ខេត្តស្ទឹងត្រែង ៖ ប្រជាពលរដ្ឋម្នាក់ជាជនជាតិដើមភាគតិចបានរងនូវការបា.ញ់គំរាមពីសំណាក់លោកនាយសង្កាត់រដ្ឋបាលព្រៃឈើឃុំក្បាលរមាសស្រែគរចំនួនមួយគ្រាប់ក្បែរគុម្ពត្រចៀកខាងស្តាំបណ្តាលឱ្យភ័យស្លន់ស្លោនិង រកកល់ស្តាប់អ្វីស្ទើរមិនឮ។ ហេតុការណ៍នេះ បានកើតឡើងនៅវេលាម៉ោង១១នឹង២០នាទីព្រឹកថ្ងៃទី៤ ឧសភា ២០១១
ខេត្តស្ទឹងត្រែង ៖ ប្រជាពលរដ្ឋម្នាក់ជាជនជាតិដើមភាគតិចបានរងនូវការបាញ់គំរាមពីសំណាក់លោកនាយសង្កាត់រដ្ឋបាលព្រៃឈើឃុំក្បាលរមាសស្រែគរចំនួនមួយគ្រាប់ក្បែរគុម្ពត្រចៀកខាងស្តាំបណ្តាលឱ្យភ័យស្លន់ស្លោនិង រកកល់ស្តាប់អ្វីស្ទើរមិនឮ។ ហេតុការណ៍នេះ បានកើតឡើងនៅវេលាម៉ោង១១នឹង២០នាទីព្រឹកថ្ងៃទី៤ ឧសភា ២០១១ ត្រង់ចំណុចអូរអន្ទោម ភូមិច្រប់ ឃុំក្បាលរមាសស្រុកសេសាន។
លោកឆន ឈឿន ជាជនរងគ្រោះបានឱ្យដឹងថា ដីចំការនេះលោកបានកាប់ឆ្ការតាំងពីឆ្នាំ២០០១និង២០០២មកម្ល៉េះ តែត្រូវបោះបង់យូរទើបឥឡូវនេះលោកមកចាប់ធ្វើស្រែចំការវិញក៏ស្រាប់តែមានលោកមេព្រៃក្បាលរមាសរួមជាមួយមន្ត្រីម្នាក់ទៀតមកហាមឃាត់មិនឱ្យគាត់កាប់ឆ្ការតទៅទៀតទេ ថែមទាំងគំរាមចាប់គាត់ដាក់គុកទៀតផង ។ ឮពាក្យមិនកាប់បីបែបនេះគាត់ក៏បានសួរថា ចុះមានគេកាប់ព្រៃដែរហេតុអ្វីមិនចាប់ផង?ភ្លាមនោះលោកមេព្រៃខឹងតូង ស្ទុះទៅយកកាំភ្លើងពីក្នុងរថយន្តមកភ្ជុងចំដើមទ្រូងបង្ខំឱ្យឡើងទៅក្នុងរថយន្តតែគាត់មិនព្រមឡើងរួចក៏បាញ់ក្បែរគុម្ពត្រចៀកគាត់មួយគ្រាប់ហើយគំរាមថាបើហ៊ានតែកាប់ទៀតគាត់នឹងបាញ់ទាល់តែស្លាប់។
ជនរងគ្រោះរូបនេះបន្តថាក្រោយពេលបាញ់គំរាមរួចមេព្រៃក៏ឡើងជិះរថយន្តទៅវិញបន្សល់ទុកសំបកគ្រាប់ដែលរើសបានយកទៅឱ្យមេភូមិទុកជាភស្តុតាង ។ សាក្សីបានឱ្យដឹងថា ហេតុការណ៍នេះបាន កើតឡើងខណៈដែលពលរដ្ឋជាជនជាតិដើមភាគតិចនោះទៅកាប់ព្រៃចំការចាស់របស់គាត់។ជាទម្លាប់របស់ជនជាតិតែងតែធ្វើដំណាំកន្លែងនេះម្តុំ កន្លែងនោះម្តុំ លុះដល់ខែឆ្នាំទើបវិលមកធ្វើកន្លែងចាស់វិញតែមិនដឹងជាយ៉ាងម៉េចទើបឈានដល់ការបាញ់បោះគំរាមកំហែងបែបនេះ ។
តាមព័ត៌មានពីលោកឆាន់ សុភាព មន្ត្រីប៉ុស្តិ៍ ឃុំក្បាលរមាសបានឱ្យដឹងថា នាយសង្កាត់រដ្ឋបាលព្រៃឈើលោកអឿ គឹមហេង បានបាញ់គំរាមទៅលើជនរងគ្រោះជាជនជាតិដើមភាគតិចឈ្មោះឆន ឈឿន អាយុ២៣ឆ្នាំរស់នៅភូមិឃុំកើតហេតុខាងលើជាកសិក។ បច្ចុប្បន្នកសិកររូបនេះ កំពុងដាក់ពាក្យបណ្តឹងទៅលោកមេភូមិដើម្បីរកយុត្តិធម៌។
ទាក់ទិនក្នុងករណីខាងលើលោកអឿ គឹម ហេង បញ្ជាក់ថា នៅពេលដែលលោករួមនឹងមន្ត្រីពីនាក់ទៀតបានឃើញពួកគាត់កាប់រុករានដីព្រៃរូបលោកបានធ្វើការហាមឃាត់ព្រោះខុសនឹងច្បាប់រដ្ឋបាលព្រៃឈើ តែពួកគេទាំងនោះ ប្រដាប់ដោយកាំបិត ដូច្នេះលោកបាញ់ក្នុងសិទ្ធិការពារខ្លួនប៉ុណ្ណោះ។ កាំភ្លើងខ្លីដែលលោកប្រើនេះគឺមានលិខិតចេញពីក្រសួងមហាផ្ទៃត្រឹមត្រូវ។ ប្រភពពីមន្ត្រីប៉ុស្តិ៍ និងប្រជាពលរដ្ឋបាននិយាយថា មន្ត្រីរដ្ឋបាលព្រៃឈើរូបនេះបានបាញ់បោះម្តងរួចមកហើយ កាលពីអំឡុងខែមីនា តែមិនបណ្តាលឱ្យមានអ្នករងរបួសឡើយរហូត មកដល់ពេលនេះគឺជាលើកទីពីហើយ ៕
ចែករំលែកព័តមាននេះ