ខេត្តកំពង់ឆ្នាំង ៖ លោកយាយមួយរូបទំនងមកពីការដិតដាមក្នុងជំនឿអរូបីជ្រុលពេកទើបគាត់ទៅលោតចូលអណ្តូងទឹក (អណ្តូងលូ) ដែលមានជម្រៅ១២ម៉ែត្រធ្វើឱ្យមានការភ្ញាក់ផ្អើលទាំងព្រឹកព្រលឹម និងធ្វើឱ្យមនុស្សច្រើននាក់រួមគ្នារកមធ្យោបាយជួយស្រង់ពីបាតអណ្តូងវិញ។ ការសង្គ្រោះបានចំណាយពេលដល់ទៅ៤០នាទីទើបស្រង់លោកយាយនោះបាន
ខេត្តកំពង់ឆ្នាំង ៖ លោកយាយមួយរូបទំនងមកពីការដិតដាមក្នុងជំនឿអរូបីជ្រុលពេកទើបគាត់ទៅលោតចូលអណ្តូងទឹក (អណ្តូងលូ) ដែលមានជម្រៅ១២ម៉ែត្រធ្វើឱ្យមានការភ្ញាក់ផ្អើលទាំងព្រឹកព្រលឹម និងធ្វើឱ្យមនុស្សច្រើននាក់រួមគ្នារកមធ្យោបាយជួយស្រង់ពីបាតអណ្តូងវិញ។ ការសង្គ្រោះបានចំណាយពេលដល់ទៅ៤០នាទីទើបស្រង់លោកយាយនោះបាន។
អ្វីដែលធ្វើឱ្យចម្លែក និងចាត់ទុកថា សំណាងដ៏កំរ គឺលោកយាយរូបនោះមិនរងរបួសអ្វីឡើយក្រៅតែពីរបកកែងដៃ និងកែងជើងបនិ្តចបន្តួចប៉ុណ្ណោះ។ ហេតុការណ៍នោះកើតឡើងនៅវេលាម៉ោង៥ព្រឹក ថ្ងៃទី១១ ឧសភា នៅមុខផ្ទះរបស់គាត់ស្ថិតនៅភូមិក្តីត្នោត ឃុំស្រែថ្មី ស្រុករលាប្អៀរ។ អណ្តូងទឹកដែលស្ត្រីរូបនោះលោតចូលគឺជាអណ្តូងលូសីុម៉ង់ត៍មានជម្រៅ១២ម៉ែត្រ មានទទឹងលូ១ម៉ែត្រ និងមានទឹកជម្រៅ៥ម៉ែត្រ។
បើតាមកូនស្រីពីរនាក់ ម្នាក់ឈ្មោះថា និងម្នាក់ទៀតឈ្មោះធី ឱ្យដឹងថា ម្តាយពួកគាត់ឈ្មោះម៉ៅ ផាត់ អាយុ៧០ឆ្នាំ មានជំងឺសរសៃប្រសាទជាង១០ឆ្នាំមកហើយ។ មុនពេលកើតហេតុប្រមាណ៤ទៅ៥ថ្ងៃ ម្តាយពួកគាត់និយាយប្រាប់ថា «កូនអើយអីវ៉ាន់យើងគេយកដាក់ចូលអណ្តូងទឹកអស់ហើយ»។ ការនិយាយបែបនេះពួកគាត់ជាកូនៗពុំចាប់អារម្មណ៍អ្វីទេ ព្រោះយល់ថា ម្តាយមានជំងឺសរសៃប្រសាទតែងតែនិយាយប៉ប៉ាច់ប៉ប៉ោចបែបនេះ។
កូនៗទាំងពីរនាក់បន្តថា ពួកគាត់មិនបានឃើញម្តាយទៅលោតចូលអណ្តូងទឹកដោយវិធីណាទេ តែឮសម្លេងចេញពីក្នុងអណ្តូងដូចមានអ្វីធ្លាក់ចូល។ ភ្លាមនោះនាំគ្នាស្ទុះទៅអើតមើលស្រាប់តែភ្ញាក់ផ្អើល ព្រោះឃើញម្តាយធ្លាក់ចូលអណ្តូងទឹកយ៉ាងជ្រៅ ហើយឃើញគាត់ហែលតោងទុយោទឹកពណ៌ខៀវប៉ុនកដៃក្មេងដែលដាក់សម្រាប់បូមទឹក។ ពួកគាត់ស្រែកហៅឱ្យអ្នកជិតខាងជួយ ហើយក៏ផ្អើលមនុស្សស្ទើរតែមួយភូមិមកជួយ។
ប្រភពដដែលឱ្យដឹងថា កម្មករធ្វើចង្ក្រានដែលនៅក្បែរនោះឈ្មោះយីង បានសម្រូតចុះតាមខ្សែពួរ លុះចុះដល់ទឹកហើយយកខ្សែចងធ្វើជារង្វង់ឱ្យម្តាយពួកគាត់ចូលជិះក្នុងនោះ ហើយដៃទាំងពីរតោងខ្សែពួរ ដើម្បីយោងគាត់ឡើងលើ។ វិធីនេះធ្វើមិនបានសម្រេចទេ ហើយស្ទើរតែមានគ្រោះថ្នាក់ថែមទៀត គឺពេលយោងម្តាយពួកគាត់ដល់ពាក់កណ្តាលអណ្តូងស្រាប់តែគាត់របូតដៃធ្លាក់ចូលអណ្តូងវិញ ប៉ុន្តែសំណាងល្អមិនធ្លាក់ត្រូវចំអ្នកនៅខាងក្រោមឡើយ ។ ដូច្នេះហើយបានប្តូរវិធីសង្គ្រោះដោយឱ្យកម្មករដែលចុះទៅក្នុងអណ្តូងឡើងមកលើប្តូរម្នាក់ទៀតឈ្មោះភាស់ជួយវិញ។ ពេលឈ្មោះភាស់ចុះដល់បាតអណ្តូងហើយយកអង្រឹងនីឡុងចងធ្វើជាថ្នក់ឱ្យម្តាយពួកគាត់អង្គុយចំប្រឡោះកណ្តាល ព្រមទាំងយកក្រមាចំនួន២ទៀតចងព័ទ្ធជុំវិញមិនឱ្យធ្លាក់ ទើបទាញយកគាត់មកលើបានសម្រេច។
លោកយាយរូបនោះពេលយោងមកដល់លើ ហើយត្រូវកូនៗ និងអ្នកជិតខាងជួយប្តូរសម្លៀកបំពាក់ចេញ រួចហើយយកទៅលំនៅឋាន និងហៅគ្រូពេទ្យមកដាក់សេរ៉ូមឱ្យគាត់។ ក្រោយពីដាក់សេរ៉ូមមានកម្លាំងបន្តិចមកលោកយាយម៉ៅ ផាត់ ប្រឹងនិយាយទៅកាន់កូនៗ និងអ្នកជិតខាងថា មានបុរសមាឌធំដំបង សំបុរខ្មៅម្នាក់នាំគាត់ទៅដល់មាត់អណ្តូង ហើយប្រាប់ឱ្យគាត់ចុះទៅយកអីវ៉ាន់ក្នុងនោះទើបគាត់ចុះទៅ ។ គាត់មិនដឹងខ្លួនថាចុះ ឬហក់ចូលដោយវិធីណាទេ ស្រាប់តែដឹងខ្លួនឡើងគឺនៅ ក្នុងទឹកអណ្តូងបាត់ទៅហើយ។
ប្រជាពលរដ្ឋរស់នៅក្បែរនោះមិនជឿហេតុផលដែលលោកយាយម៉ៅ ផាត់ និយាយទេ ព្រោះគាត់មានជំងឺសរសៃប្រសាទ១៥ឆ្នាំមកហើយរស់នៅក្រោមការថែទាំរបស់កូនៗយ៉ាងប្រុងប្រយ័ត្នបំផុត ៕
ចែករំលែកព័តមាននេះ