តារាសម្តែង និងជាគ្រូក្បាច់គុនល្បុក្កតោ នាង ពេជ្រ ចរណៃ បានចេញមុខមកទម្លាយរឿងរ៉ាវដ៏រសើបដែលនាងមិនដែលទទួលបានការអនុញ្ញាតពីអជ្ញាធរពាក់ព័ន្ធ សូម្បីម្តងជុំវិញការស្នើសុំថតផ្សព្វ ផ្សាយ វប្បធម៌ផ្សេងៗនៅជុំវិញ
រាជធានីភ្នំពេញ ៖ តារាសម្តែង និងជាគ្រូក្បាច់គុនល្បុក្កតោ នាង ពេជ្រ ចរណៃ បានចេញមុខមកទម្លាយរឿងរ៉ាវដ៏រសើបដែលនាងមិនដែលទទួលបានការអនុញ្ញាតពីអជ្ញាធរពាក់ព័ន្ធ សូម្បីម្តងជុំវិញការស្នើសុំថតផ្សព្វផ្សាយវប្បធម៌ផ្សេងៗនៅជុំវិញបរិវេណប្រាសាទបុរាណខ្មែរ។
ការទម្លាយរឿងរ៉ាវខាងលើនេះពីស្រីស្អាត ពេជ្រ ចរណៃ នាពេលនេះ បានធ្វើឡើង បន្ទាប់ពីនាងបានឃើញនូវការចុះផ្សាយពីសារព័ត៌មាននៅក្នុងស្រុកមួយ ដែលបានចុះផ្សាយថា អ្នកប្រតិបតិករទេសចរណ៍បានដេញដោលគ្នាថា ហេតុអ្វីសៀមរាបមិនមានទេសចរណ៍ច្រើនដូចប្រទេសជិតខាង?។
ត្រង់ចំណុចនេះ ក្នុងនាមជាអ្នកសិល្បៈ និងចូលរួមចំណែកផ្សព្វផ្សាយសិល្បៈ វប្បធម៌ខ្មែរម្នាក់ដែរនោះ ស្រីស្អាត ពេជ្រ ចរណៃ ក៏បានបញ្ចេញសំណេររបស់ខ្លួនបង្ហោះនៅលើបណ្តាញសង្គមថា «សុំនិយាយពីអារម្មណ៍ពិតដែលលាក់ទុកយូរមកហើយ ក្នុងនាមខ្ញុំជាកូនខ្មែរមួយរូប ដែលតែងតែលើកស្ទួយ និងផ្សព្វផ្សាយពីសិល្បៈ វប្បធម៌ ក្បាច់គុន អក្សរសាស្ត្រខ្មែរ និងតំបន់ទេសចរណ៍..ល..។ គឺចង់អោយប្រទេសដទៃទៀត គេបានដឹង បានស្គាល់ថា ប្រទេសកម្ពុជា គឺជាប្រទេសដែលសំបូរទៅដោយសិល្បៈ វប្បធម៌ ប្រាសាទបុរាណជាច្រើន និងតំបន់ទេសចរណ៍ជាច្រើន»។
នាងបញ្ជាក់ថា «ដើម្បីផ្សព្វផ្សាយ ខ្ញុំត្រូវចំណាយលុយផ្ទាល់ខ្លួនចាក់សាំង ញ៉ាំបាយ ចំណាយផ្សេងៗ ផលិតវីដេអូ ចំណាយលើក្រុមការងារ..ល..! ទាំងមិនបានប្រាក់ខែ សួរថាខំបំរើជាតិ បំរើវប្បធម៌ជាច្រើនឆ្នាំមកនេះដើម្បីអ្វី? ពេលខ្លះខំចំណាយពេលធ្វើដំណើរពីភ្នំពេញ ទៅ សៀមរាប រាប់ម៉ោង គឺដើម្បីតែទៅថតផ្សព្វផ្សាយតែប៉ុណ្ណោះ! ពេលខ្លះក៏ត្រូវនៅគេងរង់ចាំរហូតដល់ជាង១អាទិត្យក៏មាន ដើម្បីសុំច្បាប់ថតផ្សព្វផ្សាយ តែក៏នៅតែមិនទទួលបានការអនុញ្ញាត»។
នាងបន្តថា «មិនក្រោម១០ដងទេ ដែលខ្ញុំបានធ្វើការស្នើសុំនៅខេត្តសៀមរាម ដើម្បីថតផ្សព្វផ្សាយ ផ្សារភ្ជាប់ក្បាច់គុនបុរាណខ្មែរ ជាមួយប្រាសាទ…! តែមិនដែលបានទទួលការអនុញ្ញាតសូម្បីតែ១ដង»។ នាងបន្ថែមថា «ខ្ញុំមិនដែលទទួលបានការយកចិត្តទុកដាក់ និងអោយតម្លៃ មកកាន់ខ្ញុំដែលជាកូនខ្មែរ ស្នេហាជាតិ និងវប្បធម៌ទេ ផ្ទុយទៅវិញ ត្រូវបានគេតាមឃ្លាំងមើលខ្ញុំគ្រប់សកម្មភាព ដូចខ្ញុំជាអ្នកទោសចឹង ខ្លាចខ្ញុំថត!»។
នាងបន្ថែមទៀតថា «មានពេលមួយនោះ ត្រូវបានបងៗប្រចាំការនៅតំបន់នោះ ឆែកទូរស័ព្ទខ្ញុំទៀត ខ្លាចខ្ញុំលួ.ចថតរូបបង្ហាញក្បាច់គុនជាប់ជាមួយប្រាសាទ ឬថតជាប់នៅតំបន់ប្រាសាទ… ហ៊ឹម..! សុំទោសផង បើខ្ញុំសរសេរទៅមានការប៉ះពាល់ ខ្ញុំនិយាយក្នុងនាមជាប្រជាពលរដ្ឋដែលមិនដឹង មិនយល់ ពិតជាមិនយល់ពិតមែន គ្រាន់តែចង់ផ្សព្វផ្សាយតំបន់ប្រាសាទ ទឹកដីបុរាណដ៏អស្ចារ្យ ដែលដូនតាបន្សល់ទុក ផ្សព្វផ្សាយទៅអោយពិភពលោកបានដឹង បានស្គាល់ និងមកទស្សនា តែបែរជាត្រូវបានហាមឃាត់»។
នាងបញ្ជាក់ទៀតថា «ប្រទេសខ្លះគេគ្មានប្រាសាទបុរាណអ្វីទេ គេធ្វើប្រាសាទពីស៊ីម៉ង់ គេខំផ្សព្វផ្សាយ ទាក់ទាញភ្ញៀវទេសចរទូទាំងពិភពលោកអោយទៅទស្សនា រួមទាំងប្រជាជនខ្មែរមួយចំនួនផងដែរ»៕
ចែករំលែកព័តមាននេះ