ADផ្ទាំងផ្សព្វផ្សាយពាណិជ្ជកម្ម

ឥណ្ឌាដើរចា.ប់.សុន.ខអនាថានៅទីក្រុងញូដេលីដើម្បីកុំឱ្យខ្មាសភ្ញៀវដែលចូលរួមកិច្ចប្រជុំជីម្ភៃ

1 ឆ្នាំ មុន

០៨ ខែ កញ្ញា ឆ្នាំ ២០២៣ ម៉ោង ០៧:១៣

ដើម្បីលើកមុខមាត់ប្រទេសជាតិរបស់ខ្លួនកុំឱ្យអាប់ឱននៅក្នុងអំឡុងពេលរៀបចំកិច្ចប្រជុំកំពូលជីម្ភៃពីថ្ងៃទី៩ដល់ទី១០ ខែកញ្ញា, អាជ្ញាធរឥណ្ឌាចាប់ផ្ដើមដើរចាប់សត្វសុនខអនាថាដែលដើរពាសវាល ពាសកាល នៅតាមដងផ្លូវនៃរដ្ឋធានីញូដេលី។ បន្ទាប់មក, សត្វសុនខទាំងនេះនឹងយកទៅដាក់ជុំគ្នានៅក្នុងទីកន្លែងសមគួរជាបណ្ដោះអាសន្ន។ អាជ្ញាធរក៏បានចុះរុះរើសំណង់មិនរៀបរយ ឬហៅម៉្យាងទៀតថាសំណង់អនាធិបតេយ្យនៅតំបន់ជាយក្រុងញូដេលី។ គេក៏ត្រៀមប្រើប្រាស់សត្វស្វា១ប្រភេទឈ្មោះឡាងហ្គួ (Langur) ដើម្បីបន្លាចសត្វស្វាក្រិសឱ្យលាក់ខ្លួនពួនអាត្មាស្ងាត់ៗ និងផ្អាកចេញមកទីសាធារណៈ។

យោងតាមទិន្នន័យរបស់រដ្ឋាភិបាល, នៅទូទាំងទីក្រុងញូដេលីមានសុនខអនាថាជាង៦ម៉ឺនក្បាល។ ពួកវាអាចទទួលបានចំណីអាហារពីជនជាតិឥណ្ឌាដែលរស់នៅទីក្រុងញូដេលីម្ភៃលាននាក់។ ប៉ុន្តែករណីសត្វសុនខខាំមនុស្សក៏ឧស្សាហ៍កើតមានជាហូរហែផងដែរ។ កាលពីខែសីហា អាជ្ញាធរចេញបទបញ្ជាដើរចាប់សុនខទុកដាក់នៅទីកន្លែងឆ្ងាយៗដើម្បីធ្វើម៉េចកុំឱ្យភ្ញៀវដែលចូលរួមកិច្ចប្រជុំជីម្ភៃអាចមើលឃើញ។ ប៉ុន្តែកន្លងផុតទៅបានតែ២ប៉ុណ្ណោះ អាជ្ញាធរលែងអនុវត្តវិធីនេះតទៅទៀត។

ក្រុមសកម្មជនខាងការពារសិទ្ធិរបស់សត្វត្អូញត្អែរថាពេលខ្លះក្រុមសេនាជនរបស់ក្រុងដើរទាក់សុនខយ៉ាងអនាធិបតេយ្យដោយគ្មានគិតពីក្រមសីលធម៌សូម្បីតែបន្តិច។ សូម្បីតែសំណាញ់ ឬការចាប់សុនខដោយដៃមនុស្សក៏ពួកគេមិនអនុវត្តដែរ។ រហូតមកដល់ពេលនេះ គេប្រមូលបានសុនខជិត១ពាន់ក្បាលហើយនៅតាមព្រលានយន្តនោះ និងបរិវេណជុំវិញកន្លែងប្រជុំជីម្ភៃ។

គេឃើញថាក្រុមអ្នកចាប់សុនខច្រើនប្រើឈើវែង និងខ្សែទាក់ជើងតែម្ដង។ ពួកគេប្រហែលជាខ្ពើមឆ្អើមចំពោះសត្វសុនខទាំងនោះ។ ហេតុតែគ្នាជាសុនខអនាថាមិនបានដុសសាប៊ូក្រអូបដូចសុនខអ្នកមាន។ ម៉្លោះហើយ ពួកគេចាប់អូសននាលដើម្បីចាប់បញ្ចូលទៅក្នុងឡានតែម្ដង។ មន្ត្រីអឹនជីអូ (NGO) ម្នាក់យល់ថាប្រទេសឥណ្ឌាធ្វើដាក់សត្វដល់ថ្នាក់នេះហាក់ដូចជាមានចរិតដាច់ខាតពេកហើយ។ គេមិនត្រូវភ្លេចថាពាក្យស្លោករបស់កិច្ចប្រជុំជីម្ភៃគឺ ផែនដីតែ១, គ្រួសារតែ១ និងអនាគតតែ១។

ប៉ុន្តែពួកគេបានត្រឹមតែនិយាយឱ្យពីរោះស្ដាប់នៅលើបបូរមាត់តែប៉ុណ្ណោះ។ តើអនាគតរួមតែ១នៅត្រង់ណាបើពួកគេមិនខ្វាយខ្វល់អំពីសុខទុក្ខរបស់សត្វដែលរស់នៅជាមួយមនុស្សផងហ្នឹង? អង្គការអឹនជីអូខ្លះ ដោយសារអាណិតសុនខពេក ពួកគេយល់ថាបើការដើរទាក់សុនខធ្វើឡើងដោយភាពព្រៃផ្សៃដល់ថ្នាក់ហ្នឹង ពួកគេគួរកុំធ្វើបែបហ្នឹងអីប្រហែលជាល្អជាង។

ពួកគេយល់ផ្ទុយពីអ្វីដែលអាជ្ញាខ្លាចភ្ញៀវអន្តរជាតិឃើញសុនខអនាថាខ្លាចប៉ះពាល់មុខមាត់ជាតិ។ ពួកគេយល់ថាបើយើងចេះយកអាសាសុនខ ចេញដាក់ចំណីឱ្យវាស៊ី ប្រហែលជាថ្នាក់ដឹកនាំដែលចូលរួមនៅក្នុងកិច្ចប្រជុំនេះកោតសរសើរយើងទៅវិញទេ។ ទោះជាយ៉ាងណាក្ដី អាជ្ញាធរធានាថាពួកគេគ្រាន់តែចាប់សុនខយកទៅទុក១សំណើសិន។ មិនយូរទេ ពួកគេគង់តែដោះលែងមកវិញជាមិនខាន។

ពួកវាឥឡូវនេះមានសុខភាពល្អជាធម្មតាទេ។ បើពួកវាមានបញ្ហាសុខភាព គេមានពេទ្យសត្វចាំជួយព្យាបាល។ តាមពិត ពួកអ្នកចាប់សុនខទាំងនោះមិនមែនសុទ្ធតែគ្មានទឹកចិត្តសប្បុរសធម៌គ្រប់គ្នាទេ។ ក្រុម១ឈ្មោះហ្វ្រិនឌីកូ (Friendicoes) ប្រាប់ថាពួកគេប្រើប្រាស់សំណាញ់ចាប់បានសុនខ២៣៤ក្បាល និងដឹកពួកវាយកទៅផ្គត់ផ្គង់ចំណីអាហារនៅក្នុងទីជម្រកចំនួនបី៕

ប្រភព៖ Reuters
https://www.straitstimes.com/asia/after-slums-and-monkeys-delhi-removes-stray-dogs-from-streets-as-g20-nears