ប្រជាពលរដ្ឋរស់នៅតាមដងទន្លេមេគង្គ ក្នុងនោះមានស្រុកកំពង់សៀម និងស្រុកកោះសូទិន បាននាំគ្នាដាំពោតក្រហមលក់ឱ្យឈ្មួញសម្រាប់យកទៅផលិតចំណីសត្វ ប៉ុន្តែការប្រមូលផលជួបនឹងឧបសគ្គ ដោយសារពោតមិនទាន់ទុំល្អ ក៏ត្រូវ
ខេត្តកំពង់ចាម ៖ ប្រជាពលរដ្ឋរស់នៅតាមដងទន្លេមេគង្គ ក្នុងនោះមានស្រុកកំពង់សៀម និងស្រុកកោះសូទិន បាននាំគ្នាដាំពោតក្រហមលក់ឱ្យឈ្មួញសម្រាប់យកទៅផលិតចំណីសត្វ ប៉ុន្តែការប្រមូលផលជួបនឹងឧបសគ្គ ដោយសារពោតមិនទាន់ទុំល្អ ក៏ត្រូវទឹកទន្លេហក់ឡើងមកជន់លិច បណ្ដាលឱ្យប៉ះពាល់អស់រាប់រយហិកតាឯណោះ។
បើតាមកសិករម្នាក់មានឈ្មោះ ញិល ភ័ន អាយុ៧០ឆ្នាំ រស់នៅភូមិកោះដាច់ ឃុំកោះមិត្ត ស្រុកកំពង់សៀម បានប្រាប់ឲ្យដឹងថា ចាប់តាំងពីក្រោយឆ្នាំ១៩៧៩ គ្រាដែលប្រទេសកម្ពុជា ត្រូវបានរំដោះចេញពីរបបប្រល័យពូជសាសន៍ ៣ឆ្នាំ៨ខែ និង២០ថ្ងៃ ត្រូវបានអាជ្ញាធរចែកដីជូនដល់ប្រជាពលរដ្ឋរស់នៅក្នុងភូមិ សម្រាប់បង្កបង្កើនផលដាំដុះដំណាំសម្រាប់ទ្រទ្រង់ជីវភាពគ្រួសារ។
កសិកររូបនេះប្រាប់បន្តថា ចំពោះដីរបបដែលអាជ្ញាធរបែងចែកជូន គឺមានទំហំតូច ដូច្នេះគាត់ត្រូវជួលដីអ្នកស្រុកបន្ថែមទៀតបានទំហំ១ហិកតា យកមកដាំពោតក្រហមជារៀងរាល់ឆ្នាំ ដើម្បីប្រមូលផលលក់ឲ្យឈ្មួញ សម្រាប់យកថវិកាមកដោះស្រាយជីវភាពគ្រួសារ។ ប៉ុន្តែទឹកទន្លេមេគង្គនៅឆ្នាំ២០២៣នេះ បានហក់ឡើងមករាងលឿនបន្តិច ធ្វើឱ្យគាត់ប្រមូលផលស្ទើរតែមិនចង់ទាន់។ ហើយទិន្នផលបានប្រមាណ៨តោន ក្នុងនោះគាត់ប្រមូលលក់ឱ្យឈ្មួញបានចំនួន៣តោនរួចមកហើយ ដោយគ្រាប់ពោតស្ងួត ឈ្មួញទិញក្នុង១គីឡូក្រាម តម្លៃ៧៦០រៀល ប៉ុន្តែបើប្រៀបធៀបរយៈពេលដូចគ្នានឹងឆ្នាំកន្លងទៅ គឺតម្លៃថោកជាងឆ្នាំកន្លងទៅ។
កសិករខាងលើបន្តថា ចំពោះថវិកាដែលប្រមូលមក គឺគាត់ផាត់លើថ្លៃគ្រាប់ពូជប្រើអស់ប្រមាណ២០គីឡូក្រាម ដែលទិញនៅផ្សារក្រុងកំពង់ចាម ដោយតម្លៃ១គីឡូ៣ម៉ឺនរៀល (សម្រាប់តម្លៃនៅឆ្នាំ២០២៣នេះ) គឺគាត់ទទួលបានផលចំណេញតិចតូច គ្រាន់នឹងដោះស្រាយជីវភាព។ ប៉ុន្តែបើសិនជាមានសមាជិកគ្រួសារណាម្នាក់ឈឺ ដូច្នេះនឹងត្រូវចំណាយថវិកាផ្ទាល់ខ្លួនបន្ថែមទៀតមិនខាន។
កសិករខាងលើ បញ្ជាក់ថា គាត់រស់នៅ២នាក់ប្ដីប្រពន្ធ និងចិញ្ចឹមចៅចំនួន៣នាក់ ចំណែកកូន៤នាក់ទៀត គឺបានចេញទៅរស់នៅស្រុកឆ្ងាយ។ ហើយចំពោះប្រភេទពូជពោត ដែលគាត់យកមកដាំនោះ គឺប្រភេទ AS 29 -05 ដែលជាពូជពោតធន់នឹងអាកាសធាតុ។ ប្រសិនបើតម្លៃមួយគីឡូ ប្រភេទគ្រាប់ពោតស្ងួត លក់បានជាង១០០០រៀលនោះ គឺគាត់ទទួលបានផលចំណេញគ្រាន់បើ។
បើតាមលោក សឹម ថាវរៈ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានប្រាប់តាមទូរស័ព្ទឱ្យដឹងនៅព្រឹកថ្ងៃទី៤ ខែកញ្ញា ឆ្នាំ២០២៣នេះថា ក្នុងរយៈពេលដែលទឹកទន្លេមេគង្គបានហក់ឡើងកន្លងទៅ ធ្វើឲ្យប៉ះពាល់ដល់ដំណាំពោតរបស់ប្រជាកសិករនៅស្រុកកំពង់សៀម និងស្រុកកោះសូទិន ចំនួនជាង២០០ហិកតា ក្នុងនោះពោតដែលខូចចំនួន១០៤ហិកតា ហើយរហូតមកដល់ពេលនេះ ទឹកទន្លេមេគង្គបានបន្តហក់ឡើងបន្ថែមទៀត ប៉ុន្តែដំណាំពោតត្រូវបានបងប្អូនប្រជាកសិករប្រមូលផលអស់ហើយ គ្រាន់តែពោតមិនទាន់ទុំបានល្អនោះទេ។ ចំពោះតម្លៃទីផ្សារពោតឆ្នាំ២០២២ កន្លងទៅ គឺជាង១០០០រៀលក្នុងមួយគីឡូក្រាម ប្រភេទពោតប្រដេញទឹកនៅរដូវប្រាំង។
ចែករំលែកព័តមាននេះ