អណ្ដាតភ្លើងឆាបឆេះផ្ទះអាជីវករមួយខ្នងយ៉ាងសន្ធោសន្ធៅ
- កំពង់ចាម
លំនៅឋាន១ខ្នងរបស់អាជីវករនៅសង្កាត់វិហារលួង ក្រុងសួង បានត្រូវអគ្គិភ័យឆាបឆេះយ៉ាងសន្ធោសន្ធៅនៅចំថ្ងៃសែនក្បាលទឹកតាមទំនៀមទម្លាប់ចិន
ខេត្តត្បូងឃ្មុំ ៖ លំនៅឋាន១ខ្នងរបស់អាជីវករនៅសង្កាត់វិហារលួង ក្រុងសួង បានត្រូវអគ្គិភ័យឆាបឆេះយ៉ាងសន្ធោសន្ធៅនៅចំថ្ងៃសែនក្បាលទឹកតាមទំនៀមទម្លាប់ចិន បង្កឱ្យមានការភ្ញាក់ផ្អើលកាលពីវេលាម៉ោងប្រមាណ៩និង៥២នាទីព្រឹកថ្ងៃទី៣០ ខែសីហា ឆ្នាំ២០២៣ ។
នៅក្នុងហេតុការណ៍ខាងលើនេះ ត្រូវបានការជួយអន្តរាគមន៍ពីសំណាក់អភិបាលក្រុងសួង ហើយលោកស្នងការនគរបាលខេត្តបានបញ្ជាឲ្យរថយន្តពន្លត់អគ្គិភ័យជាច្រើនគ្រឿងទៅបាញ់ទឹកពន្លត់ ដើម្បីទប់ស្កាត់កុំឲ្យឆេះរាលដាលទៅផ្ទះអ្នកដទៃទៀត ។
លោកវរសេនីយ៍ឯក ឈន សុធន់ អធិការនគរបាលក្រុងសួង ថ្លែងថា សមត្ថកិច្ចយើងបានទទួលទូរស័ព្ទពីលោក ពៅ វុទ្ធី អនុប្រធានភូមិជ្រួយ ពីករណីអគ្គិភ័យកើតឡើងនៅផ្ទះរបស់ស្ត្រីឈ្មោះ ម៉ឺង ចាន់ថា អាយុ៤១ឆ្នាំ ប្ដីឈ្មោះម៉ាន ចិត្រា អាយុ៣៧ឆ្នាំ មុខរបរលក់ដូរ នៅភូមិជ្រួយ សង្កាត់វិហារលួង ក្រុងសួង ។
នៅពេលទទួលបានព័ត៌មានភ្លាម កម្លាំងនគរបាលក្រុងសួង សហការជាមួយនគរបាលស្រុកត្បូងឃ្មុំ កម្លាំងនគរបាលអគ្គិភ័យខេត្តនិង កម្លាំងនគរបាលស្រុកអូរាំងឪ បានទៅអន្តរាគមន៍ពន្លត់ ដែលដឹកនាំផ្ទាល់ដោយលោកឧត្តមសេនីយ៍ទោ ម៉ុន មាគ៌ា ស្នងការនគរបាលខេត្ត និងលោក ជា ណារ៉ុន អភិបាលក្រុងសួង ។
លោកអធិការ ឈន សុធន់ បន្តថា ដោយមានការជួយជ្រោមជ្រែងពីសំណាក់អាជ្ញាធរមូលដ្ឋាន ក៏ដូចជាកងកម្លាំងនគរបាល ពិសេសក្រោមការដឹកនាំបញ្ជាផ្ទាល់ពីសំណាក់លោកស្នងការនគរបាលខេត្ត បានបញ្ជាឲ្យរថយន្តពន្លត់អគ្គិភ័យជាច្រើនគ្រឿងទៅបាញ់ទឹកពន្លត់ និងទប់ស្កាត់កុំឲ្យរាលដាលទៅដល់លំនៅឋានផ្សេងទៀតនៅក្បែរនោះ ។
ទោះបីជាមានការជួយអន្តរាគមន៍បែបនេះក្ដី ក៏គ្រោះអគ្គិភ័យនេះបណ្ដាលឲ្យ ផ្ទះថ្មមុខ ឈើក្រោយទំហំ៧X១២ម៉ែត្រ ប្រក់ក្បឿង ជញ្ជាំងក្ដារ រនាបក្ដារ ខូចខាតទាំងស្រុង លុយ ៣,៥លានរៀល និង៣៥០ដុល្លារ ទូតាំង១ ទូដាក់ខោអាវធំ១ ទូរទស្សន៍១គ្រឿង ទូរស័ព្ទអុបប៉ូ១គ្រឿង និងសម្ភារៈប្រើប្រាស់ក្នុងផ្ទះ ។
នៅក្នុងការធ្វើអន្តរាគមនទ សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន៤គ្រឿងគឺរបស់ក្រុងសួង១គ្រឿង របស់ស្រុកត្បូងឃ្មុំ១គ្រឿង របស់ខេត្ត១គ្រឿង និងរបស់ស្រុកអូររាំងឪ១គ្រឿង ដោយប្រើប្រាស់ទឹកអស់ចំនួន៦ឡាន ។
ចំពោះមូលហេតុនៃការកើតមានអគ្គិភ័យនេះ ត្រូវបានប្រាប់ថា ដោយសារការអុជទៀនធូបសែនក្បាលទឹក រួចហើយឪពុកម្ដាយទៅលក់ដូរនៅឯផ្សារ និងទុកកូនប្រុសឈ្មោះ ថន វីឡា អាយុ១៣ឆ្នាំ ឱ្យនៅចាំផ្ទះ ៕
ចែករំលែកព័តមាននេះ