ក្នុងរយៈពេល៦ខែដើមឆ្នាំ២០២៣នេះ មានភ្ញៀវទេសចរសរុបចំនួន ៣៨៥ ៧៦៩នាក់ បានទិញសំបុត្រចូលទស្សនារមណីយដ្ឋានអង្គរ ដែលចំណូលបានពីការលក់សំបុត្រនេះ មានប្រមាណជាង១៧លាន៨សែនដុល្លារអាមេរិក កើនជាង
ខេត្តសៀមរាប ៖ បើយោងតាមរបាយការណ៍របស់គ្រឹះស្ថានអង្គរ បានឱ្យដឹងថា ក្នុងរយៈពេល៦ខែដើមឆ្នាំ២០២៣នេះ មានភ្ញៀវទេសចរសរុបចំនួន ៣៨៥ ៧៦៩នាក់ បានទិញសំបុត្រចូលទស្សនារមណីយដ្ឋានអង្គរ ដែលចំណូលបានពីការលក់សំបុត្រនេះ មានប្រមាណជាង១៧លាន៨សែនដុល្លារអាមេរិក កើនជាង៦ពាន់ភាគរយ បើធៀបនឹងរយៈពេលដូចគ្នាក្នុងឆ្នាំ២០២២។
ហើយដោយឡែកក្នុងខែមិថុនា កន្លងទៅនេះ មានអ្នកទេសចរចំនួន ៤១ ០១២នាក់ បានទិញបណ្ណចូលទស្សនារមណីយដ្ឋានអង្គរ ដែលចំណូលលក់សំបុត្រនោះ មានចំនួន ១ ៨១១ ៥៨៩ដុល្លារអាមេរិក។
គ្រឹះស្ថានអង្គរបានឱ្យដឹងទៀតថា ក្រៅពីនេះ គ្រឹះស្ថានអង្គរ ក៏បានលក់សំបុត្រចូលទស្សនាតំបន់កោះកែរ បានចំនួន ៩៥ ៥៣៥ដុល្លារ ដល់អ្នកទេសចរអន្តរជាតិចំនួន ៦ ៣៦៩នាក់ និងរកចំណូលពីការលក់សំបុត្រទូក នៅកំពង់ផែចុងឃ្នៀស បានចំនួន ២៩២ ៩៤០ ដុល្លារ ក្នុងរយៈពេល៦ខែនេះ។
មន្ត្រីគ្រឹះស្ថានអង្គរ ខេត្តសៀមរាប ក៏បានប្រកាសឱ្យដឹងដែរថា ហើយចំណូលបានពីការលក់សំបុត្រក្នុងរយៈពេល៦ខែ ដើមឆ្នាំ២០២៣នេះ គ្រឹះស្ថានអង្គរ ក៏បានឧបត្ថម្ភទៅមូលនិធិគន្ធបុប្ផា មានចំនួន ៧៧១ ៥៣៨ដុល្លារផងដែរ៕
ចែករំលែកព័តមាននេះ