យោងតាមការស្រាវជ្រាវថ្មីមួយបានបង្ហាញថា ការរៀនលេងឧបករណ៍តន្ត្រីណាមួយជួយឲ្យមនុស្សនៅរក្សាវ័យក្មេងបាន។
ក្រុមអ្នកស្រាវជ្រាវបានរកឃើញថា បណ្តាតន្ត្រីករដែលមានអាយុ៤៥ឆ្នាំទៅ៦៥ឆ្នាំមានការចងចាំនិងអាចស្តាប់ឮសម្លេងល្អនិងច្បាស់ជាងអ្នកដែលមិនមែនជាតន្ត្រីករ។ ការសិក្សាបានរកឃើញទៀតថា កាហ្វឹកហាត់លេងឧបករណ៍តន្ត្រីផ្តល់ឲ្យសិស្សនូវអត្ថប្រយោជន៍ក្នុងការរៀនសូត្រក្នុងថ្នាក់ ហើយវាក៏អាចលុបបំបាត់ចោលផលប៉ះពាល់អវិជ្ជមាននៃភាពចាស់តាមអាយុបានផងដែរ។
លោកស្រីសាស្ត្រាចារ្យNina Krausនាយកមន្ទីរពិសោធន៍Auditory Neuroscienceនៅសាកលវិទ្យាល័យNorthwestern Universityសហរដ្ឋអាមេរិកបានមានប្រសាសន៍ថា៖«ការហ្វឹកហាត់លេងឧបករណ៍តន្ត្រីអស់មួយជីវិតបានបង្ហាញពីការផ្តល់នូវផលប្រយោជន៍ដែលយ៉ាងហោចណាស់ក៏ទៅលើ២ផ្នែកដែរក្នុងនោះមានដូចជាជួយកែលំអការចងចាំនិងសមត្ថភាពស្តាប់ឮសម្លេងបានច្បាស់ខណៈកំពុងតែស្ថិតនៅក្នុងភាពអ៊ូអរ»។ លោកស្រីសាស្ត្រាចារ្យបានបន្តថា៖«ការពិបាកទទួលសម្លេងច្បាស់នៅក្នុងបរិយាកាសអ៊ូអរគឺជារឿងធម្មតារបស់មនុស្សវ័យចាស់ ប៉ុន្តែការបាត់បង់សោតវិញ្ញាណ(ការស្តាប់ឮ)ដោយអាយុវាជាឧបសគ្គតែមួយគត់ដែលនាំឲ្យមានភាពឯកកោនិងការថប់អារម្មណ៍ក្នុងការរស់នៅ។ ទោះជាដូច្នេះក្តី គេដឹងយ៉ាងច្បាស់ថាមនុស្សពេញវ័យដែលមានប្រព័ន្ធសោតវិញ្ញាណល្អដូចគ្នា ម្តងម្កាលអាចមានសមត្ថភាពទទួលបានសម្លេងខុសគ្នាខណៈដែលពួកគេកំពុងស្ថិតនៅក្នុងបរិយាកាសអ៊ូអរដូចគ្នា»។
ដើម្បីស្វែងរកឲ្យឃើញថាបញ្ហាខាងលើនេះមកពីមូលហេតុអ្វី អ្នកស្រាវជ្រាវនៅមន្ទីរពិសោធន៍Auditory Neuroscienceនៅសាកលវិទ្យាល័យNorthwestern Universityបានធ្វើតេស្តលើតន្ត្រីករ១៨នាក់និងអ្នកមិនមែនជាតន្ត្រីករ១៩នាក់។ ភាគច្រើននៃពួកគេទាំងនោះមានអាយុពី៤៥ឆ្នាំទៅ៦៥ឆ្នាំ ។
បណ្តាតន្រ្តីករដែលចាប់ផ្តើមលេងតន្ត្រីនៅអាយុ៩ឆ្នាំឬតិចជាងនេះ ហើយនៅតែបន្តលេងតន្ត្រីមកដល់ពេលឥឡូវនេះឃើញថាមានផលល្អច្រើនផ្នែកសតិចងចាំធៀបជាមួយអ្នកមិនមែនជាតន្ត្រីករ។ លោកស្រីKrausបានបន្ថែមថាការលេងឧបករណ៍តន្ត្រីជួយសម្រួលដល់ប្រព័ន្ធសរសៃប្រសាទ ៕
ចែករំលែកព័តមាននេះ