កម្ពស់ទឹកទន្លេនៅព្រឹកថ្ងៃទី១៧ ខែកញ្ញា ឆ្នាំ២០២៣នេះ គឺមានកម្ពស់១២,៦៦ម៉ែត្រ បានហក់ឡើង០,៥២ម៉ែត្រ នេះតាមរបាយការណ៍របស់មន្ទីរធនធានទឹក និងឧតុនិយមខេត្ត។ ស្ថានភាពកម្ពស់ទឹកទន្លេបែបនេះ បានធ្វើឲ្យព្រែកតាឃ្លោក
ខេត្តកំពង់ចាម ៖ កម្ពស់ទឹកទន្លេនៅព្រឹកថ្ងៃទី១៧ ខែកញ្ញា ឆ្នាំ២០២៣នេះ គឺមានកម្ពស់១២,៦៦ម៉ែត្រ បានហក់ឡើង០,៥២ម៉ែត្រ នេះតាមរបាយការណ៍របស់មន្ទីរធនធានទឹក និងឧតុនិយមខេត្ត។ ស្ថានភាពកម្ពស់ទឹកទន្លេបែបនេះ បានធ្វើឲ្យព្រែកតាឃ្លោក នៅចំណុចព្រំប្រទល់ឃុំកោះមិត្ត ស្រុកកំពង់សៀម និងឃុំកោះសូទិន ស្រុកកោះសូទិន ត្រូវទឹកហូរជន់លិចផ្លូវអស់ ជាហេតុធ្វើឲ្យប្រជាពលរដ្ឋជួបការលំបាកក្នុងការធ្វើដំណើរ ខណៈពេលម៉ូតូបើកឆ្លងកាត់ទឹកក៏រលត់ម៉ាស៊ីន។ ហើយប្រសិនបើទឹកនៅតែបន្តហក់ឡើងបន្ថែមទៀតនៅតំបន់នោះ នឹងត្រូវប្រើទូកម៉ាស៊ីន ដើម្បីឆ្លងទៅវិញទៅមកមិនខានឡើយ។
បើតាមកសិករម្នាក់មានឈ្មោះ លាង ទ្រី អាយុ៥៨ឆ្នាំ រស់នៅភូមិកោះព្រលូង ឃុំកោះមិត្ត បានប្រាប់ឲ្យដឹងថា «នៅព្រឹកព្រលឹម គាត់បានដឹកគោចេញពីផ្ទះជាច្រើនក្បាល ដើម្បីយកមកឱ្យស៊ីស្មៅនៅក្បែរចំណុចព្រែកតាឃ្លោក។ ស្របពេលដែលទឹកទន្លេហូរមកលិចតំបន់នេះ ធ្វើឲ្យអ្នកភូមិមួយចំនួន រស់នៅក្នុងឃុំកោះសូទិន និងកោះមិត្ត បាននាំគ្នាមកលំហែកាយ និងងូតទឹកលេងយ៉ាងសប្បាយរីករាយ ខណៈទឹកឡើងពុំទាន់ដល់ត្រឹមចង្កេះមនុស្សចាស់ឡើយ»។
កសិកររូបនេះ ប្រាប់បន្តឲ្យដឹងទៀតថា «ក្នុងរយៈពេលវេលាថ្ងៃខែឆ្នាំដូចគ្នា គឺទឹកទន្លេមេគង្គឆ្នាំទៅ គ្រាន់តែឡើងមកក្បែរលិចផ្លូវព្រែកតាឃ្លោកតែប៉ុណ្ណោះ ក៏ប៉ុន្តែមកដល់ឆ្នាំ២០២៣នេះ ទឹកទន្លេបានហូរកាត់ផ្លូវបេតុង ធ្វើឱ្យមនុស្សម្នាធ្វើដំណើរតាមមធ្យោបាយកង់ ម៉ូតូ និងរថយន្តជួបការលំបាក។ មិនត្រឹមតែប៉ុណ្ណោះ ម៉ូតូខ្លះជិះឆ្លងពីត្រើយម្ខាងឃុំកោះមិត្ត ទៅឃុំកោះសូទិន ដោយសុវត្ថិភាព ចំណែកម៉ូតូខ្លះទៀតជិះបានពាក់កណ្ដាលផ្លូវ ក៏រលត់ម៉ាស៊ីនតែម្ដង ហើយនាំគ្នាចុះរុញឆ្លងកាត់ទឹកហូរតែម្ដង»។
កសិករខាងលើបន្តទៀតថា «រីឯរថយន្តម៉ាក lexus 300 និងរថយន្តខ្ពស់ គឺអាចបើកឆ្លងកាត់ទឹកបាន តែបើរថយន្តធន់តូចវិញ មិនអាចបើកឆ្លងកាត់បានឡើយ។ ប៉ុន្តែបើរថយន្តតូច ចង់ឆ្លងពីឃុំកោះមិត្ត ទៅឃុំកោះសូទិននោះ គឺត្រូវជិះតាមផ្លូវតូច កាត់តាមចម្ការរបស់ប្រជាពលរដ្ឋ ដែលមានចម្ងាយរាប់រយម៉ែត្រទៅផ្នែកខាងលើ នោះនឹងមានផ្លូវដែលទឹកមិនទាន់លិច អាចបើកឆ្លងកាត់បាន។
កសិកររូបនេះ បញ្ជាក់ទៀតថា កាលពីឆ្នាំ១៩៩០ ទឹកទន្លេមេគង្គបានឡើងធំ ជាហេតុធ្វើឲ្យផ្លូវថ្នល់ត្រូវជន់លិចពីភូមិមួយទៅភូមិមួយ ហើយត្រូវមានទូកសម្រាប់ជាមធ្យោបាយធ្វើដំណើរផងដែរ។ តែមកដល់បច្ចុប្បន្ននេះ ក្រោយពេលដែលមេឃុំកោះមិត្ត បានអភិវឌ្ឍន៍ចាក់ផ្លូវបេតុងមួយខ្សែមក ឃើញថា ទឹកពុំដែលបានឡើងមកលិចផ្លូវផ្នែកខាងលើទួលនោះទៀតទេ។
ចំណែកអ្នកស្រី ស៊ុន ចន្ថា មេឃុំកោះសូទិន មានប្រសាសន៍ឱ្យដឹងនារសៀលថ្ងៃទី១៧ ខែកញ្ញានេះថា «នៅចំណុចភូមិទី៩ ឃុំកោះសូទិន ត្រូវបានទឹកទន្លេឡើងមកជន់លិច ធ្វើឱ្យប្រជាពលរដ្ឋត្រូវធ្វើដំណើរតាមទូក.ដ។ ចំណែកនៅភូមិព្រែកតាឃ្លោក ជាប់ភូមិទី៣វិញ ទឹកក៏ឡើងមកជន់លិចផងដែរ ប៉ុន្តែអាចបើកបរម៉ូតូបាន មិនទាន់ដល់ដំណាក់កាលត្រូវឆ្លងទូកនៅឡើយទេ»។
គួររំលឹកថា នៅឆ្នាំ២០១៨ ទឹកទន្លេឡើងធំលិចហូរចូលនៅចុងភូមិទី៣ ចាប់ពីត្រឹមភ្លៅមនុស្សចាស់ រហូតដល់ត្រឹមចង្កេះ ហើយត្រូវបានអាជ្ញាធរជិះទូកចែកអំណោយតាមផ្ទះផងដែរ។ ចំពោះដំណាំពោតក្រហមដែលប្រជាពលរដ្ឋដាំវិញ ភាគច្រើនគឺប្រមូលផលទាន់ពេលវេលាក្នុងរដូវវស្សា អាចលក់១គីឡូក្រាម តម្លៃជាង៧០០រៀល បើរដូវប្រាំងវិញ លក់បានមួយគីឡូក្រាមតម្លៃជាង១០០០ រៀល។ ហើយពលរដ្ឋភាគច្រើននាំគ្នាដាំពោតក្រហម ចំណែកពោត.សវិញ គឺដាំជាលក្ខណៈគ្រួសារ គ្រាន់តែកាច់លក់ ដើម្បីដោះស្រាយជីវភាពគ្រួសារតែប៉ុណ្ណោះ។ ដោយឡែកពលរដ្ឋនៅភូមិទី១២ បានដាំថ្នាំខ្មែរ (ថ្នាំជក់) លក់លើទីផ្សារបានតម្លៃថ្លៃ១គីឡូក្រាមជាង២ម៉ឺនរៀល ប៉ុន្តែបើពលរដ្ឋនាំគ្នាដាំច្រើនវិញ ថ្នាំជក់នឹងត្រូវធ្លាក់តម្លៃទៅវិញ។
ចែករំលែកព័តមាននេះ