ថ្មីៗនេះ គេសង្កេតឃើញក្រុមឈ្មួញកំពុងសម្រុកនាំជ្រូកពីទឹកដីខ្មែរឆ្លងកាត់ច្រករបៀងដេ២ ស្ថិតក្នុងឃុំ២ធ្នូ ស្រុកស្នួល ខេត្តក្រចេះ ចូលទៅប្រទេសវៀតណាម ទាំងយប់ទាំងថ្ងៃ ដោយមិនដឹងថា
ខេត្តក្រចេះ ៖ ថ្មីៗនេះ គេសង្កេតឃើញក្រុមឈ្មួញកំពុងសម្រុកនាំជ្រូកពីទឹកដីខ្មែរឆ្លងកាត់ច្រករបៀងដេ២ ស្ថិតក្នុងឃុំ២ធ្នូ ស្រុកស្នួល ខេត្តក្រចេះ ចូលទៅប្រទេសវៀតណាម ទាំងយប់ទាំងថ្ងៃ ដោយមិនដឹងថា តើស្របច្បាប់ ឬគេចពន្ធនោះទេ?។
បើតាមប្រភពព័ត៌មាន បានអោយដឹងថា រថយន្តទ្រុងដឹកជ្រូករាប់សិបក្បាលក្នុងមួយគ្រឿងៗ ឆ្លងកាត់ច្រករបៀងដេ២ ចូលទៅប្រទេសវៀតណាម ហាក់ពុំមានការត្រួតពិនិត្យនោះទេ។ ហើយប្រជាពលរដ្ឋងឿងឆ្ងល់ថា ហេតុអ្វីបានជារថយន្តដឹកជ្រូកទាំងនោះ មិនឆ្លងកាត់ទៅតាមច្រកទ្វារធំ បែរជាឆ្លងកាត់ច្រករបៀងទៅវិញ? ហើយបើតាមដឹង ច្រករបៀងនោះភាគច្រើនជាច្រកគេចពន្ធទេតើ។
ប្រភពព័ត៌មានបន្តថា ច្រករបៀងដេ២នោះ យ៉ាងហោចណាស់មានរថយន្តជាច្រើនគ្រឿង ដែលបានដឹកជ្រូកឆ្លងកាត់ពីទឹកដីខ្មែរ ចូលទៅទឹកដីប្រទេសវៀតណាមយ៉ាងរលូន។
លោក ចាន់ សំបូរ ប្រធានសាខាគយ និងរដ្ឋាករខេត្តក្រចេះ បានប្រាប់តាមរយៈទូរស័ព្ទថា «លោកជាប់រវល់នៅកន្លែងស្គេន បើលោកប្អូនមានចម្ងល់អ្វី អាចទៅកន្លែងសាខាសាកសួរបាន»។
ចំណែកលោក ទ្រី សុភក្ដី ប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ តាមទូរស័ព្ទមិនបានផ្តល់ព័ត៌មានអ្វីទេ ដោយលោកប្រាប់ថា «កំពុងជាប់ប្រជុំជាមួយបុគ្គលិក»។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ