ADផ្ទាំងផ្សព្វផ្សាយពាណិជ្ជកម្ម

ភ្លើ.ងឆេះអគារនៅអាហ្វ្រិកខាងត្បូង៖ ចំនួនអ្នកស្លា.ប់កើនដល់៧៣នាក់, អ្នកខ្លះឆេះក្លាយជាធ្យូង

1 ឆ្នាំ មុន

៣១ ខែ សីហា ឆ្នាំ ២០២៣ ម៉ោង ១៧:០៤

ក្រោយហេតុការណ៍ឆេះអគារនៅទីក្រុងចូហាណេសស្បឺក (Johannesburg) ប្រទេសអាហ្វ្រិកខាងត្បូង អាជ្ញាធរប្រកាសជាជំហានដំបូងថាសម្រាប់ពេលនេះចំនួនអ្នកស្លាប់សរុបកើនឡើងដល់៧៣នាក់ហើយ ហើយគិតតែសាកសពដែលបានរកឃើញតែប៉ុណ្ណោះ។ ចំណែកអ្នករបួសមានចំនួនជាង៤០នាក់។ ក្រៅពីនេះ មនុស្សមួយចំនួនទៀតនៅបាត់ខ្លួននៅឡើយទេ។

គេគិតថាចំនួនអ្នកស្លាប់អាចនឹងកើនឡើងច្រើនជាងនេះទៀតក៏ថាបាន ព្រោះទី១- អ្នកដែលកំពុងរងរបួសទាំងនោះ អ្នកខ្លះរបួសធ្ងន់ធ្ងរ ដែលត្រូវភ្លើងឆេះរោលពេញខ្លួន។ ដូចនេះ ពួកគេអាចនឹងមិនអាចស៊ូទ្រាំនឹងមុខរបួសបានឡើយ។ ទី២- គេរំពឹងថានឹងរកឃើញសាកសពជនរងគ្រោះជាបន្តទៀតនៅពេលភ្លើងចាប់ផ្ដើមថមថយកម្លាំងឆាបឆេះរបស់វាទៅវិញ។

អាជ្ញាធរមូលដ្ឋាន រួមជាមួយក្រុមអ្នកស្ម័គ្រចិត្តកំពុងធ្វើការយ៉ាងសស្រាក់សស្រាំដើម្បីធ្វើយ៉ាងណាស្វែងរកអ្នកដែលអាចនៅរស់រានមានជីវិត។ សាក្សីនិយាយថាភ្លើងចាប់ផ្ដើមឆាបឆេះនៅវេលាកណ្ដាលអាធ្រាត្រ និងរីករាលដាលយ៉ាងឆាប់រហ័សត្រឹមតែមួយប៉ប្រិចភ្នែកចេញពីអគារកម្ពស់៥ជាន់។ ទីនេះជាអគារដែលគេបោះបង់ចោលមិនដឹងតាំងពីពេលណាទេ។

ប្រជាពលរដ្ឋក្រីក្រមកពីទីជនបទ ឬអ្នកគ្មានទីជម្រកពិតប្រាកដឃើញអគារទុកចោលដូចនេះ ពួកគេក៏ចេះតែនាំគ្នាទៅស្នាក់នៅ។ ក្រុមអ្នកជួយសង្គ្រោះឆ្លងពីបន្ទប់១ទៅបន្ទប់១, ពីជាន់១ទៅជាន់១ទៀត ដើម្បីជួយមនុស្សដែលនៅទ្រឹង១កន្លែង។ រីឯភ្លើង និងផ្សែងហុយទ្រលោមពាសពេញអគារ រកខ្យល់សម្រាប់ដកដង្ហើមគ្មានទេ។ គេសង្កេតឃើញថាសាកសពរបស់ជនរងគ្រោះខ្លះត្រូវភ្លើងឆេះរោលពេញដងខ្លួន។ សាកសពខ្លះឆេះក្លាយជាធ្យូងដល់ថ្នាក់មើលលែងស្គាល់។

អ្នកខ្លះចាត់ទុកថានេះជាសោកនាដកម្មដ៏គួរឱ្យសោកស្ដាយ និងមិនធ្លាប់កើតមាននៅទីក្រុងចូហាណេសស្បឺកនារយៈពេលម្ភៃឆ្នាំចុងក្រោយនេះ។ មនុស្សមិនតិចនាក់ទេដែលត្រូវជាប់គាំងនៅក្នុងអគារនៅពេលអគ្គិភ័យឆេះយ៉ាងពេញទំហឹង បង្កជាអណ្ដាតភ្លើង និងផ្សែងហុយទ្រលោមទៅលើអាកាស។ ជនរងគ្រោះភាគច្រើនលើសលប់រស់នៅទីនេះទាំងខុសច្បាប់។

មិនខុសពីអគារដែលគេទុកចោលដទៃទៀតនោះទេ ក្រុមគ្រួសារដែលមានជីវភាពក្រខ្សត់តែងតែយកអគារប្រភេទនេះដើម្បីស្នាក់នៅ។ ពួកគេមិនមែនរស់នៅទីនេះដោយមិនចំណាយលុយទេ។ ក្រុមជើងកាង ឬម៉ាហ៊្វីយ៉ាតែងតែទៅជំរិតទារលុយពួកគេជាថ្នូរនឹងថ្លៃការពារ ឬថ្លៃនិយាយសម្រួលជាមួយអាជ្ញាធរមូលដ្ឋានដើម្បីបិទភ្នែក បិទច្រមុះឱ្យពួកគេអាចស្នាក់នៅក្នុងអគារជាបន្តទៀត៕

ប្រភព៖ Al Jazeera, France 24, Reuters និងប្រភពដទៃទៀត
https://www.france24.com/en/africa/20230831-more-than-50-killed-in-building-fire-in-south-africa-s-johannesburg
https://www.reuters.com/world/africa/more-than-50-killed-fire-south-africas-johannesburg-2023-08-31/
https://www.aljazeera.com/news/liveblog/2023/8/31/johannesburg-building-fire-live-news-south-africa