រាជធានីភ្នំពេញ ៖ លោកគ្រូ សាន សុជា ដែលកាលពីមុន គឺជាព្រះសង្ឃមួយអង្គរបស់កម្ពុជាបានល្បីល្បាញក្នុងការអប់រំផ្នែកព្រះធម៌តាមផ្លូវលោក និងវិទ្យាសាស្ត្របានគូសបញ្ជាក់ «អ្នកដែលជ្រះថ្លានឹងព្រះធម៌ដែលខ្ញុំបង្រៀន ឬសម្តែងពន្យល់ពិតប្រាកដ…
រាជធានីភ្នំពេញ ៖ លោកគ្រូ សាន សុជា ដែលកាលពីមុន គឺជាព្រះសង្ឃមួយអង្គរបស់កម្ពុជាបានល្បីល្បាញក្នុងការអប់រំផ្នែកព្រះធម៌តាមផ្លូវលោក និងវិទ្យាសាស្ត្របានគូសបញ្ជាក់ «អ្នកដែលជ្រះថ្លានឹងព្រះធម៌ដែលខ្ញុំបង្រៀន ឬសម្តែងពន្យល់ពិតប្រាកដ ពួកគាត់ប្រាកដជាយល់ច្បាស់ថាខ្ញុំជាមនុស្សបែបណាមិនខាន» ។
ក្រោយពីជួបសម្តេចតេជោ ហ៊ុន សែន នាយករដ្ឋមន្ត្រី កាលពីថ្ងៃទី១៣ខែមិថុនា ឆ្នាំ២០២៣ នៅគេហដ្ឋានសម្តេចផ្ទាល់ លោកគ្រូ សាន សុជា បានសរសេរលើបណ្តាញសង្គម នៅថ្ងៃទី១៤ មិថុនា យ៉ាងដូច្នេះថា៖«អ្នកដែលជ្រះថ្លានឹងព្រះធម៌ដែលខ្ញុំបង្រៀន ឬសម្តែងពន្យល់ពិត ប្រាកដ ពួកគាត់ប្រាកដជាយល់ច្បាស់ថា ខ្ញុំជាមនុស្សបែបណាមិនខាន ពួកគាត់មិនអាចងាករេចិត្តចេញពីព្រះធម៌ ព្រោះតែការងារផ្ទាល់ខ្លួនរបស់ខ្ញុំឡើយ ព្រោះពួកគាត់បានទទួលប្រយោជន៍អំពីព្រះធម៌រួចទៅហើយ» ។
លោកគ្រូសាន សុជា បានគូសបញ្ជាក់បន្ថែមថា ៖« ពួកគាត់ពិតជាមិនខឹងសម្បានឹងជីវិតឯកជនរបស់ខ្ញុំឡើយ ទឹកចិត្តរបស់ពួកគាត់ មានតែព្រួយបារម្ភពីសុខទុក្ខរបស់ខ្ញុំ នឹងរង់ចាំចូលរួមក្នុងដំណើរធម្មទាន របស់ខ្ញុំតទៅមុខទៀតប៉ុណ្ណោះ» ។
លោកគ្រូលើកឡើងថា ចំណែកអ្នកដែលដៀមដាម ឬរហូតដល់ជេរប្រមា.ថខ្ញុំ ច្បាស់ណាស់ថា ពួកគាត់មិនដែលជ្រះថ្លានឹងធម្មទានរបស់ខ្ញុំតាំងពីខ្ញុំនៅជាបព្វជិតម្ល៉េះ នេះជាមូលហេតុដែលខ្ញុំមិនចំណាយកម្លាំង និងពេលវេលាទៅឆ្លើយតប ខ្ញុំយកចិត្តទុកដាក់ជាមួយតែអ្នក ដែលចង់រួមដំណើរជាមួយខ្ញុំប៉ុណ្ណោះ ។
លោកគ្រូបានលើកឡើងថា រស់ក្នុងសង្គមត្រូវមានទំនាក់ទំនងល្អ ហើយការជួប គឺជាការគោរពឱ្យតម្លៃគ្នាទៅវិញទៅមក សូម្បីព្រះសម្មាសម្ពុទ្ធក៏ធ្លាប់យាងទៅជួបព្រះរាជា ឬសេនាបតីដែរ មិនមែនការជួ បសុទ្ធតែកើតចេញពីចិត្តកខ្វក់ឡើយ ។ ដូចកាលពីដើមឆ្នាំ ខ្ញុំបានទៅជួបសម្តេចប៉ាប មិនមែនព្រោះខ្ញុំដូរសាសនាទើបទៅជួបបាននោះទេ គ្រាន់តែជាការបង្កើនមិត្តភាពរវាងអ្នកគោរពសាសនាប៉ុណ្ណោះ ខ្ញុំនៅតែជាខ្ញុំ ខ្ញុំនៅតែគោរពដើរតាមមាគ៌ាព្រះសម្មាសម្ពុទ្ធដដែល ។
ក្នុងជំនួបសំណេះសំណាលជាមួយកម្មករ កម្មការិនីក្នុងរាជធានីភ្នំពេញនាព្រឹកថ្ងៃទី១៤ មិថុនា ឆ្នាំ២០២៣ បានថ្លែងបញ្ជាក់ថា ក្នុងជំនួបរបស់សម្តេចជាមួយលោកគ្រូ សាន សុជា នាថ្ងៃម្សិលមិញ ដើម្បីជាផ្តល់នូវការគាំទ្រដល់សកម្មភាពលោកគ្រូ សាន សុជា ឱ្យបន្តផ្សព្វផ្សាយនូវព្រះធម៌អប់រំចិត្តដល់ប្រជាជនកម្ពុជា ពិសេសជួយអប់រំលើការកសាងអំពើល្អក្នុងសង្គមជាតិ ។
សម្តេចតេជោ ហ៊ុន សែន បានថ្លែងយ៉ាងដូច្នេះថា «ម្សិលមិញបានជួបជាមួយលោកក្មួយ សាន សុជា«…»ពីដើមធ្លាប់តែទេសនា តែឥឡូវ គឺស្វែងរកការគាំទ្រ ហើយយើងក៏ត្រូវការ ដើម្បីឲ្យព្រះសង្ឃដែលលាចាកសិក្ខាបទ (សឹក) ដែលចេះធម៌ត្រឹមត្រូវ គឺបន្តទៅតាមព្រះពុ ទ្ធសាសនាជួយដល់ការអប់រំសង្គម អប់រំផ្លូវចិត្ត ធ្វើយ៉ាងម៉េចប្រើប្រាស់ធម៌ សម្រាប់ការរក្សា សន្តិភាព រក្សាស្ថិរភាពនយោបាយ និងជាពិសេសការកសាងអំពើល្អក្នុងសង្គមសម្រាប់ប្រជាជនរបស់យើង»។
សូមបញ្ជាក់ថា លោកគ្រូ សាន សុជា បានបួសរៀនព្រះធម៌ក្រោមម្លប់ព្រះពុទ្ធសាសនា អស់រយៈពេលជាង៣០ព្រះវស្សា ។ លោកគ្រូ ទទួលបានប្រជាប្រិយភាពខ្ពស់ពីប្រជាពុទ្ធបរិស័ទតាមរយៈការផ្សព្វផ្សាយព្រះអប់រំចិត្ត និងការពន្យល់បកស្រាយអំពីព្រះធម៌ ។
លោកគ្រូ សាន សុជា បានលាចាកសិក្ខាបទ កាលពីថ្ងៃទី២១ ខែឧសភា ឆ្នាំ២០២៣ កន្លងទៅ នៅប្រទេសអូស្ត្រាលី ។ បើទោះបីបានលាចាកសិក្ខា តែលោកគ្រូ សាន សុជា នៅបន្តការសិក្ខាបទជាឧបាសក ហើយបន្តផ្សព្វផ្សាយព្រះធម៌ផងដែរ ៕
ចែករំលែកព័តមាននេះ