អតីតតារាសម្តែង និងចម្រៀងជើងចាស់អ្នកស្រី ទេស មន្ថា បានទទួលមរណភាពហើយ កាលពីថ្ងៃទី៥ ខែកញ្ញា ឆ្នាំ២០២៣ម្សិលម៉ិញនេះ ក្នុងជន្មាយុ៦៥ឆ្នាំ បន្ទាប់អ្នកស្រីបានជម្នះនូវជំងឺប្រចាំកាយអស់រយៈពេលជាច្រើនឆ្នាំមកហើយ ខណៈពេលដែលក្រុមគ្រួសាររបស់អ្នកស្រី កំពុងតែ
រាជធានីភ្នំពេញ ៖ អតីតតារាសម្តែង និងចម្រៀងជើងចាស់អ្នកស្រី ទេស មន្ថា បានទទួលមរណភាពហើយ កាលពីថ្ងៃទី៥ ខែកញ្ញា ឆ្នាំ២០២៣ម្សិលម៉ិញនេះ ក្នុងជន្មាយុ៦៥ឆ្នាំ បន្ទាប់អ្នកស្រីបានជម្នះនូវជំងឺប្រចាំកាយអស់រយៈពេលជាច្រើនឆ្នាំមកហើយ ខណៈពេលដែលក្រុមគ្រួសាររបស់អ្នកស្រី កំពុងតែមានការខ្វះខាតខ្លាំង។
ពេលនេះផងដែរ ស.ពរបស់អ្នកស្រី ទេស មន្ថា ត្រូវបានក្រុមគ្រួសារតម្កល់ធ្វើបុណ្យតាមប្រពៃណីនៅក្នុងវត្តទួល ស្ថិតក្នុងខណ្ឌឬស្សីកែវ រាជធានីភ្នំពេញ ហើយនឹងត្រូវបូជានៅថ្ងៃទី៦ ខែកញ្ញា ឆ្នាំ២០២៣ នេះហើយ។
បើតាមកូនប្រុសរបស់អ្នកស្រី ទេស មន្ថា បានអះអាងប្រាប់កោះសន្តិភាពតាមរយៈសារអេឡិចត្រូនិចថា «មុនពេលម្តាយរបស់លោកទទួលមរណភាពនាពេលនេះ គឺគាត់បានផ្ទុកនូវជំងឺជាច្រើនមុខដូចជា ៖ ក្រពះ ពោះវៀន និងថ្លើម ហើយថ្មីៗនេះផងដែរ ម្តាយរបស់លោកក៏ទើបតែទទួលការវះកាត់ផងដែរ»។
លោកបញ្ជាក់ថា «ការស្លា.ប់របស់ម្តាយនាពេលនេះ គឺចំពេលដែលកូនចៅកំពុងតែមានការខ្វះខាតយ៉ាងខ្លាំង ដោយមិនមានថវិកាគ្រប់គ្រាន់សម្រាប់ធ្វើបុណ្យម្តាយឲ្យបានសមរម្យនោះឡើយ»។
លោកថា «ត្បិតកូនចៅសុទ្ធតែមានគ្រួសារហើយក្តី ប៉ុន្តែកូនចៅទាំងអស់ក៏មានជីវភាពខ្វះខាតនៅក្នុងគ្រួសារដែរ មិនអាចមានលទ្ធភាពគ្រប់គ្រាន់សម្រាប់ការរៀបចំបុណ្យស.ពម្តាយឲ្យបានយូរនោះឡើយ»។
យ៉ាងណា បើតាមកូនប្រុសអ្នកស្រី ទេស មន្ថា ថា កន្លងមក បើទោះបីជាម្តាយរបស់លោកបានបញ្ចប់អាជីពសិល្បៈអស់ជាច្រើនឆ្នាំក្តី ប៉ុន្តែម្តាយរបស់លោកក៏តែងតែទទួលអំណោយពីសមាគមសិល្បករខ្មែរជាបន្តបន្ទាប់ផងដែរ»។
កូនប្រុសរបស់អ្នកស្រី កែវ មន្ថា បានលើកឡើងបន្ថែមថា «ម្តាយរបស់លោក ក៏ជាអ្នកសិល្បៈធ្លាប់មានកេរ្តិ៍ឈ្មោះមួយរូបផងដែរ ដោយម្តាយរបស់លោកធ្លាប់ជាអ្នកចម្រៀងទទួលបានពានរង្វាន់ចំណាត់ថ្នាក់លេខ២ កាលពីអំឡុងឆ្នាំ៩០ជាង។ ចាប់ពីពេលនោះមក ម្តាយរបស់លោកក៏បានចាប់អាជីពចម្រៀង និងតារាសម្តែងតាំងពីពេលនោះមក រហូតដល់អំឡុងឆ្នាំ២០០០ ទើបម្តាយរបស់លោកផ្អាកការងារសិល្បៈនេះ ដោយសារតែរួមរឹតដោយជំងឺ»។
លោកបញ្ជាក់ថា «ជំងឺជាច្រើនមុខបានញាំញីម្តាយរបស់លោកអស់រយៈពេលជាច្រើនឆ្នាំមកហើយ ដែលតម្រូវឲ្យម្តាយរបស់លោកសម្រាកព្យាបាលរយៈពេលយូរ ទាំងការព្យាបាលនៅផ្ទះ និងនៅមន្ទីរពេទ្យ។ យ៉ាងណា ដោយសារតែជំងឺម្តាយរបស់លោកកាន់តែធ្ងន់ធ្ងរ និងគ្មានលទ្ធភាពសម្រាប់ថ្លៃព្យាបាលផងនោះ នៅទីបំផុតម្តាយរបស់លោកក៏បានទទួលមរណភាពនាពេលនេះតែម្តង»។
ជាការកត់សម្គាល់ បន្ទាប់ពីទទួលបាននូវដំណឹងពីមរណភាពរបស់អ្នកស្រី ទេស មន្ថា នាពេលនេះ គេឃើញលោក អ៊ឹម ជីវ៉ា បានចុះទៅទីកន្លែងប្រារព្ធបុណ្យស.ព និងបាននាំយកថវិកាពីសប្បុរសជនចំនួន៣០០ដុល្លារ ប្រគល់ជូនគ្រួសារអ្នកស្រី ដើម្បីជួយសម្រាលដល់ការលំបាក ខណៈកំពុងតែខ្វះខាតនៅក្នុងការធ្វើបុណ្យនាពេលនេះផងដែរ៕
ចែករំលែកព័តមាននេះ