រាជធានីភ្នំពេញ ៖ ការប្រកួតកីឡាវ៉ូស៊ូជ្រើសរើសជើងឯកទូទាំងប្រទេសឆ្នាំ២០១១ ដែលធ្វើឡើងស្របតាមកម្មវិធីក្រសួងអប់រំ យុវជន និងកីឡា បានចាប់ផ្តើមជាផ្លូវការពីថ្ងៃទី៤ ដល់ថ្ងៃទី៨ ឧសភា នៅពហុកីឡដ្ឋានជាតិ។ លោកម៉ៅ ចន្ថាវុធ អគ្គលេខាធិការនៃសហព័ន្ធកីឡាវ៉ូស៊ូកម្ពុជា បានឱ្យដឹងថា ឆ្នាំនេះមានក្លឹបចូលរួមចំនួន១២ និងមានកីឡាករ-កីឡាការិនីសរុប២៣៦នាក់
រាជធានីភ្នំពេញ ៖ ការប្រកួតកីឡាវ៉ូស៊ូជ្រើសរើសជើងឯកទូទាំងប្រទេសឆ្នាំ២០១១ ដែលធ្វើឡើងស្របតាមកម្មវិធីក្រសួងអប់រំ យុវជន និងកីឡា បានចាប់ផ្តើមជាផ្លូវការពីថ្ងៃទី៤ ដល់ថ្ងៃទី៨ ឧសភា នៅពហុកីឡដ្ឋានជាតិ។ លោកម៉ៅ ចន្ថាវុធ អគ្គលេខាធិការនៃសហព័ន្ធកីឡាវ៉ូស៊ូកម្ពុជា បានឱ្យដឹងថា ឆ្នាំនេះមានក្លឹបចូលរួមចំនួន១២ និងមានកីឡាករ-កីឡាការិនីសរុប២៣៦នាក់ ក្នុងនោះកីឡាការិនី៩៤នាក់ ចំនួននេះមានការថយចុះជាងឆ្នាំមុន ។ ប៉ុន្តែលោកបានបញ្ជាក់ថា ឆ្នាំនេះសកម្មភាពប្រកួតមានសភាពផុសផុលជាងឆ្នាំមុនៗ ។ ដោយឡែកវិញ្ញាសាប្រកួតក៏មានច្រើនជាងឆ្នាំមុនដែរ ។
ចំណែកវិញ្ញាសាសម្តែងវិញមានវិញ្ញាសាថាវលូ បុរស-នារីអាយុក្រោម១៦ឆ្នាំ ។ វិញ្ញាសាថាវលូពេញវ័យ និងការសម្តែងជាក្រុម ហើយវិញ្ញាសាសាន់ស៊ូ ផ្នែកប្រយុទ្ធមាន៧ប្រភេទ ទម្ងន់មាន៤៥, ៤៨, ៥២, ៥៦, ៦០, ៦៥ និង៧០គីឡូក្រាម ។ ចំណែកផ្នែកនារីមានតែទម្ងន់១ប្រភេទប៉ុណ្ណោះ គឺទម្ងន់សេរី ។ វ៉ូស៊ូជាប្រភេទកីឡាក្បាច់គុនរបស់ប្រទេសចិន ដែលមានអាយុកាលរាប់រយឆ្នាំមកហើយ។ អ្នកដែលនិយមចូលចិត្តកីឡាប្រភេទនេះភាគច្រើនជាមនុស្សវ័យកណ្តាល និងមនុស្សចំណាស់ ព្រោះថា វិញ្ញាសាកីឡានេះមិនសូវប្រើកម្លាំងទាំងស្រុងនោះទេ ទាំងវិញ្ញាសាសម្តែង និងវិញ្ញាសាប្រយុទ្ធ ច្រើនតែប្រើកាយវិការទន់ភ្លន់។
លោកគឹម ជិនក្វាន់ គ្រូបង្វឹកកីឡាក្បាច់គុនវ៉ូស៊ូជនជាតិកូរ៉េខាងត្បូងបានមានប្រសាសន៍ថា ការហ្វឹកហាត់កីឡាវ៉ូស៊ូនាំមកនូវសុខភាព រាងកាយមាំមួន ប្រាជ្ញាវៃឆ្លាត ។ តួយ៉ាងដូចជាកីឡាការិនីចាន់វន្នី មានអាយុ៤៣ឆ្នាំហើយ ប៉ុន្តែគាត់នៅតែមានការស្រឡាញ់ចូលចិត្តហាត់ក្បាច់គុណកីឡាវ៉ូស៊ូនេះណាស់ ដោយប្រាប់ថា គាត់ធ្លាប់បានទៅចូលរួមប្រកួតកម្រិតពិភពលោកនៅប្រទេសចិនឆ្នាំ២០០៥ និងធ្លាប់ដណ្តើមបានមេដាយប្រាក់ពីការប្រកួតនេះទៀតផង ។ ឆ្នាំនេះគាត់ដណ្តើមបានមេដាយមាសពីការប្រកួតជើងឯកថ្នាក់ជាតិ ផ្នែកសម្តែងគុនដាវ ។ លោកគឹម ជិនក្វាន់ បានបន្តថា កីឡាករ-កីឡាការិនីទាំងអស់ដែលមុននឹងទទួលបានមេដាយ សុទ្ធតែបានឆ្លងកាត់ការត្រួតពិនិត្យយ៉ាងល្អិតល្អន់ពីគណៈកម្មការផ្តល់ពិន្ទុ ។
ឧទាហរណ៍វិញ្ញាសាសម្តែងត្រូវពិនិត្យមើលកាយវិការសព្វជ្រុងជ្រោយ ទន់ភ្លន់ ស្វាហាប់ ភាពរស់រវើក ។ លោកម៉ៅ ចន្ថាវុធ បានបន្ថែមថា រហូតមកដល់ពេលនេះ វិញ្ញាសាកីឡាវ៉ូស៊ូទទួលបានការចាប់អារម្មណ៍កាន់តែ ច្រើនឡើងៗ ពីសំណាក់មនុស្សវ័យចាស់ ហើយវិញ្ញាសាកីឡាមួយនេះតែងតែបានការអនុញ្ញាតពីក្រសួងអប់រំ យុវជន និងកីឡា ឱ្យចេញទៅប្រកួតលើឆាកអន្តរជាតិជាញឹកញាប់ ៕
ចែករំលែកព័តមាននេះ