ក្រុមហ៊ុន Apple ប្រាប់ពីមូលហេតុបង្ខំចិត្តផ្លាស់ប្តូរប្រភេទខ្សែសាកថ្ម iPhone 15
សហរដ្ឋអាមេរិក ៖ ក្រុមហ៊ុន Apple បានបញ្ជាក់ថា iPhone 15 ស៊េរីថ្មីរបស់ខ្លួន នឹងមិនបំពាក់រន្ធសាក
សហរដ្ឋអាមេរិក ៖ ក្រុមហ៊ុន Apple បានបញ្ជាក់ថា iPhone 15 ស៊េរីថ្មីរបស់ខ្លួន នឹងមិនបំពាក់រន្ធសាកថ្ម Lightning ដែលជាកម្មសិទ្ធិរបស់ខ្លួនទៀតនោះទេ បន្ទាប់ពីសហភាពអឺរ៉ុប (EU) បានបង្ខំឱ្យមានការផ្លាស់ប្តូរនេះ។ នេះយោងតាមប្រភពពី BBC ចេញផ្សាយនៅថ្ងៃទី១៣ ខែកញ្ញា ឆ្នាំ២០២៣។
ក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកមួយនេះ បាននិយាយថា iPhone 15 ដែលត្រូវបានដាក់បង្ហាញនៅក្នុងព្រឹត្តិការណ៍ប្រចាំឆ្នាំ កាលពីថ្ងៃទី១២ ខែកញ្ញា ឆ្នាំ២០២៣ កន្លងទទៅ នឹងប្រើប្រាស់ខ្សែសាកថ្ម USB-C ជាស្តង់ដារ ដែលទទួលយកជាសកល ស្របពេលដែលនាឡិកា Apple ស៊េរីថ្មី (Apple Watch) ក៏ត្រូវបានដាក់បង្ហាញផងដែរ ជាមួយនឹងការប្រើប្រាស់បន្ទះឈីបកម្រិតខ្ពស់ជាងមុន។ ប៉ុន្តែអ្នកវិភាគម្នាក់ បានលើកឡើងថា ការធ្វើបច្ចុប្បន្នភាពពីក្រុមហ៊ុន Apple នៅឆ្នាំនេះ នឹងធ្វើឱ្យអ្នកប្រើប្រាស់ខ្លះខកចិត្ត។
ដោយសារតែការបំពាក់រន្ធសាកថ្មី ទើបជាហេតុនាំឱ្យក្រុមហ៊ុន Apple បានបញ្ចេញខ្សែសាកថ្ម USB-C-to-lightning នៅក្នុងតម្លៃ ៣៦ដុល្លារ ដោយផលិតផលនេះ គឺជាគ្រឿងបន្ថែម នៃខ្សែសាកថ្ម iPhones ឬ iPad ដែលអាចប្រើជាមួយ USB-C ថ្មី។
ក្រុមហ៊ុន Apple បាននិយាយថា រន្ធសាកថ្ម USB-C ដែលដំណើរការជាមួយកុំព្យូទ័រយួរដៃ និង iPad ជាច្រើនរបស់ Apple រួចហើយនោះ ក៏នឹងដំណើរការលើកំណែទម្រង់ថ្មី នៃកាសស្តាប់ត្រចៀក AirPods Pro និងកាសស្តាប់ត្រចៀក ដែលមានខ្សែផងដែរ។
សហភាពអឺរ៉ុបបានប្រាប់ក្រុមហ៊ុន Apple ឱ្យបោះបង់ចោលរន្ធសាកថ្ម Lightning ដែលជាកម្មសិទ្ធិរបស់ខ្លួន ដើម្បីធ្វើឱ្យជីវិតកាន់តែងាយស្រួលសម្រាប់អ្នកប្រើប្រាស់ ការសន្សំប្រាក់ និងជួយកាត់បន្ថយកាកសំណល់អេឡិចត្រូនិក។ ទោះជាយ៉ាងណាក៏ដោយ អ្នកជំនាញមួយចំនួនបានព្រមានថា ការផ្លាស់ប្តូរនេះ នឹងនាំឱ្យមានការកើនឡើងខ្សែសាកថ្ម ដែលបោះបង់ចោលនៅឆ្នាំខាងមុខ។
ក្រុមហ៊ុន Apple បានយកព្រឹត្តិការណ៍សម្ពោធរបស់ខ្លួន កាលពីថ្ងៃទី១២ ខែកញ្ញា កន្លងទៅ ដើម្បីធ្វើការសន្យាកិច្ចការពារបរិស្ថានជាបន្តបន្ទាប់អំពីឧបករណ៍ថ្មីរបស់ខ្លួន រួមទាំងការធ្វើឱ្យ Apple Watch ជំនាន់ថ្មី គឺជាអព្យាក្រឹតកាបូនជាលើកដំបូង ហើយវាក៏នឹងបង្កើនបរិមាណនៃសម្ភារៈកែច្នៃ ដែលត្រូវបានប្រើនៅក្នុងថ្ម និងផ្នែកផ្សេងទៀតនៃ Apple Watch និង iPhone ថ្មី៕
ចែករំលែកព័តមាននេះ