បុរសម្នាក់ត្រូវចាប់ខ្លួនភ្លាមៗ ដោយកម្លាំងកងរាជអាវុធហត្ថ ក្រោយប្រព្រឹត្តិសកម្មភាពលបលួចថតរូបនារីម្នាក់ ខណៈពេលនាងកំពុងតែងូតទឹកនៅក្នុងបន្ទប់ទឹក រួចបង្ហោះរូបភាពចែកចាយទៅដល់
ខេត្តស្ទឹងត្រែង ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវចាប់ខ្លួនភ្លាមៗ ដោយកម្លាំងកងរាជអាវុធហត្ថ ក្រោយប្រព្រឹត្តិសកម្មភាពលបលួចថតរូបនារីម្នាក់ ខណៈពេលនាងកំពុងតែងូតទឹកនៅក្នុងបន្ទប់ទឹក រួចបង្ហោះរូបភាពចែកចាយទៅដល់មិត្តភក្តិក្នុងគ្រុបជាច្រើនទៀត។ ហេតុការណ៍នេះ បានកើតឡើងកាលពីថ្ងៃទី៣០ ខែមិថុនា ឆ្នាំ២០២៣ វេលាម៉ោង១៥និង៣០នាទីរសៀល ស្ថិតនៅក្នុងសង្កាត់ស្ទឹងត្រែង ក្រុងស្ទឹងត្រែង។
បើតាមប្រភពព័ត៌មានបានអោយដឹងថា ក្រោយពីទទួលបានព័ត៌មានខាងលើភ្លាម កម្លាំងមូលដ្ឋានកងរាជអាវុធហត្ថក្រុងស្ទឹងត្រែង ដឹកនាំដោយលោកវរសេនីយ៍ទោ សៅ វុត្ថា មេបញ្ជាការក្រុង បានចុះទៅដល់កន្លែងកើតហេតុ និងចាប់ខ្លួនជនសង្ស័យម្នាក់មានឈ្មោះសូ វីឡា (ហៅប្រុស) ភេទប្រុស អាយុ៣៩ឆ្នាំ ជាជនជាតិខ្មែរ មុខរបរបុគ្គលិកក្រុមហ៊ុនថ្នាំលាប «NIPPON» មានទីលំនៅក្នុងភូមិថ្មី ឃុំក្រឡា ស្រុកកំពង់សៀម ខេត្តកំពង់ចាម បច្ចុប្បន្នស្នាក់នៅបន្ទប់ជួលកន្លែងកើតហេតុខាងលើ។
ប្រភពដដែលបន្តថា ជនសង្ស័យរូបនេះបានធ្វើសកម្មភាពយកទូរស័ព្ទដៃមកលួចថតរូបនារីរងគ្រោះតាមប្រឡោះប្រហោងជញ្ជាំងជាប់ដំបូល ខណៈពេលដែលនារីរងគ្រោះកំពុងតែងូតទឹកនៅក្នុងបន្ទប់ទឹក។ ប្រភពដដែលបន្តថា ភ្លាមៗនោះ នារីរងគ្រោះក្រឡេកមើលទៅលើ ស្រាប់តែឃើញទូរស័ព្ទដៃកំពុងថតរូបខ្លួន ក៏ស្រែកហៅឱ្យប្អូនប្រុសជីដូនមួយទៅចាប់យកទូស័ព្ទពីជនសង្ស័យរូបនោះ រួចរាយការណ៍ជូនទៅសមត្ថកិច្ចតែម្តង។
តាមចម្លើយរបស់ជនសង្ស័យ បានសារភាពថា «ខ្លួនធ្លាប់បានថតរូបភាពនារីរងគ្រោះនៅពេលងូតទឹកនោះចំនួន២លើករួចមកហើយ»។ ហើយតាមការស្រាវជ្រាវនៅក្នុងទូរស័ព្ទដៃរបស់ជនសង្ស័យរូបនេះ បានប្រទះឃើញថា រូបភាពអាក្រា.តកា.យរបស់នារីរងគ្រោះ ត្រូវជនសង្ស័យរូបនេះ បង្ហោះចូលក្នុងគ្រុបឆាត Friend របស់ជនសង្ស័យជាច្រើនផងដែរ។
ក្រោយការចាប់ខ្លួន កម្លាំងអាវុធហត្ថបានចាប់យកវត្ថុតាងរួមមាន ទូរស័ព្ទដៃចំនួន២គ្រឿង ព្រមទាំងម៉ូតូម៉ាកហុងដា ពណ៌ខ្មៅមួយគ្រឿងផងដែរ។ បច្ចុប្បន្ន ជនសង្ស័យ រួមនឹងវត្ថុតាងកំពុងឃាត់ និងរក្សាទុកក្នុងអង្គភាពកងរាជអាវុធខេត្ត ដើម្បីកសាងសំណុំរឿងបញ្ជូនទៅកាន់ស្ថាប័នអយ្យការអបសាលាដំបូងខេត្តស្ទឹងត្រែង ចាត់ការតាមនីតិវិធីនៃច្បាប់៕
ចែករំលែកព័តមាននេះ