ជាងជួសជុលម៉ូតូកង់បីម្នាក់មកស្នាក់នៅបន្ទប់ជួលជាមួយមិត្តភក្តិបាន៣ថ្ងៃ ស្រាប់តែជួបរឿងអកុសល
- ភ្នំពេញ
រាជធានីភ្នំពេញ ៖ បុរសជាជាងជួសជុលម៉ូតូកង់បីម្នាក់បានដេកស្លា.ប់នៅក្នុងបន្ទប់ជួលមួយកន្លែង
រាជធានីភ្នំពេញ ៖ បុរសជាជាងជួសជុលម៉ូតូកង់បីម្នាក់បានដេកស្លា.ប់នៅក្នុងបន្ទប់ជួលមួយកន្លែងដោយពុំដឹងមូលហេតុ ខណៈដែលគាត់ត្រូវបានមិត្តភក្ដិហៅឲ្យមកស្នាក់នៅក្នុងបន្ទប់ជួលខាងលើជាមួយគ្នា ទើបបានរយៈពេល៣ថ្ងៃប៉ុណ្ណោះ ប៉ុន្តែភ្លាមៗនោះត្រូវបានសមត្ថកិច្ចសង្ស័យថា បណ្ដាលមកពីខ្យល់គ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកើតឡើងកាលពីវេលាម៉ោង៦និង១៥នាទីព្រឹក ថ្ងៃទី១៥ ខែកញ្ញា ឆ្នាំ២០២៣ នៅក្នុងបន្ទប់ជួលជាន់ទី១ផ្ទះជួល ស្ថិតនៅតាមផ្លូវបេតុងខាងក្រោយផ្សារព្រៃទា ក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះឈ្មោះ សំ អាត អាយុ៣៧ឆ្នាំ មុខរបរជាងជួសជុលម៉ូតូកង់បី មានស្រុកកំណើតនៅខេត្តក្រចេះ និងស្នាក់នៅក្នុងបន្ទប់ផ្ទះជួលកើតហេតុខាងលើ ។
តាមប្រភពពីកន្លែងកើតហេតុបានប្រាប់ឲ្យដឹងថា ដំបូងឡើយជនរងគ្រោះស្នាក់នៅផ្ទះជួលផ្សេងដែលស្ថិតនៅកន្លែងផ្សេងទេ ហើយឆ្ងាយពីកន្លែងធ្វើការងារថែមទៀត ដោយសារតែមើលឃើញពីការលំបាករបស់ជនរងគ្រោះបែបនេះ បុរសម្នាក់ទៀតឈ្មោះ យ៉ាន់ វីវ៉ា អាយុ៣៧ឆ្នាំ មុខរបរកម្មកររោងចក្រ ដែលត្រូវជាមិត្តភក្ដិ មានស្រុកកំណើតភូមិផ្អាវ ឃុំផ្អាវ ស្រុកបាធាយ ខេត្តកំពង់ចាម បានហៅឲ្យបុរសរងគ្រោះមកស្នាក់នៅបន្ទប់កើតហេតុជាមួយគ្នា ព្រោះនៅជិតកន្លែងធ្វើការផង ម្យ៉ាងទៀតបានជួយចាំបន្ទប់ពេលយប់ឲ្យផង ព្រោះអីម្ចាស់បន្ទប់រូបនេះជាប់ធ្វើការវេនយប់ ហើយស្នាក់នៅបន្ទប់ជួលបានតែពេលថ្ងៃប៉ុណ្ណោះ ។
តាមប្រភពដដែលបានប្រាប់ឲ្យដឹងបន្តទៀតថា ក្រោយពីមិត្តភក្ដិហៅបែបនេះ ជនរងគ្រោះក៏យល់ព្រម និងទើបមកស្នាក់នៅជាមួយបានរយៈពេល៣ថ្ងៃតែប៉ុណ្ណោះក៏ជួបរឿងអកុសលបែបនេះ ។ មុនពេលកើតហេតុ នៅវេលាល្ងាចថ្ងៃទី១៤ ខែកញ្ញា ឈ្មោះយ៉ាន់ វីវ៉ា បានចេញទៅធ្វើការវេនយប់បាត់ ហើយបុរសរងគ្រោះបានដេកនៅក្នុងបន្ទប់ម្នាក់ឯង ។ លុះវេលាម៉ោង៦និង១៥នាទីព្រឹកថ្ងៃទី១៥ ខែកញ្ញា ឆ្នាំ២០២៣នេះ ក្រោយចេញពីធ្វើការទៅដល់បន្ទប់ជួលវិញ ឃើញទ្វារបន្ទប់បិទជិត ហើយស្រែកហៅជនរងគ្រោះយ៉ាងណាក៏មិនឮឆ្លើយសោះ ។ ដោយមានការងឿងឆ្ងល់ មិត្តភក្ដិរូបនោះក៏ហៅម្ចាស់ផ្ទះជួលឲ្យជួយគាស់បើកបង្អូចមើល ស្រាប់តែប្រទះឃើញជនរងគ្រោះដេកស្លា.ប់បាត់ទៅហើយ។
តាមប្រភពខាងលើបានប្រាប់បន្ថែមថា ខណៈនោះបានបង្កឲ្យមានការភ្ញាក់ផ្អើលយ៉ាងខ្លាំង និងបានរាយការណ៍ជូនអាជ្ញាធរភូមិ សង្កាត់ ព្រមទាំងនគរបាលប៉ុស្តិ៍ចោមចៅទី៣បានដឹង និងចុះទៅពិនិត្យមើល ដើម្បីរាយការណ៍បន្តទៅកាន់នគរបាលការិយាល័យបច្ចេកទេសនៃស្នងការដ្ឋាននគរបាលរាជធានីភ្នំពេញចុះទៅពិនិត្យកោសល្យវិច្ច័យ ៕
ចែករំលែកព័តមាននេះ