យើងសូមនាំអារម្មណ៍ប្រិយមិត្តមកស្គាល់សត្វក្រពើ១ក្បាលឈ្មោះខាស់សឺស (Cassius) ដែលអាចជាក្រពើដ៏ចំណាស់ និងមានមាឌធំបំផុតនៅលើភពផែនដី។ វាកំពុងរស់នៅយ៉ាងសុខសាន្តនៅក្នុងសួនសត្វនៃប្រទេសអូស្ត្រាលី។ នេះជាអ្វីដែលមន្ត្រីជាន់ខ្ពស់របស់សួនសត្វបានបង្ហើបឱ្យដឹង។ គេគិតថាសត្វក្រពើមួយក្បាលនេះអាចប្រហែលជាមានអាយុ១២០ឆ្នាំហើយ។
ក្រពើខាស់សឺសជាសត្វដែលមានរូបរាងស្អាតបាត និងមានប្រវត្តិសាវតារគួឱ្យចាប់អារម្មណ៍សម្រាប់យើង។ នេះជាពាក្យសម្ដីរបស់អ្នកស្រីសេលលី អាយស្បឺក (Sally Isberg) ជាអ្នកចាត់ការទូទៅនៃមជ្ឈមណ្ឌលស្រាវជ្រាវអំពីសត្វក្រពើនៅប្រទេសអូស្ត្រាលី។ លោកស្រីថ្លែងថាវាជាសត្វក្រពើដែលមានចិត្តក្លៀវក្លា, មានកម្លាំងមាំមួន និងមានព្រលឹងព្រលះណាស់។
អ្នកស្រីសេលលី អាយស្បឺក (Sally Isberg)សត្វក្រពើនេះត្រូវក្រុមអ្នកអភិរក្សសត្វព្រៃចាប់បានកាលពីឆ្នាំ១៩៨៤ក្បែរទីក្រុងដាវីន (Darwin)។ ពីរបីឆ្នាំក្រោយមក, គេក៏ដឹកជញ្ជូនវាទៅរស់នៅលើកោះគ្រីនអាយលេន (Green Island)។ ក្រពើនេះរស់នៅក្នុងតំបន់អភិរក្សសត្វក្រពើម៉ារីនលេន (Marineland) ជាង៣៥ឆ្នាំមកហើយ ហើយត្រូវអ្នកជំនាញគិតថាវាមានអាយុយ៉ាងតិច១១០ឆ្នាំ។ អ្នកខ្លះគិតថាវាមានអាយុ១២០ឆ្នាំហើយ។ បើដូច្នេះមែន, វាជាសត្វក្រពើដែលមានលក្ខណៈពិសេសខុសគេ ព្រោះមានអាយុវែងជាងក្រពើដទៃទៀត។
លក្ខណៈពិសេសរបស់វានៅត្រង់ថារូបរាងកាយរបស់វានៅតែរីកលូតលាស់រហូតដល់សព្វថ្ងៃ ទោះបីវាមានអាយុជាង១រយឆ្នាំហើយក៏ដោយ។ នៅពេលពិនិត្យសុខភាពរបស់ប្រចាំឆ្នាំ, សាស្ត្រាចារ្យម្នាក់ឈ្មោះក្រេមវេប (Graeme Webb) រកឃើញថាក្រពើនេះរីកលូតលាស់បាន១៣អ៊ីញបន្ថែមទៀត ឬស្មើនឹង៣៣សង់ទីម៉ែត្រ បើប្រៀបធៀបនឹងរយៈពេលជិតម្ភៃឆ្នាំមុនដែលគាត់ធ្លាប់មកទីនេះម្ដង។ ឥឡូវនេះរាងកាយរបស់វាមានប្រវែង១៧ហ្វ៊ីត និង១១,៧៥អ៊ីញ ប្រហាក់ប្រហែលនឹង៥ម៉ែត្រកន្លះ។
វាជាសត្វដែលមានធំដំបងអស្ចារ្យ។ មាឌរបស់ប៉ុណ្ណេះអាចចាត់ទុកថាធំលើសពីធម្មតា។ កាលពីពេលដែលគាត់មកទីនេះលើកទី១, លោកក្រេមវេបគិតថាសត្វក្រពើនេះមានអាយុចន្លោះពី៣០ទៅ៨០ឆ្នាំ។ មានន័យថាអាយុពិតរបស់វាអាចយ៉ាងហោចណាស់១២០ឆ្នាំ។ ប៉ុន្តែគួរឱ្យស្ដាយគេគ្មានឧបករណ៍វាស់ស្ទង់ដឹងអាយុរបស់សត្វក្រពើឱ្យបានជាក់លាក់។ អាយុពិតរបស់វាមិនដឹងប៉ុន្មានឆ្នាំ បើអាយុប៉ុណ្ណឹងហើយនៅតែរីកលូតលាស់ជាបន្តទៀត។ វារីកទាំងបណ្ដោយ និងរីកទាំងទទឹង។
បុគ្គលិកនៅសួនម៉ារីនលេនប្រាប់ថាការពិនិត្យសត្វក្រពើនេះប្រចាំឆ្នាំមិនមែនងាយស្រួលទេ ព្រោះការប្រើប្រាស់វិធីទប់ទល់អាចបង្កជាបញ្ហាប្រឈមមុខដាក់គ្នា។ នេះជារឿងធម្មតាសម្រាប់សត្វក្រពើដែលតាមប្រមាញ់សត្វដទៃធ្វើជាចំណីអាហាររបស់វា។ ជាទូទៅ ការពិនិត្យមើលសត្វក្រពើនេះធ្វើឡើងតាមរយៈការពិនិត្យសង្កេតរៀងៗខ្លួន និងតាមរយៈការវិភាគកំណត់ហេតុរបស់បុគ្គលិកនៅក្នុងសួនសត្វ។ គេអាចត្រួតពិនិត្យមើលលាមករបស់វា និងទឹកដែលវារស់នៅដើម្បីធ្វើវិភាគលម្អិត។
លទ្ធផលត្រួតពិនិត្យថ្មីៗនេះបង្ហាញថាវាមានលក្ខណៈសម្បត្តិល្អ គ្មានបញ្ហាចោទផ្នែកសុខភាព និងគ្មានភាពចាស់ទ្រុឌទ្រោមដែលគួរឱ្យបារម្ភទេ។ វាអាចរស់នៅជាច្រើនឆ្នាំទៅមុខទៀតក៏ឥតបញ្ហា។ លោកចច ក្រេក (George Craig) ជាស្ថាបនិកសួនសត្វនេះ។ គាត់និយមចូលចិត្តឱ្យចំណីក្រពើខាស់សឺសដោយផ្ទាល់ដៃ និងមានទំនាក់ទំនងគ្នាជិតស្និទ្ធ។ សូមជម្រាបថាសត្វក្រពើដែលគេទទួលស្គាល់ថាមានវ័យចំណាស់ជាងគេគឺក្រពើឈ្មោះហ្វ្រែសស៊ី (Freshie) ដែលរស់នៅក្នុងតំបន់អភិរក្សអស់រយៈពេល១៤០ឆ្នាំ។ មិនធម្មតាទេ ក្រពើនេះនៅតែមានអាយុវែង ទោះបីរងការបាញ់ប្រហារត្រូវចំកន្ទុយ និងភ្នែកខាងឆ្វេង៕
ប្រភព៖ កាសែតញូយ៉កប៉ុស្តិ៍ (New York Post)
https://nypost.com/2023/07/03/worlds-largest-crocodile-measuring-nearly-18-feet-long-still-growing-as-it-hits-stunning-age-milestone/
សត្វក្រពើឈ្មោលឈ្មោះហ្វ្រែសស៊ី (Freshie) កាលនៅរស់។ វាអាចមានជីវិតរស់១៤០ឆ្នាំ និងជាក្រពើដែលមានអាយុវែងជាងគេបំផុតនៅក្នុងពិភពលោក។ 
កោះគ្រីនអាយលេន (Green Island) របស់ប្រទេសអូស្ត្រាលី មើលពីលើអាកាស
ចែករំលែកព័តមាននេះ