សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ខេត្តមណ្ឌលគិរី ដោយមានកិច្ចសហការពីមន្ទីរពាណិជ្ជកម្មខេត្ត បានចុះអប់រំណែនាំអាជីវករនៅក្នុងផ្សារក្រុងសែនមនោរម្យ អំពីការបញ្ជាក់ប្រភពពិតប្រាកដនៃ
ខេត្តមណ្ឌលគិរី ៖ នៅថ្ងៃទី១១ ខែកញ្ញា ឆ្នាំ២០២៣ ម្សិលម៉ិញនេះ សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ខេត្តមណ្ឌលគិរី ដោយមានកិច្ចសហការពីមន្ទីរពាណិជ្ជកម្មខេត្ត បានចុះអប់រំណែនាំអាជីវករនៅក្នុងផ្សារក្រុងសែនមនោរម្យ អំពីការបញ្ជាក់ប្រភពពិតប្រាកដនៃផលិតផល ឬទំនិញ ជូនដល់អតិថិជន។
តាមប្រភពព័ត៌មានពីអតិថិជន ក៏ដូចជា ភ្ញៀវទេសចរដែលបានមកទស្សនា និងទិញទំនិញដូចជាបន្លៃ ផ្លែឈើ នៅក្នុងខេត្តមណ្ឌលគិរីនោះ គឺមួយចំនួនបានជួបប្រទះនូវការកុហកបោ.កប្រាស់ពីអ្នកលក់ អំពីប្រភពដាំដុះពិតប្រាកដនៃបន្លែ ផ្លែឈើ (ដាំដុះនៅទីតាំងផ្សេងក្រៅពីខេត្តមណ្ឌលគិរី) ជាហេតុនាំឲ្យមានការខូចខាតជារួមដល់កេរ្តិ៍ឈ្មោះនៃបន្លែ ផ្លែឈើ ដែលបានបង្កបង្កើនផលនៅក្នុងខេត្តមណ្ឌលគិរី ។
មន្ត្រីជំនាញបានចុះអប់រំណែនាំ ជាលើកទី៣ ដោយឱ្យធ្វើកិច្ចសន្យាជាមួយអាជីវករលក់ដូរ បន្លែ ផ្លែឈើ នៅតំបន់មុខសួនច្បារទីរួមខេត្ត និងម្តុំស្ពាន «ពូលូង» ព្រោះតំបន់ទាំង២នេះ ជាតំបន់ដែលសម្បូរដោយភ្ញៀវទេសចរនាំគ្នាមកទិញច្រើនជាងគេ ព្រមទាំងផ្សារជនជាតិ និងម្តុំសណ្ឋាគារ «ពេជ្រគិរី» ផងដែរ អំពីការបញ្ជាក់ប្រភពច្បាស់លាស់នៃផលិតផលទំនិញដូចជា បន្លែ និងផ្លែឈើ ជូនដល់អតិថិជន។
ពាក់ព័ន្ធក្នុងករណីដែលបានប្រព្រឹត្ត ឬនៅតែបន្តកុហកបោ.កប្រាស់ដល់អតិថិជនអំពីប្រភពដើមនៃផលិតផលទំនិញ បន្លែ ផ្លែឈើ ជាបន្តទៀតនោះ អាជ្ញាធរខេត្ត ក៏ដូចជាសមត្ថកិច្ចជំនាញ នឹងអនុវត្តទៅតាមនីតិវិធីនៃច្បាប់ជាធរមាន ដោយគ្មានការអនុគ្រោះ ឬលើកលែងបន្តទៀតឡើយ៕
ចែករំលែកព័តមាននេះ