កាលពីពេលថ្មីៗនេះ មហាជនប្រើប្រាស់បណ្ដាញសង្គមជាច្រើននាក់នាំគ្នារិះគន់យ៉ាងខ្លាំងចំពោះបេក្ខនារីប្រឡងក្នុងកម្មវិធី «The Voice Cambodia» រដូវកាលទី៣ មានឈ្មោះ «សុខុម រចនា» បានយកបទចម្រៀងចំណងជើងថា
រាជធានីភ្នំពេញ ៖ កាលពីពេលថ្មីៗនេះ មហាជនប្រើប្រាស់បណ្ដាញសង្គមជាច្រើននាក់នាំគ្នារិះគន់យ៉ាងខ្លាំងចំពោះបេក្ខនារីប្រឡងក្នុងកម្មវិធី «The Voice Cambodia» រដូវកាលទី៣ មានឈ្មោះ «សុខុម រចនា» បានយកបទចម្រៀងចំណងជើងថា «How About Now» ដែលជាកម្មសិទ្ធិរបស់តារាចម្រៀងរ៉េបប្រុសដ៏ល្បីល្បាញមួយដួង នៅក្នុងប្រទេសកម្ពុជា គឺលោក ជី ដេវីត ទៅច្រៀងឡើងវិញ។
នៅលើឆាកប្រឡងកម្មវិធី «The Voice» បេក្ខនារីរូបនេះ បានត្រឹមតែនិយាយអរគុណដល់អ្នកចូលរួមទស្សនាបទមួយនេះប្រមាណ៣០លាននាក់ប៉ុណ្ណោះ ប៉ុន្តែមិនបានអរគុណដល់លោក ជី ដេវីត សូម្បីតែមួយម៉ាត់។ ចំណុចនេះហើយ ធ្វើឱ្យមហាជនរិះគន់នាងថា «មិនចេះផ្ដល់តម្លៃដល់ម្ចាស់ដើមគេទាល់តែសោះ»។ មិនត្រឹមប៉ុណ្ណោះ មហាជនកត់សម្គាល់ត្រង់ពាក្យមួយឃ្លាដែលបេក្ខនារីរូបនេះ និយាយនៅលើឆាក «The Voice» ដោយនាងនិយាយថា «អរគុណ 30M Views» មានន័យថា នាងចង់សំដៅចំពោះអ្នកចូលទស្សនាវីដេអូចម្រៀង How About Now? របស់នាងទាំងជាង៣០លាននាក់ ប៉ុន្តែនាងមិនបាននិយាយអរគុណជាសាធារណៈដល់លោក ជី ដេវីត ដែលជាម្ចាស់បទនេះឡើយ សូម្បីតែមួយម៉ាត់។
ក្រោយពេលមានមហាជនជាច្រើនក្នុងប្រទេសកម្ពុជា នាំគ្នាផ្ទុះការរិះគន់ធ្ងន់ៗរួចមក ពេលនេះបេក្ខនារី សុខុម រចនា ក៏បានចេញមុខសុំទោសជាសាធារណៈនៅលើគណនីហ្វេសប៊ុករបស់ខ្លួនថា «សូមអរគុណសម្រាប់ការស្រលាញ់គាំទ្រពីពុកម៉ែបងប្អូនទាំងអស់គ្នាដែលបានគាំទ្ររូបនាងខ្ញុំតាមរយៈបទ cover «how About Now» ដែលជាបទម្ចាស់ដើមរបស់បងប្រុស G-Devith នាងខ្ញុំសូមអធ្យាស្រ័យចំពោះកំហុសខុសឆ្គង ដោយនិយាយពេលភ្លាមៗនៅលើឆាក នាងខ្ញុំមិនបានរៀបចំពាក្យនិយាយអោយគ្រប់ជ្រុងជ្រោយទេ នឹងមិនបានតាំងខ្លួនជាម្ចាស់បទដែរ ខ្ញុំគ្រាន់តែសប្បាយរីករាយដែលទទួលបានលទ្ធផលល្អ និងអរគុណចំពោះបងប្អូនអ្នកទស្សនាបទ cover ក្នុងយូធូបវីយូ 30M ប៉ុណ្ណោះ។ ហើយក៏អរគុណបងប្អូនសម្រាប់ការបញ្ចេញមតិយោបល់ផងដែរ ។ ខ្ញុំពិតជាស្រលាញ់បងប្អូនខ្មែរទាំងអស់គ្នា។ អរគុណខ្លាំងៗ»។
មិនទុកចាំយូរ ក្រោយពេលឃើញសារបេក្ខនារីរូបនេះបង្ហោះដូច្នេះរួចមក ក៏ស្រាប់តែមានមហាជនមិនតិចនាក់នោះទេ នាំគ្នាចូលទៅខមិនបញ្ចេញមតិពីមួយទៅមួយថា «ចេះកែផងទៅ មិនមែនឲ្យតែគេរិះគន់ថាគេជាន់ពន្លិចនោះទេ ភាសាសាមញ្ញសម្រាប់តែមនុស្សដែលមិនចេះទទួលយកពាក្យរិះគន់ដើម្បីកែលម្អ»។
អ្នកខ្លះទៀតក៏លើកឡើងច្បាស់ៗថា «ត្រឹមជាអ្នកចម្រៀង Cover បទចម្រៀងគេ បានល្បីឈ្មោះបន្តិចបន្តួច ប្អូនបែរជាគិតថា ប្អូនខ្ពស់ហួសមេឃ។ ប្អូនចូរចងចាំថា មនុស្សដែលខ្វះគុណធម៌ មិនអាចទទួលបានការគាំទ្រយូរអង្វែងនោះទេ។ មនុស្សដែលផឹកទឹកភ្លេចប្រភព ក៏មិនរីកចម្រើនវែងឆ្ងាយដែរ។ ប្អូនមានថ្ងៃនេះ ដោយសារមានអ្នកគាំទ្រទំនុកច្រៀងរបស់ Devit បូកជាមួយភ្លេងអកកាដង់ មិនមែនដោយសារប្អូនមានសមត្ថភាពច្រៀងពីរោះនោះទេ។ ម្យ៉ាងក៏ដោយសារម្ចាស់បទ គេមិន Report ចម្រៀងប្អូន Cover ចុងក្រោយប្អូនបានចិត្តធ្វើដូចគេមិនដល់ខ្លួន។ សម្រាប់ប្អូន ត្រឹមចូលរួម The Voice Cambodia សូមកុំគិតថា អាចជោគជ័យនោះ។ មិនខ្វះទេ អ្នកលើកពាន តែចុងក្រោយគ្មានអ្វីជាដុំកំភួន ព្រោះឈ្លក់នឹងភាពល្បីបន្តិចបន្តួច»។
យ៉ាងណាមិញ បើយើងនាំគ្នាក្រឡេកទៅមើលតារាចម្រៀងប្រុសដ៏ល្បីល្បាញ មានឈ្មោះបោះសំឡេង លោក ជី ដេវីត ត្រូវជាម្ចាស់បទវិញវិញ លោកហាក់គ្មានប្រតិកម្មអ្វីនោះទេទាក់ទងនឹងករណីខាងលើនេះ តែគេសង្កេតឃើញលោកជី ដេវីត បង្ហោះសារលើផេកហ្វេសប៊ុកផ្លូវការរបស់ខ្លួន ទំនងចង់សំដៅទៅលើរឿងដែលមហាជនរិះគន់ចំពោះបេក្ខនារីឈ្មោះ សុខុម រចនា។ ហើយកាលពីកន្លងទៅ តារាប្រុសលោក ជី ដេវីត ក៏ធ្លាប់ត្រូវប្រកាសក្រោយពេលលោកចូលរួមនៅក្នុងកម្មវិធីមួយ ដោយលោកបាននិយាយលើកទឹកចិត្តដល់ក្រុមអកកេស ឬអកកាដង់បែបនេះថា អាចជួយយកបទរបស់លោកទៅច្រៀង Cover ឬច្រៀងឡើងវិញបាន។ ជាពិសេសលោកបញ្ជាក់ទៀតថា បើសិនជាបទ Cover ទាំងនោះជាប់កម្មសិទ្ធិបញ្ញា ឬជាប់កូពីរ៉ាយ (Copy Right) ក្រុមអកកេស ឬអកកាដង់ អាចស្នើទៅលោក គឺលោកនឹងឱ្យក្រុមការងារជួយដោះជូនថែមទៀត៕ ដោយ ៖ សុភា ដានេត
ចែករំលែកព័តមាននេះ