លោក ដួង តារា ប្រកាសពីការយកហ្វេសប៊ុកផេក សម្តេចតេជោ មកប្រើឡើងវិញ

រាជធានី​ភ្នំពេញ​​ ៖ លោក ដួង តារា រដ្ឋលេខាធិការ​ទីស្តីការ និង​ជំនួយការ​ផ្ទាល់​សម្តេច​តេ​ជោ ហ៊ុន សែន នាយក​រដ្ឋមន្ត្រី​កម្ពុជា បាន​ប្រកាស​ឱ្យ​ដឹង ​កាលពី​រាត្រី​ថ្ងៃ​ទី១៩ ខែមិថុនា ឆ្នាំ​២០២៣ ថា ហ្វេ​ស​ប៊ុ​ក​ផេ​ក​ផ្លូវការ​របស់​សម្តេច​តេ​ជោ ដែល​មានឈ្មោះ​ថា «Samdech Hun Sen, Cambodian Prime Minister» ត្រូវ​បាន​លោក​យក​មក​ប្រើ​ឡើង​វិញ តែ​សម្តេច​តេ​ជោ​ មិន​ប្រើ​ផេ​ក​នេះ​ទេ ​។

លោក ដួង តារា ដែល​កន្លង​មក​ក៏​ជា​អ្នកគ្រប់គ្រង​ទំព័រ​ហ្វេ​ស​ប៊ុ​ក របស់​សម្តេច​នាយក​រដ្ឋមន្ត្រី ហ៊ុន សែន បាន​រម្លឹក​រឿងរ៉ាវ​នៃ​ការ​បង្កើត​ហ្វេ​ស​ប៊ុ​ក​ផេ​ក​របស់​នាយក​រដ្ឋមន្ត្រី​ខ្មែរ​យ៉ាង​ដូច្នេះ​ថា ​៖ កាលពី​ថ្ងៃ​ទី២៨ ខែមិថុនា ឆ្នាំ២០១០ (​មុន​ខ្ញុំ​ចូល​បម្រើ​ការងារ​ជូន សម្តេច​តេ​ ជោ​នាយក​រដ្ឋមន្ត្រី​) ខ្ញុំ​បាន​បង្កើត Page « Samdech Hun Sen, Cambodian Prime Minister» នេះ​ដើម្បី​ទុក​ប្រគល់​ជូនសម្តេច សម្រាប់​ប្រើប្រាស់​ក្នុង​ការ​ទំនាក់ទំនង​ជាមួយ​ប្រជាពលរដ្ឋ​ខ្មែរ​ទាំង​ក្នុង​ និង​ក្រៅប្រទេស ជា​ពិសេស​ដើម្បី​បានដឹង​អំពី​សុខទុក្ខ​ពលរដ្ឋ​ដោយ​ផ្ទាល់​តាម​រយៈ​សំណូមពរ និង​មតិយោបល់​តាម​រយៈ​ផេ​ក​នេះ ​។ ដោយសារ​ខ្ញុំ​បានឃើញ​អំពី​សារៈសំខាន់​នៃ​បណ្តាញ​ទំនាក់ទំនង​សង្គម Facebook នេះ ទើប​ខ្ញុំ​សម្រេច​បង្កើត​Page នេះ​ឡើង​ទុក​ជូនសម្តេចយក​ទៅ​ប្រើ​ជា​ប្រយោជន៍​ប្រទេស​ជាតិ​»​ ។

លោក ដួង តារា បាន​សរសេរ​បន្ត​ថា «​ខ្ញុំ​មិន​ចង់​បាត់បង់​ផេ​ក​ដ៏​សំខាន់ ដែល​ខ្ញុំ​បាន​ប្រើ​ពេល១៣​ឆ្នាំ​កន្លង​មកនេះ​ឡើយ​» ​។ «​ខ្ញុំ​បាន​សម្រេចចិត្ត​យក​មក​ប្រើ​ឡើង​វិញ និង​សូម​ស្នើ​សុំ​រក្សា​ផេ​ក​នេះ​ទុក​បន្ត​ប្រើ​ជា​ប្រយោជន៍​សង្គម​ជាតិ ទោះបី​សម្តេច​តេ​ជោ​ មិន​ប្រើ​ក៏​ដោយ​។ សូម​សាធារណៈជន​មេត្តា​ជ្រាប​ជា​ដំណឹង​»​។ នេះ​ជា​ការ​ប្រកាស​របស់​លោក ដួង តារា​ ។

គួរ​រម្លឹក​ផង​ដែរ​ថា សម្តេច​តេ​ជោ នាយក​រដ្ឋមន្ត្រី ហ៊ុន សែន នៅ​យប់​ថ្ងៃ​ទី​២៩ ខែមិថុនា កន្លង​ទៅ​បាន​ប្រកាស​តាម Channel Telegram ផ្លូវការ​របស់​សម្តេច​ថា សម្តេច​សម្រេច​ឈប់​ប្រើ​ហ្វេ​ស​ប៊ុ​ក ដោយសារ​រយៈពេល​កន្លង​មក មានការ​ក្លែងបន្លំ​គណនី​ហ្វេ​ក​បុក (Facebook) របស់​ជា​ច្រើន ដែល​មាន​រហូត​ជាង២០ ដែល​ធ្វើ​ឲ្យ​មានការ​ភ័នច្រឡំ​ពី​អ្នក​ប្រើប្រាស់​Facebook ដូច​គ្នា ​។

ស​ម្តេ​ចេ​ជោ​បាន​បញ្ជាក់​នា​ពេល​នោះ​ថា «​ម្យ៉ាងទៀត​មួយ​រយៈពេល​ចុង​ក្រោយ​នេះ ខ្ញុំ​បាន​រក​ឃើញ​បណ្តាញ​ទំនាក់ទំនង ដែល​មាន​ប្រសិទ្ធភាព​ជាង គឺ​បណ្តាញ​តេ​ឡេ​ក្រាម (Telegram) ដែល​មិន​បារម្ភ​ពី​ការ​ចូល​លួចដូច Facebook»​។

សម្តេច​តេ​ជោ បន្ថែម​ថា «​អាស្រ័យ​ហេតុនេះ ខ្ញុំ​សម្រេច​បញ្ឈប់​ជា​ស្ថាពរ​ពី​ការ​ប្រើប្រាស់​ Facebook ដែល​មាន​អ្នកចូលរួម​ជាង ១៤​លាន​នាក់​ ។ ខ្ញុំ​សូម​ស្នើ​ឲ្យ​ជំនួយការ​ខ្ញុំលុប​ចោល​គណនី Facebook របស់ខ្ញុំភ្លាម និង​ប្រាប់​ទៅ​ក្រុមហ៊ុន Facebook ឲ្យ​លប់ឈ្មោះ​ខ្ញុំ ចេញពី​បញ្ជី​Facebook»​។ សម្តេច​តេ​ជោ ហ៊ុន សែន បន្ថែម​ថា «​ខ្ញុំ​សូម​ការ​យោគយល់​ពី​អ្នក​រាប់អាន​ខ្ញុំ តាម Facebook និង​សូម​បង្វែរ​មក​ភ្ជាប់​ជាមួយ​ឆា​ណែ​ល telegram របស់ខ្ញុំ​វិញ ដើម្បី​ទទួល​បាន​ព័ត៌មាន និង​មាន​យោបល់​មក​ខ្ញុំ តាម​រយៈ​តេ​ឡេ​ក្រាម​វិញ​»​ ៕