ខេត្តព្រះវិហារ ៖ ក្រោយសារព័ត៌មានកោះសន្តិភាពបានចុះផ្សាយពាក់ព័ន្ធការឃុបឃិតគ្នាកែខៃក្រឡៃប្រវត្តិដីស្នើសុំប័ណ្ណកម្មសិទ្ធិស្របច្បាប់កាប់បំផ្លាញព្រៃវាតយកដីព្រៃសហគមន៍ការពារដោយព្រះរាជក្រឹត្យ ស្ថិតក្នុងទីតាំងភ្នំព្រះលាន ភូមិស្រែធ្នង់ ឃុំរមណីយ ស្រុករវៀង ខេត្តព្រះវិហារ រាប់ រយហិកតាបន្ថែម…
ខេត្តព្រះវិហារ ៖ ក្រោយសារព័ត៌មានកោះសន្តិភាពបានចុះផ្សាយពាក់ព័ន្ធការឃុបឃិតគ្នាកែខៃក្រឡៃប្រវត្តិដីស្នើសុំប័ណ្ណកម្មសិទ្ធិស្របច្បាប់កាប់បំផ្លាញព្រៃវាតយកដីព្រៃសហគមន៍ការពារដោយព្រះរាជក្រឹត្យ ស្ថិតក្នុងទីតាំងភ្នំព្រះលាន ភូមិស្រែធ្នង់ ឃុំរមណីយ ស្រុករវៀង ខេត្តព្រះវិហារ រាប់ រយហិកតាបន្ថែម ពេលនេះ មន្ទីររៀបចំដែនដីនគរូបនីយកម្មសំណង់ និងសុរិយោដីខេត្តព្រះវិហារ បានចេញសេចក្តីប្រកាសព័ត៌មានជូនសារធារណៈជនបានជ្រាបដូចខ្លឹមសារខាងក្រោម ៖
មន្ទីររៀបចំដែនដីនគូរូបនីយកម្ម សំណង់ និងសុរិយោដី ខេត្តព្រះវិហារ មានកិត្តិយសសូមធ្វើការបំភ្លឺចំពោះករណីការចុះផ្សាយរបស់សារព័ត៌មាន – Koh Santepheap Daily កាលពីថ្ងៃទី០៤ ខែកញ្ញា ឆ្នាំ២០២៣ តាមប្រព័ន្ធទំនាក់ទំនងសង្គម Facebook ពាក់ព័ន្ធការចេញវិញ្ញាបនបត្រសម្គាល់ម្ចាស់អចលនវត្ថុដីដែល ស្ថិតនៅតំបន់ព្រៃសហគមន៍ភ្នំព្រះលាន ភូមិស្រែធ្នង់ ឃុំរមណីយ ស្រុករវៀង ខេត្តព្រះវិហារ មន្ទីរសូមបញ្ជាក់ថា ដោយយោងតាមអនុក្រឹត្យលេខៈ៤៨ អនក្រ.បក ចុះថ្ងៃទី៣១ ខែឧសភា ឆ្នាំ២០០២ ស្តីពីការចុះបញ្ជីដីធ្លី មានលក្ខណៈដាច់ដោយដុំ មន្ទីរបានធ្វើការចុះបញ្ជីតាមនីតិវិធីនៃការចុះបញ្ជីដីដាច់ដោយដុំ ដោយមានការវាស់វែងពីមន្ត្រីជំនាញ និងមានធ្វើការបិទផ្សាយជាសាធារណៈរយៈពេល១៥ថ្ងៃរបស់រដ្ឋបាលស្រុករវៀង និងពុំមានជនណាមក ធ្វើការតវ៉ា ឬប្តឹងជំទាស់លើការបិទផ្សាយជាសាធារណៈនោះការចុះបញ្ជីដីធ្លីនេះ មានគោលការណ៍ និងមានឯកសារគ្រប់គ្រាន់សម្រាប់ធ្វើការចុះបញ្ជីជូនម្ចាស់សំណើដែលបានស្នើសុំ ដោយមានឯកសារមួយចំនួនដូចខាងក្រោម ៖
១-អនុក្រឹត្យលេខៈ៤៨ អនក្រ. បក ចុះថ្ងៃទី៣១ ខែឧសភា ឆ្នាំ២០០២ ។ ២-លិខិតលេខៈ ១២៩៧ សជណ ប. ស្ថ ចុះថ្ងៃទី២៥ ខែកក្កដា ឆ្នាំ២០២២ របស់ក្រសួងបរិស្ថាន។ ៣- លិខិតលេខៈ៤២៣២២ ចុះថ្ងៃទី២៦ ខែធ្នូ ឆ្នាំ២០២២ របស់រដ្ឋបាលខេត្តព្រះវិហារ ។ ៤-លិខិតលេខៈ ០០៧៨/២២បព៣ ចុះថ្ងៃទី១១ ខែមីនា ឆ្នាំ២០២២ របស់មន្ទីរបរិស្ថានខេត្តព្រះវិហារ។ ៥-លិខិតលេខៈ ០៤៥០/២១ ស្ថ, ពហ ចុះថ្ងៃទី១៣ ខែធ្នូ ឆ្នាំ២០២១ របស់មន្ទីរបរិស្ថានខេត្តព្រះវិហារ។ ៦-ពាក្យស្នើសុំរបស់ឈ្មោះ យី ស៊ីណាត ចុះថ្ងៃទី២៨ ខែកុម្ភៈ ឆ្នាំ២០២២ ។ អាស្រ័យដូចបានជម្រាបជូនខាងលើ សូមសាធា រណៈ ជន ជាពិសេសសារព័ត៌មាន Koh Santepheap Daily និងសារព័ត៌មានទាំងអស់ជ្រាបជាព័ត៌មាន ។
ពាក់ព័ន្ធករណីដែលមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តព្រះវិហារ ចេញសេចក្តីបំភ្លឺ ដោយមានឯកសារ និងការចុះវាស់វែងពីមន្ត្រីជំនាញគ្រប់គ្រាន់ដូចការរៀបរាប់របស់មន្ទីរខាងលើ គឺជាពេលដែលអង្ករក្លាយជាបាយនៅក្នុងឯកសារប័ណ្ឌកម្មសិទ្ធិ៣០០ហិកតា តែប្រើគ្រឿងចក្រវាយព្រៃឈ វាតបន្ថែមរាប់រយហិកតាពីលើនោះយ៉ាងម៉េចដែរ?
គេទទួលស្គាល់ថា បច្ចុប្បន្ន ពិតជាមានឯកសារគ្រប់គ្រាន់ពិតប្រាកដទាំងឯកសារស្នើសុំរបស់លោក យី ស៊ីណាត តាមរយៈអាជ្ញាធរខេត្តចាស់ទៅក្រសួងបរិស្ថានឯកសាររដ្ឋមន្ត្រីក្រសួងបរិស្ថានចុះលេខ ១២៩៧ សជណ ប.ស្ថ ចុះថ្ងៃទី២៥ ខែកក្កដា ឆ្នាំ២០២២ ដោយរដ្ឋមន្ត្រីបានទទួលលិខិត ស្នើសុំដោយលោកយី ស៊ីណាត ជាប្រជាពលរដ្ឋមានទីលំនៅភូមិអូរពោធិ៍ ឃុំរមណី ស្រុករវៀង ខេត្តព្រះវិហារ បានស្នើសុំចុះបញ្ជីដីធ្លីដែលមានផ្ទៃដីទំហំសរុប៣០០ហិកតា ដែលកំពុងប្រើប្រាស់ និងអាស្រ័យផលស្ថិតនៅក្នុងតំបន់ដែនជម្រកសត្វព្រៃបឹងពែរ ស្ថិតក្នុងភូមិសាស្ត្រភូមិ ស្រែធ្នង់ ឃុំរមណីយ ស្រុករវៀង ខេត្តព្រះវិហារ ។
ក្រសួងបរិស្ថានមិនយល់ទាស់ចំពោះករណីស្នើសុំរបស់លោក យី ស៊ីណាត ក្នុងការបន្តនីតិវិធី ចុះបញ្ជីដីធ្លីលើទីតាំងដីខាងលើ ស្ថិតក្នុងភូមិស្រែធ្នង់ ឃុំរមណីយ ស្រុករវៀង ខេត្ត ព្រះវិហារ ដោយស្របតាមនីតិវិធីច្បាប់ជាធរមាន។ប្រជាសហគមន៍បានលើកឡើងថា ការសម្រេចរបស់ថ្នាក់ដឹកនាំយល់ស្របតាមការស្នើសុំរបស់បុគ្គលឈ្មោះយី ស៊ីណាត ពួកគាត់ក៏ពុំមានសិទ្ធិណា មួយអាចជំទាស់បាននោះទេតែអ្វីដែលគួរអោយសោកស្តាយនោះ គឺការខិតខំប្រឹកប្រែងថែរក្សាព្រៃសហគមន៍ ក្រោយបុគ្គល ឈ្មោះ យីស៊ីណាត ទទួលបានប័ណ្ណកម្មសិទ្ធិ (ប្លង់រឹង) មិនត្រឹមតែឈូសឆាយដីដែលមានស្រាប់ ថែមទាំងប្រើប្រាស់គ្រឿងចក្រឈូសឆាយវាយកម្ទេចព្រៃវាតយកដីសហគមន៍រាប់រយហិកតាបន្ថែមទៀត ឥឡូវស្ទើរលាយព្រៃសហគមន៍ទៅហើយ ។
ប្រជាសហគមន៍ដែលសុំមិនបញ្ចេញឈ្មោះបញ្ជាក់ថា ផ្ទៃដីសហគមន៍ការពារដោយព្រះរាជក្រឹត្យ ស្ថិតក្នុងទីតាំងភ្នំព្រះលាន ភូមិស្រែធ្នង់ ឃុំរមណីយ ស្រុករវៀង ខេត្តព្រះវិហារ គឺមានទំហំ១.៨៦៩ហិកតា បច្ចុប្បន្ន ត្រូវមន្ត្រីមានអំណាចមួយក្តាប់តូចក្នុងខេត្តឃុបឃិតជាមួយឈ្មួញមានលុយ ប្រើគ្រឿងចក្រវាយកម្ទេចព្រៃវាតយកដីសហគមន៍ស្ទើរលាយទាំងស្រុងទៅហើយ ក្រុមមន្ត្រីមានអំណាច ពាក់ព័ន្ធរួមឈ្មួញមានប្រាក់មហាសាលទាំងនោះ ក៏បានគំរាមកំហែងដល់ប្រជាសហ គមន៍ទាំងឡាយ ដោយមិនអោយអ្នកណាម្នាក់ផ្តល់ព័ត៌មានទៅអ្នកសារព័ត៌មាន ឬអង្គការស្ថាប័នពាក់ ព័ន្ធនោះដែរ បើហ៊ានតែផ្តល់ព័ត៌មានអ្វីមួយនោះពួកគេនិងមានវិធានការច្បាប់ ដូច្នេះ មានតែរំលាយសហគមន៍នោះចោលដោយខ្លួនឯងរួចសំងំយកសុខរៀងខ្លួនប៉ុណ្ណោះ ។
ចំណែកប្រភពពីមន្ត្រីនៃមន្ទីររៀបចំដែនដីនគរូបនីយកម្ម សំណង់និងសុរិយោដីខេត្តម្នាក់ បានទម្លាយថា ក្នុងរឿងដីព្រៃសហគមន៍ភ្នំព្រះលាន ស្ថិតក្នុងឃុំស្រែធ្នង់នេះ កាលពីថ្ងៃទី២៧ ខែកុម្ភៈ ឆ្នាំ២០២៣ ខាងមន្ទីររៀបចំដែនដីនគរូបនីយកម្ម សំណង់ និងសុរិយោដីបានចេញប័ណ្ណកម្មសិទ្ធិប្លង់រឹងអោយទៅឈ្មោះ យី ស៊ីណាត នេះ វាជារឿងដ៏ «មហាអច្ឆរិយ» បំផុត សម្រាប់បុគ្គលអ្នកមានលុយម្នាក់នេះ ជាឈ្មួញដីដ៏អស្ចារ្យ ដែលអាចទាញមន្ត្រីមានតួនាទី មានអំណាចយកទៅប្រើគ្រប់ទម្រង់ទាំងស្របច្បាប់ និងទាំងបំពាននីតិវិធី ។
ទាក់ទិនករណីខាងលើ លោក សុង ចាន់សុជាតិ ប្រធានមន្ទីរបរិស្ថានបានប្រាប់កោះសន្តិភាពថា ខ្ញុំអត់ដឹងថា មានរាប់ពាន់ហិកតាទេ ដូចជាអត់មានទេ ទាល់តែខ្ញុំចុះពិនិត្យសិនបានឆ្លើយកើត ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ