតាំង នៅក្នុងតំបន់អតីតដែនឡូនេសាទលេខ០២ ស្ថិតក្នុងឃុំកោះជីវាំង ស្រុកឯកភ្នំ ដែលជាតំបន់ពោរពេញទៅដោយបទល្មើសច្រើនស្អេកស្កះ ។
បើតាមរបាយការណ៍វត្ថុតាងល្មើសច្បាប់ ដែលមន្ត្រីជលផលរឹបអូសបានទាំង០៣ទីតាំងនេះ រួមមាន៖ សាច់អួនប្រវែង១៨០០ម៉ បង្គោលឈើសម្រាប់បំពាក់សាច់អួនចំនួន៦០០ដើម ឡុកចាប់ត្រីចំនួន០៧ និងព្រលែងកូនត្រីចម្រុះវិញជាង១៥០គីឡូក្រាម ។ មន្ត្រីជំនាញបានបញ្ជាក់ថា វត្ថុតាង ឬ ឧបករណ៍នេសាទល្មើសច្បាប់ដែលរឹបអូសបានទាំងនេះ ត្រូវបានដុតកំទេចចោល ។
ពាក់ព័ន្ធនឹងកិច្ចប្រតិបត្តិការបង្ក្រាបបទល្មើសនេសាទនេះ បើតាមរបាយការណ៍បង្ក្រាបរាប់រយករណីកន្លងមក កម្លាំងសមត្ថកិច្ចមិនដែលឃាត់ខ្លួនម្ចាស់បទល្មើសណាបានម្នាក់ទេ សូម្បីតែឈ្មោះជនល្មើសក៏គេមិនបដិសេធថា «មិនស្កាល់ដែរ»។ ប៉ុន្តែបើតាមប្រភពព័ត៌មានពីប្រជាពលរដ្ឋរស់នៅតំបន់ទន្លេសាប ស្ទើរគ្រប់ស្រុក សុទ្ធតែអះអាងថា អាជ្ញាធរមូលដ្ឋាន សហគមន៏នេសាទ មន្ត្រីជំនាញ ឬ សមត្ថកិច្ច សុទ្ធតែស្កាល់អត្តសញ្ញាណក្រុមជនល្មើស ដែលប្រព្រឹត្តបទល្មើសធំៗ នៅតំបន់ទន្លេសាប តែគេបដិសេធធ្វើជាមិនស្គាល់ ព្រោះពាក់ព័ន្ធនឹងផលប្រយោជន៍។
ដូច្នេះ ការបង្ក្រាបបទល្មើសលេសាទបែបនេះ បើទោះជាកម្លាំងសមត្ថកិច្ចចុះបង្ក្រាបរាល់ថ្ងៃ ក៏មិនអស់បទល្មើសដែរ។ ផ្ទុយទៅវិញ បទល្មើសកាន់តែកើនឡើងទ្វេរដង ផ្គើននឹងច្បាប់ផ្គើមនឹងសមត្ថកិច្ច ដោយសារតែជនប្រព្រឹត្តបទល្មើសនៅស្ថិតក្រៅសំណាញ់ច្បាប់ ៕
ចែករំលែកព័តមាននេះ