ADផ្ទាំងផ្សព្វផ្សាយពាណិជ្ជកម្ម

កូរ៉េខាងត្បូងសូមឱ្យមានការរួបរួមគ្នាដោះស្រាយបញ្ហានុយក្លេអ៊ែរកូរ៉េខាងជើង

1 ឆ្នាំ មុន

០៦ ខែ កញ្ញា ឆ្នាំ ២០២៣ ម៉ោង ១៨:០៥

ប្រធានាធិបតីកូរ៉េខាងត្បូង លោកយុនសុខយូល (Yoon Suk Yeol) បានជំរុញឱ្យសហគមន៍អន្តរជាតិដាក់ចេញវិធានការឆ្លើយតបដោយភាពម៉ឺងម៉ាត់ចំពោះកម្មវិធីនុយក្លេអ៊ែរ និងគ្រាប់មីស៊ីលរបស់កូរ៉េខាងជើង។ លោកយល់ថាធ្វើបែបនេះដើម្បីសម្រេចឱ្យបានតាមផែនការកាត់រំសាយកម្មវិធីនុយក្លេអ៊ែរ។ ខាងលើនេះជាការបង្ហើបឱ្យដឹងពីខុទ្ទកាល័យរបស់លោកយុន។

លោកអំពាវនាវយ៉ាងដូច្នេះនៅពេលទៅចូលរួមកិច្ចប្រជុំកំពូលកូរ៉េខាងត្បូង និងអាស៊ាននៅទីក្រុងហ្សាកាតា ប្រទេសឥណ្ឌូណេស៊ី។ លោកបានរំលេចឱ្យឃើញថាវាជារឿងចាំបាច់ណាស់ដែលត្រូវមានវិធានការឆ្លើយតបដោយម៉ឺងម៉ាត់ និងដោយរួបរួមគ្នាពីសហគមន៍អន្តរជាតិដើម្បីកាត់រំសាយកម្មវិធីនុយក្លេអ៊ែរជាស្ថាពរ។ បើមិនដូច្នេះទេ គ្រោះគំរាមកំហែងដោយមីស៊ីល និងនុយក្លេអ៊ែររបស់កូរ៉េខាងជើងកាន់តែមានសភាពស្រួចស្រាល់។

លោកបានបង្ហើបឱ្យដឹងពីផែនការបង្កើតគំនិតផ្ដួចផ្ដើមផ្ដួចផ្ដើមរួបរួមគ្នារវាងកូរ៉េ និងអាស៊ាន។ លោកធ្លាប់បានចែករំលែកចក្ខុវិស័យនេះនៅពេលទៅចូលរួមកិច្ចប្រជុំកំពូលអាស៊ានកាលពីឆ្នាំ២០២២។ នេះជាផ្នែក១នៃការពង្រឹងភាពជាដៃគូយុទ្ធសាស្ត្រជាមួយនឹងបណ្ដាប្រទេសនៅក្នុងតំបន់។

នៅក្នុងវិស័យសន្តិសុខជាតិ, លោកថ្លែងថាកូរ៉េខាងត្បូងនឹងលើកកម្ពស់ការពិគ្រោះយោបល់ពាក់ព័ន្ធនឹងកិច្ចសហការខាងអាវុធ និងការពារជាតិជាមួយសមាគមអាស៊ាន។ ទន្ទឹមនឹងនោះ, លោកក៏ចង់ពង្រឹងកិច្ចសហការផ្នែកសន្តិសុខព័ត៌មានវិទ្យា, ការប្រយុទ្ធប្រឆាំងនឹងបទល្មើសឆ្លងដែន និងសន្តិសុខលំហសមុទ្ទ។ លោកចង់បំប៉នសមត្ថភាពផ្នែកឌីជីថលដល់យុវជនអាស៊ាន, រួមចំណែកអភិវឌ្ឍដោយចីរភាពនៅក្នុងប្រទេសចំនួន៤នៃអនុតំបន់ទន្លេមេគង្គ និងបញ្ហាអាកាសធាតុ និងជំងឺឆ្លង។

នៅក្នុងរឿងដាច់ដោយឡែក១ទៀត, លោកយុនសុខយូលក៏បាននិយាយរម្លឹកអំពីគម្រោងបង្កើតយន្តការនៃកិច្ចសហប្រតិបត្តិការថ្មី១នៅពេលលោកចូលរួមកិច្ចជំនួបកំពូលត្រីភាគីជាមួយលោកបៃដិន និងលោកគីស៊ីដាក់ នាយករដ្ឋមន្ត្រីជប៉ុន។ កាលនោះ, ភាគីទាំង៣ឯកភាពគ្នាថានឹងសម្របសម្រួលយុទ្ធសាស្ត្រឥណ្ឌូ-ប៉ាស៊ីហ្វិក និងបង្កើតក្របខណ្ឌនៃកិច្ចសហប្រតិបត្តិការថ្មី។ គម្រោងនេះដឹកនាំដោយអាស៊ាន។

លោកបានស្នើសុំការគាំទ្រពីអាស៊ានចំពោះកូរ៉េខាងត្បូងដែលត្រៀមខ្លួនប្រកួតប្រជែងធ្វើជាម្ចាស់ផ្ទះនៃពិធីតាំងពិព័រណ៍ពិភពលោកឆ្នាំ២០៣០នៅទីក្រុងពូសាន (Busan)។ លោកបានរំលេចឱ្យឃើញពីទំនាក់ទំនងពិសេសរវាងអាស៊ាន និងកូរ៉េខាងត្បូងដែលធ្លាប់ធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន-កូរ៉េខាងត្បូងកាលពីឆ្នាំ២០១៤ម្ដង និងឆ្នាំ២០១៩ម្ដងទៀត៕

ប្រភព៖ Yonhap
https://en.yna.co.kr/view/AEN20230906003800315