អតីត «Miss Universe Cambodia 2017» គឺកញ្ញា ប៊ី សុធារី បានចេញមុខប្រតិកម្មតបទៅកាន់បុរសជាអ្នករកស៊ីធំមួយរូប ដែលបានលើកឡើងពាក់ព័ន្ធទៅនឹងបេក្ខភាពបវរកញ្ញាកម្ពុជា ចេញទៅប្រកួតនៅលើឆាកអន្តរជាតិ ក្នុងកម្មវិធីខាងលើជំនាន់មុន គ្រាន់តែជា
រាជធានីភ្នំពេញ ៖ អតីត «Miss Universe Cambodia 2017» គឺកញ្ញា ប៊ី សុធារី បានចេញមុខប្រតិកម្មតបទៅកាន់បុរសជាអ្នករកស៊ីធំមួយរូប ដែលបានលើកឡើងពាក់ព័ន្ធទៅនឹងបេក្ខភាពបវរកញ្ញាកម្ពុជា ចេញទៅប្រកួតនៅលើឆាកអន្តរជាតិ ក្នុងកម្មវិធីខាងលើជំនាន់មុន គ្រាន់តែជាការអមឆាកតែប៉ុណ្ណោះ ពោលគឺមិនដែលទទួលបានជ័យជំនះនោះឡើយ ។
វីដេអូឃ្លីបដែលលោកឧកញ៉ា ចិន សំណាង បានធ្វើសន្និសីទសារព័ត៌មានមួយ កាលពីពេលកន្លងទៅ ត្រូវបានគេចែកចាយពេញបណ្តាញសង្គម ដោយនៅក្នុងការអធិប្បាយរបស់លោកនាពេលនោះ ក៏មានការលើកឡើងទៅលើចំណុចមួយថា «បេក្ខភាពបវរកញ្ញាដែលតំណាងកម្ពុជា ចេញទៅប្រកួតលើឆាកអន្តរជាតិ គឺមិនដែលបានជាប់ម្តងណាឡើយ ធ្លាក់រហូត ពោលគឺប្រៀបបាននឹងការទៅអមឆាកដូច្នេះដែរ»។
បើទោះបីជាការលើកឡើងជាច្រើនរបស់លោក ចិន សំណាង នាពេលនោះ គឺភាគច្រើនលោកបានបង្ហាញបំណងចង់លើកស្ទួយ និងចង់ទិញកម្មវិធី «Miss Universe» មករៀបចំក៏ដោយ ប៉ុន្តែការលើកឡើងត្រង់ចំណុចមួយនេះ បានធ្វើឱ្យអ្នកពាក់ព័ន្ធ ជាពិសេសបេក្ខនារីដែលធ្លាប់ធ្វើជាតំណាងកម្ពុជា ទៅចូលរួមប្រកួត ហាក់មិនសប្បាយចិត្តនោះឡើយ ។
ដោយឡែកក្នុងនាមជាអតីតបេក្ខនារីធ្លាប់ចូលរួមប្រកួត «Miss Universe» ម្នាក់ដែរនោះ កញ្ញា ប៊ី សុធារី បានសម្តែងការមិនសប្បាយចិត្តចំពោះការលើកឡើងរបស់លោក ចិន សំណាង ខាងលើនេះឡើយ ក្នុងពេលការចូលរួមរបស់នាងនាពេលនោះ គឺនាងបានពុះពារប្រឹងប្រែងយ៉ាងខ្លាំង និងអស់ពីសមត្ថភាព ក្នុងនាមតំណាងកម្ពុជា។ បើទោះបីជាអំឡុងពេលនោះ វិស័យបវរកញ្ញានៅកម្ពុជា ពុំសូវមានអ្នកចាប់អារម្មណ៍ខ្លាំងក៏ដោយ ។
កញ្ញា ប៊ី សុធារី បានបង្ហោះសំណេររបស់ខ្លួនតាមបណ្តាញសង្គមថា «ឆ្នាំដំបូងគេ អមឆាក? និយាយពីបុគ្គល ឬក៏និយាយពីស្ថាប័ន? សូមនិយាយអោយស្រួលបួលបង ខ្ញុំក៏ស្គាល់បងឯងយូរដែរហើយ ហើយកុំនិយាយដៀមដាម ព្រោះកាលខ្ញុំទៅប្រកួត ក៏ស្ថិតក្រោមស្ថាប័នតែមួយជាមួយអ្នកទាំង៥នាក់ផ្សេងទៀតដែរ»។
នាងបញ្ជាក់ថា «ស្ថិតក្រោមស្ថាប័នតែមួយ ៦ឆ្នាំហើយអត់ទាន់មានអ្នកណាចូល top ទេ ចឹងហើយកុំ mention តែឆ្នាំដំបូង ទោះបីខ្ញុំចេញមកហើយក៏ពិតមែន តែកាលប្រកួត គឺនៅក្រោមស្ថាប័នចាស់ អញ្ចឹងហើយកុំនិយាយផ្ដោតលើបុគ្គល ព្រោះកាលដែលខ្ញុំទៅប្រកួត គឺខ្ញុំប្រឹងប្រែងណាស់ សូម្បីឈុតប្រចាំថ្ងៃមួយចំនួនក៏ខ្ញុំទិញ និងរក sponsor ដោយខ្លួនឯងដែរ តែខ្ញុំយល់ ព្រោះពេលនោះនៅខ្មែរមិនទាន់ល្បីវិស័យបវរកញ្ញា ទើបមិនសូវមានអ្នកគាំទ្រ ហើយបើទោះបីជា អមឆាក តែខ្ញុំអមដោយមោកទភាព ឈរដោយស្នាមញញឹម តំណាងអោយប្រជាជនខ្មែរ និងប្រទេសខ្មែរទាំងមូល មិនបានគ្រាន់តែនិយាយ តែមានទង្វើជាក់ស្ដែង និងជាការចង់ចាំជាប្រវត្តិសាស្ត្រ»៕
ចែករំលែកព័តមាននេះ