ភ្នំពេញ៖ សម្រាប់ការហែក្បួនឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ និងការបិទវគ្គយុទ្ធនាការ ឃោសនាបោះឆ្នោត គឺគណៈកម្មាធិការគណបក្សរាជធានីភ្នំពេញ បានត្រៀមរួចរាល់ហើយ។ នៅថ្ងៃបិទយុទ្ធនាការឃោសនាបោះឆ្នោត ថ្ងៃទី២១កក្កដា គណបក្សប្រជាជនកម្ពុជា នៅភ្នំពេញ នឹងហែក្បួនឃោសនា លើតម្រាយផ្លូវប្រវែង ជាង ៩គីឡូម៉ែត្រ នៅក្នុងរាជធានីភ្នំពេញ។
ខាងលើនេះ ជាការបញ្ជាក់ក្នុងកិច្ចប្រជុំ ស្ដីពី ការដកពិសោធន៍ហែក្បួនយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ លើកទី២ និងទិសដៅបន្ត ដើម្បីត្រៀមហែលើកទី៣ និងបិទវគ្គយុទ្ធនាការឃោសនាបោះឆ្នោត។ កិច្ចប្រជុំនេះ បានធ្វើឡើង នាល្ងាចថ្ងៃទី១២ កក្កដានេះ ក្រោមអធិបតីភាពលោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សរាជធានីភ្នំពេញ ដោយមានការចូលរួមពីគណៈកម្មាធិការគណបក្សខណ្ឌទាំង ១៤ អង្គភាពនៃមន្ទីរចំណុះអោយគណៈកម្មាធិការគណបក្សរាជធានីភ្នំពេញ ស២៦ ស២៧ នៅមន្ទីរបក្សរាជធានីភ្នំពេញ។
ក្នុងកិច្ចប្រជុំនេះ គឺបានកំណត់រួចហើយ ដោយយកថ្ងៃទី២១ កក្កដា ឆ្នាំ២០២៣ ជាថ្ងៃបិទវគ្គយុទ្ធនាការឃោសនាបោះឆ្នោត ដើម្បីហែក្បួនឃោសនា។ ថ្ងៃបិទវគ្គយុទ្ធនាការឃោសនាបោះឆ្នោតនេះ សមាជិក សមាជិកា គណបក្ស ប្រជាជនកម្ពុជា នឹងជួបជុំគ្នា នៅមជ្ឈមណ្ឌលពិព័រណ៍ និងសន្និបាតកោះពេជ្រ រួចហែក្បួន ចេញពីកោះពេជ្រ ចូលមកក្នុងរាជធានីភ្នំពេញ ដោយមកបញ្ចប់ នៅបឹងកក់ ដែលមានតម្រាយផ្លូវប្រវែង ជាង ៩គីឡូម៉ែត្រ៕
ចែករំលែកព័តមាននេះ