មាតាបិតា ក៏ដូចជាអាណាព្យាបាលសិស្សសាលាវិទ្យាល័យ «ព្រះបាទសុរាម្រិត» ចូលរួមត្រេកអរនៅពេលដែលសាលាវិទ្យាល័យត្រូវបានបញ្ឈប់ការលក់នំកញ្ចប់ និងចំណីអាហារមិនមានសុវត្ថិភាពដល់សិស្ស ហើយបានត្រឡប់មកលក់ដូរនំខ្មែរជូនដល់សិស្សសាលាវិញ ដែលនេះគឺជា
ខេត្តកំពង់ឆ្នាំង ៖ មាតាបិតា ក៏ដូចជាអាណាព្យាបាលសិស្សសាលាវិទ្យាល័យ «ព្រះបាទសុរាម្រិត» ចូលរួមត្រេកអរនៅពេលដែលសាលាវិទ្យាល័យត្រូវបានបញ្ឈប់ការលក់នំកញ្ចប់ និងចំណីអាហារមិនមានសុវត្ថិភាពដល់សិស្ស ហើយបានត្រឡប់មកលក់ដូរនំខ្មែរជូនដល់សិស្សសាលាវិញ ដែលនេះគឺជាគំរូល្អមួយសម្រាប់សាលានានានៅទូទាំងខេត្ត ក៏ដូចជាទូទាំងប្រទេសផងដែរ។
បើតាមលោក ឡុង ស៊ីដាវុធ ដែលជាគ្រូបង្រៀននៅសាលាវិទ្យាល័យ «ព្រះបាទសុរាម្រិត» បានប្រាប់ឲ្យដឹងថា «កាលពីជាង១ខែមុន គ្រាដែលឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានអញ្ជើញមកពិនិត្យអគារមួយខ្នងចាស់ទ្រុឌទ្រោមនៅក្នុងសាលានោះ ឯកឧត្តមបានការណែនាំឱ្យបញ្ឈប់ការលក់នំចំណីអាហារមានសារធាតុគីមី និងភេសជ្ជៈមិនមានសុវត្ថិភាពដល់សិស្ស»។
លោកគ្រូបង្រៀនបានបន្តថា «បន្ទាប់មកសាលាក៏បានចាប់ផ្តើមអនុវត្តចាប់ពីពេលនោះមក ដោយកោះអញ្ជើញអាជីវករលក់ដូរក្នុងសាលាទាំងអស់មកប្រជុំណែនាំ ដើម្បីឲ្យបញ្ឈប់ការលក់នំចំណីអាហារដែលធ្វើឲ្យប៉ះពាល់ដល់សុខភាពសិស្ស ដូចជា ៖ លក់នំកញ្ចប់, លក់ប្រហិត, លក់ជើងមាន់ គឺសុទ្ធតែជាអាហារគ្មានសុវត្ថិភាពដល់សិស្ស ព្រោះមានសារភាពគីមី ក្រៅពីនោះក៏មានការបញ្ឈប់លក់ភេសជ្ជៈគ្រឿងកំប៉ុងផងដែរ»។
លោកគ្រូ ឡុង ស៊ីដាវុធ បានបន្តទៀតថា «ក្រោយពីទទួលបានការណែនាំពីលោកគ្រូ អ្នកគ្រូ ក៏ដូចជា លោកស្រីនាយិកាសាលាស្តីទី បងប្អូនអាជីវករ ព្រមទទួលធ្វើតាម ហើយបញ្ឈប់ការលក់នំចំណីអាហារចាប់ពីពេលនោះមក។ បច្ចុប្បន្ន ការលក់ដូរនំចំណីអាហារនៅក្នុងសាលា គឺមានតែនំខ្មែរ ដូចជា ៖ នំគម នំបត់ នំអន្សម និងនំអាកោជាដើម។ ហើយនំទាំងនេះ សុទ្ធសឹងតែជានំខ្មែរ មិនប៉ះពាល់សុវត្ថិភាព ហើយវាក៏ជានំណីអាហារអាចសម្រន់ក្នុងការឃ្លានបានផងដែរ»។
លោកគ្រូ ឡុង ស៊ីដាវុធ បញ្ជាក់ថា «ទាំងនេះ គឺដើម្បីចង់រក្សាសុខភាពដល់សិស្ស មិនឲ្យមានជំងឺ ដែលនាំដល់ការព្យាបាល ខាតបង់ថវិការគ្រួសារ និងខាតបង់ពេលវេលារៀនសូត្រទៀតផង។ ដូចអ្នកខ្លះមានជំងឺប្រចាំកាយតាំងពីក្មេងៗ ចំណែកខ្លះទៀតយកទៅព្យាបាលដល់ក្រៅប្រទេសទៀតផង»។
សូមបញ្ជាក់ផងដែរថា សាលាវិទ្យាល័យ «ព្រះបាទសារាម្រិត» គឺសាលារៀនមួយ ដែលមានទីតាំងនៅក្នុងក្រុងកំពង់ឆ្នាំង ហើយសាលានេះមានសិស្សសរុបចំនួន២.៨៥២នាក់ (ក្នុងនោះស្រី១៥៦៤នាក់) ចែកចេញជាថ្នាក់រៀនចំនួន៥៩ថ្នាក់ និងមានលោកគ្រូ អ្នកគ្រូចំនួន១៦៩នាក់ ។ សាលាវិទ្យាល័យមួយនេះ ក៏ត្រូវបានអាជ្ញាធរខេត្តកំពង់ឆ្នាំង កំពុងតែរៀបចំដាក់ឲ្យក្លាយជាសាលាគំរូមួយនៅទូទាំងខេត្តកំពង់ឆ្នាំង ដោយបានរៀបចំឲ្យមានសោភ័ណ្ឌភាពបរិស្ថាន និងគុណភាពសិក្សាផងដែរ៕
ចែករំលែកព័តមាននេះ