ក្រុមហ៊ុនស្រាបៀរដ៏ល្បីមួយរបស់អាមេរិកប្រកាសបិទទ្វារ ក្រោយដំណើរការអស់ជាង១០០ឆ្នាំ
សហរដ្ឋអាមេរិក ៖ ក្រុមហ៊ុនផលិតស្រាបៀរមួយដ៏ល្បី នៅសហរដ្ឋអាមេរិក ដែលបានបង្កើតឡើងក្នុង
សហរដ្ឋអាមេរិក ៖ ក្រុមហ៊ុនផលិតស្រាបៀរមួយដ៏ល្បី នៅសហរដ្ឋអាមេរិក ដែលបានបង្កើតឡើងក្នុងទីសាន់ហ្វ្រាន់ស៊ីស្កូចាប់តាំងពីឆ្នាំ ១៨៩៦ និងបានផ្សព្វផ្សាយខ្លួនឯងថា ជាអ្នកផលិតស្រាបៀរឯករាជ្យខ្នាតតូចដំបូងរបស់សហរដ្ឋអាមេរិកនោះ បានប្រកាសបិទទ្វារហើយ ក្រោយដំណើរការលើវិស័យនេះអស់ពេល ១២៧ឆ្នាំ។
ក្រុមហ៊ុន Anchor Brewing បានប្រកាសថា ខ្លួននឹងបញ្ឈប់ប្រតិបត្តិការ ហើយបិទអាជីវកម្ម ដោយចង្អុលបង្ហាញពីការលក់ធ្លាក់ចុះជាច្រើនឆ្នាំចុងក្រោយនេះ។ ក្រុមហ៊ុនផលិតស្រាបៀរជប៉ុន Sapporo ដែលបានទិញក្រុមហ៊ុន Anchor Brewing នៅក្នុងឆ្នាំ ២០១៧ បានបញ្ជាក់ថា កិច្ចខិតខំប្រឹងប្រែង ដើម្បីធ្វើឱ្យម៉ាកយីហោមួយនេះ ស្ទុះងើបឡើងមកវិញ បានបរាជ័យ។
លោក Sam Singer អ្នកនាំពាក្យក្រុមហ៊ុន Anchor Brewing បានថ្លែងថា «នេះគឺជាការសម្រេចចិត្តដ៏លំបាកបំផុត។ យើងទទួលស្គាល់ពីសារៈសំខាន់ និងរឿងសំខាន់ជាប្រវត្តិសាស្ត្រនៃ Anchor to San Francisco និងចំពោះឧស្សាហកម្មផលិតស្រាបៀរ ប៉ុន្តែផលប៉ះពាល់នៃជំងឺរាតត្បាតកូវីដ-១៩ អតិផរណា ជាពិសេសនៅក្នុងទីក្រុងសាន់ហ្វ្រាន់ស៊ីស្កូ រួមនិងទីផ្សារប្រកួតប្រជែងខ្ពស់ បានធ្វើឱ្យក្រុមហ៊ុនមិនមានជម្រើសអ្វីក្រៅតែពីសម្រេចចិត្តបែបនេះ ដែលជាការសម្រេចចិត្តដ៏សោកសៅក្នុងការបញ្ឈប់ប្រតិបត្តិការ»។
រសជាតិស្រាបៀរ Anchor Brewing បានចាក់ឫសគល់យ៉ាងជ្រៅដល់អ្នកទទួលទាន និងត្រូវបានចាត់ទុកជារសជាតិដ៏ពេញនិយមបំផុតមួយក្នុងចំណោមរសជាតិដើមមួយចំនួនទៀត នៃស្រាបៀរនៅសហរដ្ឋអាមេរិក។ ប៉ុន្តែម៉ាកយីហោ ដែលបានឈរជាម៉ាកយីហោលក់ដាច់ជាងគេទៅតាមបារ និងភោជនីយដ្ឋានជាច្រើនមួយនេះ បានជួបការលំបាកបន្ថែមទៀតនាពេលថ្មីៗនេះ។
យោងតាមក្រុមហ៊ុនផលិតស្រាបៀរជប៉ុន Sapporo ដែលបានទិញក្រុមហ៊ុន Anchor Brewing នៅក្នុងតម្លៃ ៨៥លានដុល្លារ កាលពីឆ្នាំ ២០១៧ បានឱ្យដឹងថា Anchor Brewing រកចំណូលបាន ១០លានដុល្លារតែប៉ុណ្ណោះ កាលពីឆ្នាំមុន ដែលធ្លាក់ចុះពី ១២លានដុល្លារ កាលពីឆ្នាំ ២០២១។ ក្រុមហ៊ុន Sapporo បានឱ្យដឹងថា ខ្លួនបានព្យាយាមធ្វើឱ្យការលក់ងើបឡើងវិញ តាមរយៈការបន្តផលិតផល និងការវិនិយោគផ្សេងទៀត ប៉ុន្តែមិនអាចយកឈ្នះលើការប៉ះពាល់ដល់អាជីវកម្មចេញពីជំងឺរាតត្បាតរាតត្បាតកូវីដ-១៩ បាននោះទេ។
យោងតាមរបាយការណ៍ សមាគមផលិតស្រាបៀររបស់សហរដ្ឋអាមេរិក បានឱ្យដឹងថា ចំនួនស្រាបៀរដែលបានលក់នៅសហរដ្ឋអាមេរិក កាលពីឆ្នាំមុន បានធ្លាក់ចុះ ៣% ខណៈដែលនៅឯក្រុមហ៊ុនផលិតស្រាតូចៗ បរិមាណនៃការលក់គឺប្រហែលជាមានចំនួនតិចតួចបំផុត។
ក្រុមហ៊ុន Anchor Brewing ដែលបានផ្តល់ការជូនដំណឹងរយៈពេល ៦០ថ្ងៃដល់បុគ្គលិករបស់ខ្លួនប្រហែល ៦០នាក់ បានអះអាងថា ខ្លួនបានព្យាយាមម្តងហើយម្តងទៀត ក្នុងការស្វែងរកអ្នកទិញថ្មី នៅប៉ុន្មានឆ្នាំថ្មីៗនេះ។ បើទោះបីជា ក្រុមហ៊ុនបានឈប់ផលិតស្រាបៀរ ប៉ុន្តែនឹងបន្តវេចខ្ចប់ និងចែកចាយដបរបស់ខ្លួន នៅក្នុងរដ្ឋកាលីហ្វ័រញ៉ា រហូតដល់ចុងខែកក្កដា ហើយហាងស្រាក្នុងស្រុករបស់ខ្លួន ក៏នឹងនៅតែបើកជាបណ្តោះអាសន្នផងដែរ ដើម្បីលក់ផលិតផលដែលនៅសល់៕ (ប្រភពពី BBC)
ចែករំលែកព័តមាននេះ