ទីតាំងកន្លែងថែទាំក្មេងកំព្រា និងមនុស្សចាស់ជរាមួយកន្លែង ស្ថិតនៅឃុំថ្មកែវ ឃុំត្រប់ ស្រុកបាធាយ បានបង្កឲ្យមានភាពចម្រូងចម្រាស់ រហូតដល់មន្ត្រីជំនាញមន្ទីរសង្គមកិច្ចខេត្ត ចុះទៅពិនិត្យ ដើម្បីធ្វើលិខិតលាយលក្ខណ៍អក្សរបញ្ជូនទៅកាន់ក្រសួងសង្គមកិច្ច ដោយសារតែ
ខេត្តកំពង់ចាម ៖ ទីតាំងកន្លែងថែទាំក្មេងកំព្រា និងមនុស្សចាស់ជរាមួយកន្លែង ស្ថិតនៅឃុំថ្មកែវ ឃុំត្រប់ ស្រុកបាធាយ បានបង្កឲ្យមានភាពចម្រូងចម្រាស់ រហូតដល់មន្ត្រីជំនាញមន្ទីរសង្គមកិច្ចខេត្ត ចុះទៅពិនិត្យ ដើម្បីធ្វើលិខិតលាយលក្ខណ៍អក្សរបញ្ជូនទៅកាន់ក្រសួងសង្គមកិច្ច ដោយសារតែមិនមានច្បាប់អនុញ្ញាត។
បើតាមលោក ង៉ោ ជោត មេឃុំត្រប់ បានមានប្រសាសន៍ឲ្យដឹងនារសៀលថ្ងៃទី១០ ខែកញ្ញា ឆ្នាំ២០២៣ថា ទីតាំងកន្លែងថែទាំកុមារកំព្រា និងមនុស្សចាស់នេះ សាងសង់លើផ្ទៃដីទំហំ៣៥ម៉ែត្រគុណនិង៤៥ម៉ែត្រ ជាកម្មសិទ្ធិរបស់អតីតព្រះសង្ឃមួយអង្គ នៅរាជធានីភ្នំពេញ និងមានយាយព្រីងម្នាក់ ដែលជាអ្នកនៅចាំមើលថែទាំ។ កន្លែងនេះ ត្រូវបានបង្កើតឡើងនៅឆ្នាំ២០១៩ ហើយកុមារកំព្រានៅក្នុងឃុំត្រប់ គឺមានតែ៦នាក់ប៉ុណ្ណោះ ត្រូវបានយកមកនៅកន្លែងនេះ។
លោកមេឃុំត្រប់ មានប្រសាសន៍តាមទូរស័ព្ទបន្តឲ្យដឹងទៀតថា រហូតមកដល់ឆ្នាំ២០២០ និង ២០២១ កន្លែងនេះ ក៏ត្រូវបានបិទជាបណ្ដោះអាសន្ន ក្នុងពេលដែលមានជំងឺកូវីដបានផ្ទុះឡើង។ ហើយនៅឆ្នាំ២០២២ ក៏ចាប់ផ្ដើមបើកដំណើរការឡើងវិញ ដោយលោកយាយព្រីង ជាអ្នកមើលការថែទាំទីនោះ និងបានប្រមែប្រមូលកុមារកំព្រា ព្រមទាំងមនុស្សចាស់ជរា មករស់នៅ ហើយមានពេលខ្លះក៏មានសប្បុរសជនចុះមកចែកអំណោយជាហូរហែផងដែរ តែក្នុងនាមអាជ្ញាធរមិនបានចូលរួមនោះទេ។
លោកមេឃុំ បានបញ្ជាក់ថា កាលពីកន្លងទៅ មានអ្នកកាសែតម្នាក់រស់នៅស្រុកជើងព្រៃ ខេត្តកំពង់ចាម បានមកសុំអង្ករចំនួន៥បាវ និងលុយ១លាន៥៥ម៉ឺនរៀលលើកទី១ លុះលើកទី២ ក៏មកសុំអង្ករ១បាវ លុយ២០ម៉ឺនរៀល ថែមទាំងសុំដាក់ខែ ទារអង្ករ១បាវ និងលុយ១០ម៉ឺនរៀលទៀត។ ហើយលើកចុងក្រោយ នៅថ្ងៃទី៨ ខែកញ្ញា ឆ្នាំ២០២៣នេះ អ្នកកាសែតរូបនោះ ក៏មកសុំលុយលោកយាយព្រីង ដែលជាអ្នកមើលការខុសត្រូវកុមារកំព្រាមិនបាន ក៏ឡាយវីដេអូតាមទូរស័ព្ទដៃជាសាធារណៈ ដើម្បីឲ្យមហាជនបានឃើញ និងដឹងឮ។ គឺចំពេលដែលលោកប្រធានមន្ទីរសង្គមកិច្ចខេត្ត ចុះមកពិនិត្យមើលដោយផ្ទាល់តែម្ដង។ ហើយអាជ្ញាធរមូលដ្ឋាន រង់ចាំមើលថ្នាក់លើជាអ្នកសម្រេចថា តើទីនេះឲ្យដំណើរការទៅមុខទៀត ឬមួយក៏យ៉ាងណានោះ?។
សូមបញ្ជាក់ថា ទីតាំងដីដែលកុមារកំព្រា និងមនុស្សចាស់ជរា បានស្នាក់នៅ គឺជាកម្មសិទ្ធិរបស់អតីតព្រះសង្ឃមួយអង្គនៅរាជធានីភ្នំពេញ ដែលបានទិញដីពីប្រជាពលរដ្ឋមកបង្កើតជាកន្លែងថែទាំមនុស្សចាស់ជរា និងក្មេងកំព្រា។
បើតាមលោកយាយព្រីង ជាអ្នកមើលការខុសត្រូវនៅកន្លែងកុមារកំព្រា និងមនុស្សចាស់ ស្ថិតក្នុងស្រុកបាធាយនេះ ក៏បានប្រាប់តាមទូរស័ព្ទឱ្យដឹងដែរថា អ្នកកាសែតម្នាក់ដែលបានមកទារលុយពីគាត់ចំនួន៣៥ម៉ឺនរៀល អង្ករ១បាវ មី១កេស ទឹកស៊ីត្រី១យួរ ទឹកស៊ីអ៊ីវ១យួរ។ ហើយលើកទី២ ចូលឡានមកកន្លែងគាត់ ដាក់អង្ករ៤បាវ មី៣កេស និងគំរា.មទារប្រាក់ចំនួន៥០០ដុល្លារ បើមិនបាន គឺនឹងឡាយផ្ទាល់តែម្ដង។
លោកយាយព្រីង បន្តថា តែគាត់មិនមានលុយនោះទេ ព្រមទាំងបាននិយាយអង្វរ លុះពេលក្រុមអ្នកកាសែតបើករថយន្តចេញទៅ ដែលមានគ្នាចំនួន៤នាក់ កាលពីក្នុងខែសីហា ឆ្នាំ២០២៣ គាត់បានវេរលុយឲ្យទៅអ្នកកាសែតម្នាក់មានឈ្មោះហាក់ ចំនួន១លាន២០ម៉ឺនរៀលជាលុយដែលខ្ចីពីចិនផ្សារមកផ្ញើឱ្យ ហើយអ្នកកាសែតរូបនោះ ថែមទាំងពោលពាក្យថា «កូនមិនឡាយកន្លែងម្ដាយទេ ព្រោះកន្លែងនេះមានច្បាប់ត្រឹមត្រូវ។ ព្រោះមិនចង់ឲ្យមានបញ្ហាលេចឮដល់មន្ទីរសង្គមកិច្ចខេត្ត»។ លោកយាយព្រីង បានបង្ហើបថា «ដីដែលបង្កើតកន្លែងកុមារកំព្រា និងមនុស្សចាស់រស់នៅនេះ ពិតជារបស់ព្រះសង្ឃមួយអង្គនៅរាជធានីភ្នំពេញ ដែលបានផ្ញើបច្ច័យឲ្យគាត់ទិញមានទំហំ៣៣ម៉ែត្រគុណនិង៤៤ម៉ែត្រ»។
លោក ទូច វឌ្ឍនា ប្រធានមន្ទីរសង្គមកិច្ច និងអតីតយុទ្ធជនពិការខេត្ត ក៏បានប្រាប់តាមទូរស័ព្ទឱ្យដឹងនារសៀលថ្ងៃទី១០ ខែកញ្ញា នេះដែរថា ពេលដែលរូបលោកដឹកនាំមន្ត្រីក្រោមឱវាទចុះមកពិនិត្យមើលកន្លែងទីតាំងស្នាក់នៅរបស់កុមារកំព្រា និងមនុស្សចាស់នេះ គឺពុំមានច្បាប់អនុញ្ញាតនោះទេ។ ហើយក្នុងពេលដែលចុះពិនិត្យផ្ទាល់ឃើញ គឺឃើញមានក្មេងកំព្រាចំនួន៤៣នាក់ និងមនុស្សចាស់ជរាចំនួន១៩នាក់ ដោយឡែកមានក្មេងៗខ្លះទៀតបាននាំគ្នាទៅរៀននៅសាលាបាត់ហើយ ពុំបានរាប់បញ្ចូលនោះទេ។ ហើយរូបលោក ក៏បានទទួលស្គាល់ថា មានអ្នកកាសែតម្នាក់នៅស្រុកជើងព្រៃ ពិតជាបានទារលុយពីយាយព្រីងចំនួន២លើកមែន ទោះបីជាពេលចុងក្រោយ ខឹងមិនឱ្យ ក៏ឡាយតាមទូរសព្ទតែម្ដង។
លោកបន្តទៀតថា បើសិនជាអ្នកព័ត៌មានល្អ គួរណាតែទូរស័ព្ទរាយការណ៍ជូនទៅលោកអភិបាលស្រុកបាធាយ ដើម្បីមានវិធានការ ប្រសិនណាបើពិនិត្យមើលឃើញកន្លែងនេះ មិនទាន់មានច្បាប់អនុញ្ញាត។
ជាមួយគ្នានោះ មន្ទីរក៏បានផ្ញើលិខិតទៅក្រសួងសង្គមកិច្ច ដើម្បីពិនិត្យ ប្រសិនបើកន្លែងនេះ ត្រូវបានបិទ ក្មេងកំព្រាឪពុកម្ដាយនឹងត្រូវបញ្ជូនមកឲ្យស្នាក់នៅមណ្ឌលកុមារកំព្រាខេត្តកំពង់ចាម។ ចំណែកក្មេងកំព្រាដែលអត់ឪពុក ឬម្ដាយ ត្រូវបញ្ជូនទៅឲ្យគ្រួសារវិញ។
ដោយឡែកអ្នកកាសែតអនឡាញម្នាក់នោះ ឈ្មោះហាក់ ដែលខាងអ្នកគ្រប់គ្រងមណ្ឌលកុមារកំព្រាចោទប្រកាន់ថា ទទួលលុយពីយាយព្រីង វេរលុយឱ្យតាមរយៈប្រព័ន្ធទូរស័ព្ទនោះ នារសៀលថ្ងៃទី១០ ខែកញ្ញា ឆ្នាំ២០២៣នោះ ភ្នាក់ងារយើងបានទូរស័ព្ទចំនួន២ទៅ៣ដងហើយ តែគេឆ្លើយថា លេខនេះមិនត្រឹមត្រូវឡើយ។
ចែករំលែកព័តមាននេះ