ខេត្តបន្ទាយមានជ័យ ៖ ក្រោយពីបើកការប្រកួតជ្រើសរើសជើងឯកដណ្តើមពានរង្វាន់អស់រយៈពេល៦ថ្ងៃរួចមក នៅព្រឹកថ្ងៃទី៩ ឧសភា ឆ្នាំ២០១១ មានរៀបចំពិធីបិទការប្រកួតកីឡាបាល់ទាត់យុវជនអាយុក្រោម១៣ឆ្នាំ ក្រោមអធិបតីភាពលោកចុង ផែត អភិបាលរងខេត្ត និងមានការចូលរួមពីលោកឧត្តមសេនីយ៍ត្រី រ័ត្ន ស្រ៊ាង មេបញ្ជាការកងរាជអាវុធហត្ថខេត្ត លោកឈើយ ចាន់ណា ប្រធានមន្ទីរអប់រំ យុវជន និងកីឡាខេត្ត ប្រធាន អនុប្រធានមន្ទីរជុំវិញខេត្ត អភិបាល អភិបាលរងស្រុក-ក្រុង នៅសាលាបឋមសិក្សាភ្នំបាក់ ក្រុងសិរីសោភ័ណ ។
លោកឧត្តមសេនីយ៍ត្រី រ័ត្ន ស្រ៊ាង មេបញ្ជាការកងរាជអាវុធហត្ថខេត្តបន្ទាយមានជ័យ មានប្រសាសន៍ថា ក្រោយពីបើកការប្រកួតអស់រយៈពេល៥ថ្ងៃឃើញថា ក្រុមកីឡាករនីមួយៗបានតស៊ូប្រកួតយ៉ាងស្វិតស្វាញក្រោមបរិយាកាសសាមគ្គីភាព មិត្តភាព និងប្រើប្រាស់អស់គ្រប់លក្ខណៈបច្ចេកទេសរៀងៗខ្លួន ដោយធ្វើការផ្លាស់ប្តូរបទពិសោធន៍ពីគ្នាទៅវិញទៅមក ។ នៅទីបញ្ចប់ការប្រកួតឃើញថា ពានរង្វាន់ជ័យលាភីលេខ១ បានទៅលើក្រុមកីឡាករមកពីសមាគមស្រុកម៉ាឡៃ លេខ២បានទៅលើក្រុមកីឡាករក្រុងសិរីសោភ័ណ និងលេខ៣ បានទៅលើក្រុមកីឡាករព្រះពន្លា ។ ការប្រកួតនេះដំណើរការទៅបានដោយរលូន គឺអាស្រ័យមានការចូលរួមសហការពីគ្រប់មជ្ឈដ្ឋានសិក្សា បណ្តាសមាគមទ្រទ្រង់កីឡាករបាល់ទាត់ និងសប្បុរសជនដែលបានផ្តល់ជាសម្ភារ និងថវិកាដូចជាលោកស្រី ម៉ៅ សុមានា បានជួយឧបត្ថម្ភខោអាវដល់ក្រុមកីឡាករក្នុងការប្រកួតចំនួន៦០សម្រាប់ ស្បែកជើង២០គូ និងថវិកាចំនួន១០.០០០បាត ក្រុមហ៊ុនជីងឡុង លក់សីុមកាតនិងទូរស័ព្ទដៃខេត្តបន្ទាយមានជ័យ បានឧបត្ថម្ភថវិកា២០មឺុនរៀលផងដែរ ។
លោកចុង ផែត អភិបាលរងខេត្តបន្ទាយមានជ័យ បានមានប្រសាសន៍ថា កីឡា គឺនាំមកនូវសុខភាពល្អ ម្យា៉ងទៀតក្នុងនាមតំណាងឱ្យអាជ្ញាធរខេត្ត និងក្នុងនាមលោកផ្ទាល់មានមោទនភាពខ្លាំងណាស់ចំពោះក្មួយៗជាក្រុមកីឡាករគ្រប់ក្លឹប និងសមាគមទាំងអស់ដែលបានខិតខំប្រឹងប្រែងបញ្ចេញនូវសមត្ថភាពអស់ពីកម្លាំងកាយចិត្តក្នុងការប្រកួតអស់រយៈពេល៥ថ្ងៃកន្លងមកនេះ ហើយបានប្រកាន់យា៉ងខ្ជាប់ខ្ជួននូវវិន័យក្រមសីលធម៌យា៉ងល្អប្រពៃ និងមានការស្រឡាញ់នូវវិស័យកីឡា ។ ទន្ទឹមនឹងនេះសូមក្មួយៗទាំងអស់កុំប្រព្រឹត្តនូវទង្វើអ្វីមួយដែលសង្គមស្អប់ខ្ពើម ដូចជាបង្កជាក្រុមក្មេងទំនើង លួចឆក់ប្លន់ និងប្រើប្រាស់គ្រឿងញៀន គឺត្រូវនៅឱ្យឆ្ងាយពីគ្រឿងញៀន ហើយត្រូវខិតខំសិក្សារៀនសូត្រ ព្រោះក្មួយៗគឺជាទំពាំងស្នងឫស្សី ។
ជាចុងក្រោយលោកអភិបាលរងខេត្តបានសំណូមពរដល់គ្រប់សមាគម លោកគ្រូ អ្នកគ្រូ ត្រូវពង្រឹង និងពង្រីកវិស័យកីឡាឱ្យបានរីកចម្រើន ។ បន្ទាប់មកគណៈអធិបតីបានផ្តល់នូវថវិកាដល់ក្រុមកីឡាករជ័យលាភី ព្រមទាំងអាជ្ញាកណ្តាល និងគ្រូបង្វឹកផងដែរ៕
ចែករំលែកព័តមាននេះ