ឯកឧត្តម អ៊ុន ចាន់ដា អភិបាលខេត្ត និងលោកជំទាវ ញូង ចរិយា ព្រមទាំងសមាជិកក្រុមគ្រួសារ, លោកជំទាវ លាង វួចឆេង សម្ដេចទេពពញាណ ហ៊ុន ណេង អមដំណើរដោយមន្ត្រីរាជការ នាព្រឹកព្រលឹមមុនម៉ោង
ខេត្តកំពង់ចាម ៖ ឯកឧត្តម អ៊ុន ចាន់ដា អភិបាលខេត្ត និងលោកជំទាវ ញូង ចរិយា ព្រមទាំងសមាជិកក្រុមគ្រួសារ, លោកជំទាវ លាង វួចឆេង សម្ដេចទេពពញាណ ហ៊ុន ណេង អមដំណើរដោយមន្ត្រីរាជការ នាព្រឹកព្រលឹមមុនម៉ោង៧ព្រឹក ថ្ងៃទី២៣ ខែកក្កដា ឆ្នាំ២០២៣ បានអញ្ជើញមកដល់ការិយាល័យបោះឆ្នោតនៅសាលាបឋមសិក្សាទក្សិណ ក្រុងកំពង់ចាម ក្រោមដំណក់ទឹកភ្លៀងរលឹមស្រិចៗប្រៀបដូចទេវតាបាចផ្កាឱ្យពរជ័យ។
ហើយតាមការសង្កេតដោយផ្ទាល់ឃើញថា ដំណើរការបោះឆ្នោតជ្រើសរើសតំណាងរាស្ត្រនីតិកាលទី៧ នេះ បានប្រព្រឹត្តទៅដោយរលូន ដោយមិនមានការរំខាន ឬភាពអសកម្មណាមួយកើតឡើងនោះទេ។
លោកយាយ នន់ ស៊ីផាន អាយុ៧៨ឆ្នាំ រស់នៅសង្កាត់កំពង់ចាម ក្រុងកំពង់ចាម មានប្រសាសន៍ឲ្យដឹងថា ចាប់តាំងពីពេលដែលប្រទេសកម្ពុជា រៀបចំដំណើរការបោះឆ្នោតដំបូងដោយអ៊ុនតាក់ គឺគាត់បានចូលរួមបោះឆ្នោតតាំងពីអាណត្តិទី១ រហូតមកដល់សព្វថ្ងៃ។ ចំពោះការឈានជើងមកដល់មណ្ឌលបោះឆ្នោត នៅសាលាបឋមសិក្សាទក្សិណ គឺគាត់បានចូលទៅបោះឆ្នោតជូនដល់គណបក្សដែលគាត់បានពេញចិត្ត ហើយក៏មិនមានការបង្ខិតបង្ខំពីគណបក្សនយោបាយណាមួយនោះដែរ គឺបានដំណើរការប្រព្រឹត្តទៅដោយរលូនត្រឹមត្រូវ និងយុត្តិធម៌ទៀតផង។
អ្នកស្រី យឹម សុធានី ប្រធានលេខាធិការដ្ឋាន រៀបចំការបោះឆ្នោតខេត្តកំពង់ចាម (គបខ) បានប្រាប់តាមទូរសព្ទឱ្យដឹងថា ចំពោះប្រជាពលរដ្ឋដែលបានចុះឈ្មោះបោះឆ្នោតមានប្រុសស្រីសរុបចំនួន៦៥២,៥៤០នាក់ ការិយាល័យបោះឆ្នោតទូទាំង។ ស្រុក-ក្រុងមានចំនួន១៦៨២ការិយាល័យ ហើយដំណើរការបោះឆ្នោតបានចាប់ផ្ដើមឡើងនៅវេលាម៉ោង៧ព្រឹក រហូតដល់ម៉ោង៣រសៀល ថ្ងៃទី២៣ ខែកក្កដា ឆ្នាំ២០២៣។
ប្រធានលេខាធិការដ្ឋានខេត្តរៀបចំការបោះឆ្នោតខេត្តកំពង់ចាម បញ្ជាក់ថា គ្រប់ការិយាល័យបោះឆ្នោតទាំងអស់បានដំណើរការប្រព្រឹត្តទៅដោយរលូន។ ជាមួយគ្នានោះ ក៏មានសមាគម និងអង្គការសរុបចំនួន១៩ បានស្នើពាក្យ ដើម្បីចូលរួមសង្កេតការបោះឆ្នោតនៅក្នុងខេត្តកំពង់ចាមផងដែរ។ ហើយគណបក្សនយោបាយដែលធ្វើការប្រកួតប្រជែងសរុបមានចំនួន១២ ចំពោះគណបក្សដែលមានភាពលេចធ្លោជាងគេ គឺគណបក្សប្រជាជនកម្ពុជា, គណបក្សហ្វ៊ុនស៊ីប៉ិច និងគណបក្សខ្មែររួបរួមជាតិ…។
បើគិតមកដល់ម៉ោងជាង១១ព្រឹកនេះ គឺមិនមានការរំខានពីបរិយាកាសនោះទេ គឺដំណើរការបោះឆ្នោតប្រព្រឹត្តទៅដោយរលូន ហើយបើគិតជាភាគរយអ្នកដែលបានបោះរួចមានរហូតដល់ជាង៦១%។
សូមបញ្ជាក់ថា នៅតាមការិយាល័យរៀបចំការបោះឆ្នោតជាង ១,០០០ការិយាល័យ ត្រូវបានដាក់កម្លាំងនគរបាល យាមនៅក្រៅបរិវេណការិយាល័យបោះឆ្នោត ដើម្បីពង្រឹងសន្តិសុខ និងសណ្ដាប់ធ្នាប់ជូនដល់ប្រជាពលរដ្ឋដែលបានអញ្ជើញមកបោះឆ្នោត។
គួរបញ្ជាក់ទៀតថា បើគិតត្រឹមម៉ោង២រសៀលថ្ងៃទី២៣ ខែកក្កដានេះ បងប្អូនប្រជាពលរដ្ឋរស់នៅក្នុងខេត្តកំពង់ចាម បាននាំគ្នាមកបោះឆ្នោត សរុបបានប្រមាណ 77% ហើយ។
ចែករំលែកព័តមាននេះ