ខេត្តក្រចេះ ៖ ផ្ទះប្រជាពលរដ្ឋចំនួន៤ល្វែងត្រូវអណ្ដាតភ្លើងលេបត្របាក់យ៉ាងសន្ធោសន្ធៅ បណ្ដាលឱ្យខ្ទេចអស់ទាំងស្រុង និងខូចខាតសម្ភារៈសរុបប្រមាណជាង៣០ម៉ឺនដុល្លារ។ ហេតុការណ៍អគ្គិភ័យឆាបឆេះនេះ បានកើតឡើងកាលពីវេលាម៉ោង០១និង១០នាទីរំលងអធ្រាត្រឈានចូលថ្ងៃទី២៤ ខែមិថុនា ឆ្នាំ២០២៣ នៅត្រង់ចំណុចគីឡូម៉ែត្រ១២៣ (ផ្សារកាបី) ស្ថិតក្នុងភូមិសែនអភិវឌ្ឍន៍ ឃុំគ្រញូងសែនជ័យ ស្រុកស្នួល ខេត្តក្រចេះ។
ម្ចាស់ផ្ទះរងគ្រោះខាងលើមានឈ្មោះ កែវ ឈាន ភេទប្រុស អាយុ៥៣ឆ្នាំ ជាជនជាតិខ្មែរ មុខរបរជាសមាជិកក្រុមប្រឹក្សា-ឃុំគ្រញូងសែនជ័យ និងមានប្រពន្ធឈ្មោះ ណៃ យាត។ ហើយក្នុងហេតុការណ៍ភ្លើងកំពុងតែឆាបឆេះផ្ទះប្រជាពលរដ្ឋយ៉ាងសន្ធោសន្ធៅនោះ គេក៏សង្កេតឃើញវត្តមានលោក សាម ណាល់ អភិបាលស្រុកស្នួល ក៏បានចុះទៅដល់ទីតាំងកើតហេតុ និងដឹកនាំកម្លាំងជួយអន្តរាគមន៍បាញ់ទឹកពន្លត់អគ្គិភ័យ រហូតដល់រលត់អស់ទាំងស្រុងផងដែរ។
បើតាមប្រភពពីសមត្ថកិច្ច បានឲ្យដឹងថា ផ្ទះដែលត្រូវភ្លើងឆាបឆេះនោះ គឺធ្វើអំពីឈើលើថ្មក្រោម ប្រក់ស័ង្កសីចំនួន៤ល្វែង ហើយត្រូវរងការខូចខាតទ្រព្យសម្បត្តិអស់ទាំងស្រុង ដែលសរុបជាទឹកប្រាក់ប្រមាណជាង ៣០០.០០០ម៉ឺនដុល្លារ (ជាងសាមសិបម៉ឺនដុល្លារ) ឯណោះ។ ចំណែកមូលហេតុនៃការឆាបឆេះនោះ គឺបណ្តាលមកពីទុស្សេខ្សែភ្លើងចេញពីបន្ទប់ស្តុកអីវ៉ាន់។ ហើយក្នុងករណីអគ្គីភ័យខាងលើ ពុំបណ្តាលឱ្យមាននរណាម្នាក់គ្រោះថ្នាក់ដល់អាយុជីវិត នោះទេ ហើយក៏មិនបណ្តាលអោយមានការឆេះរាលដាលទៅដល់លំនៅដ្ឋានផ្សេងទៀតដែរ។
ពាក់ព័ន្ធក្នុងហេតុការណ៍គ្រោះអគ្គិភ័យខាងលើនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន៥គ្រឿង ក្នុងនោះរថយន្តរបស់ស្នងការដ្ឋាននគរបាលខេត្តក្រចេះចំនួន២គ្រឿង, រថយន្តរបស់អធិការដ្ឋាននគរបាលស្រុកស្នួលចំនួន១គ្រឿង, រថយន្តរបស់អធិការដ្ឋាននគរបាលស្រុកកែវសីមា ចំនួន០១គ្រឿង និងរថយន្តរបស់អធិការដ្ឋាននគរបាលស្រុកមេមត់ ចំនួន១គ្រឿងទៀតផងដែរ។ ហើយការពន្លត់អគ្គិភ័យនោះ គឺប្រើប្រាស់ទឹកអស់ចំនួន១២រថយន្ត ទើបអាចគ្រប់គ្រងស្ថានការណ៍បានជាស្ថាពរនៅវេលាម៉ោង៤និង៥៥នាទីទៀបភ្លឺថ្ងៃដដែល៕
ចែករំលែកព័តមាននេះ